"დემოკრატიული ლპობის საფუძველი ბიძინა ივანიშვილია" - დებატები ევროპარლამენტში საქართველოზე
დებატები ევროპარლამენტში საქართველოზე
ევროპარლამენტში, საქართველოს საკითხზე გამართულ დებატებზე გამომსვლელთაგან თითქმის ყველა ევროპარლამენტარმა ერთხმად აღნიშნა, რომ საქართველოში დემოკრატიის უკუსვლაა, რომლის მთავარი მიზეზი ბიძინა ივანიშვილია. მათ ასევე მოუწოდეს ხელისუფლებას, გაათავისუფლონ საქართველოს მესამე პრეზიდენტი, მიხეილ სააკაშვილი ჰუმანიტარული მიზეზების გამო. ევროპარლამენტარებმა ახსენეს “მთავარი არხის” დამფუძნებელი ნიკა გვარამიაც და მის საქმეს პოლიტიკურად მოტივირებული უწოდეს.
რა თქვეს ევროპარლამენტარებმა:
ვიოლა ფონ კრამონი, მწვანეები/ევროპის თავისუფალი ალიანსის ჯგუფის წევრი:
“ჩემთვის რთულია აღიარება, მაგრამ საქართველო, რომელიც ოდესღაც იყო აღმოსავლეთ პარტნიორობის ლიდერი, ახლა ტყვე სახელმწიფოა. დემოკრატიული უკუსვლა ჩქარდება, სასამართლოს სისტემას კლანი მართავს, გახმაურებული საქმეები პოლიტიკურად მოტივირებულია, როგორიცაა ნიკა გვარამიას უსამართლო პატიმრობა. მთავრობამ აიღო რამდენიმე მაგალითი პუტინის დეზინფორმაციის სახელმძღვანელოდან და ავრცელებს ტყუილებს ევროკავშირის, აშშ-ის და NATO-ს წინააღმდეგაც კი.
უსირცხვილო ტყუილია, რომ დასავლეთი საქართველოს ომში ჩათრევას ცდილობს. მედიის თავისუფლება ზიანდება, როცა პრორუსულ რადიკალებს საშუალებას აძლევენ, თავს დაესხან მედიასა და უმცირესობებს. ამ დემოკრატიული ლპობის საფუძველი არავინაა, გარდა ქვეყნის ყველაზე დიდი ოლიგარქის, ბიძინა ივანიშვილისა. 10 წლის წინ ის დაგვპირდა შესანიშნავ დემოკრატიას, მაგრამ მივიღეთ ტყვე სახელმწიფო. ამ ყველაფრის გამო საქართველომ არ მიიღო კანდიდატის სტატუსი. ევროკავშირში ინტეგრაცია საქართველოს კონსტიტუციაშია ჩაწერილი და ისინი, ვინც ამას ვერ შეასრულებენ, პასუხის გაცემა მომავალი თაობისთვის მოუწევთ. რა თქმა უნდა, ჩვენ გჭირდება გათავისუფლდეს მიხეილ სააკაშვილი ჰუმანიტარული მიზეზების გამო.”
სვენ მიქსერი, სოციალისტებისა და დემოკრატების პროგრესული ალიანსის ჯგუფის წევრი:
“უკრაინაში რუსეთთან დაკავშირებით ვაფასებ საქართველოს გულწრფელ პოზიციას. საქართველომ მრავალჯერ მისცა ხმა, რათა ეთქვა, რომ რუსეთის აგრესია არის უკანონო, განსაკუთრებით გაეროში, მაგრამ ამავე დროს მე ღრმად შეშფოთებული ვარ ზოგიერთი ქართველი პოლიტიკოსის რიტორიკის გამო, რომლებიც ადანაშაულებენ ევროკავშირსა და ჩვენს პარტნიორებს საქართველოს ომში ჩათრევაში. ეს ბრალდებები არასწორია. ევროკავშირი მუდმივად უჭერდა მხარს და გააგრძელებს საქართველოს ტერიტორიული მთლიანობისა და სუვერენიტეტის მხარდაჭერას.”
რასა იუკნევიჩიენე, ევროპის სახალხო პარტიის (EPP) წევრი:
“საქართველოს ხელისუფლებამ კარგად იცის, რა უნდა გააკეთოს. ყველაფერი ევროკომისიის რეკომენდაციებში წერია, რომელიც უნდა იყოს შესრულებული მანიპულაციებისა და პრეტენზიების გარეშე. ყოფილი პრეზიდენტის, მიხეილ სააკაშვილი ციხეში ყოფნა არ არის ევროპული ფასეულობა. ხალხის წამება პუტინის პოლიტიკაა და მინდა მოვუწოდო საქართველოს მთავრობას, მათ შორის პრეზიდენტს, გააკეთეთ ყველაფერი, რათა მიხეილ სააკაშვილის სიცოცხლის საკითხი თქვენს სინდისზე არ იყოს.”
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● სააკაშვილის საქმეები. რისთვის ზის ციხეში ყოფილი პრეზიდენტი
მარკეტა გრეგოროვა, მწვანეთა პარტიის დეპუტატი:
“საქართველოში დემოკრატიასთან, კანონის უზენაესობასთან, ფუნდამენტურ თავისუფლებებსა და ადამიანის უფლებებთან დაკავშირებით მრავალი პრობლემები არსებობს მოუგვარებელი ელემენტებით. ამიტომაც, საქართველოზე ანგარიში გარკვეულწილად კრიტიკულად არის შეფასებული. ჭეშმარიტი და ყოვლისმომცველი რეფორმების იმპლემენტაცია აუცილებელია. დაჩქარებული კანონებისა და პოლიტიკურად მოტივირებული პროცესების ადგილი არ არის. თუ არსებობს კანდიდატის სტატუსის მიღების სურვილი, ასევე იარსებებს გზაც. სწორედ ამიტომ აუცილებელია ჩადენილი უსამართლობების გამოსწორება. საქართველომ მომდევნო ნაბიჯები უნდა გადადგას ევროკავშირი გაწევრიანების მიზნისკენ და პირდაპირ მივმართავ ქართველ პოლიტიკოსებს, გვერდზე გადადეთ თქვენი განსხვავებები და ერთობლივად იმუშავეთ იმ დავალებების შესასრულებლად, რათა აასრულოთ თქვენი ძალიან ბევრი მოქალაქის მისწრაფებები.”
მირიამ ლექსმანი, ევროპის სახალხო პარტიის (EPP) წევრი:
“ერთი ოლიგარქი კვლავ ფლობს ჭარბ გავლენას პოლიტიკურ გარემოზე. ჩვენ ვნახეთ თავდასხმები ჟურნალისტებზე. სასამართლოს არასწორად იყენებენ პოლიტიკური წნეხისთვის და დემოკრატიული პოლიტიკური პროცესები ისევ უარესდება. ამის საპირისპიროდ, ჩვენ ველით, რომ ნიკა გვარამიას მიმართ პოლიტიკური სასჯელი უნდა მოიხსნას და ის უნდა გათავისუფლდეს. საქართველოს ყოფილმა პრეზიდენტს, მიხეილ სააკაშვილს უნდა მიეცეს უფლება გაიაროს სამედიცინო მკურნალობა საზღვარგარეთ საქართველოს სისხლის სამართლის კოდექსის შესაბამისად.”
● სენატორი ჯინ შაჰინი: საქართველოში უკუსვლაა – შესაძლოა გადავხედოთ სტრატეგიას დახმარებასთან დაკავშირებით
● “საქართველოში დემოკრატიის უკუსვლა შემაშფოთებელია” – აშშ-ს სენატის საგარეო კომიტეტის სხდომა
● გადაწყვეტილება მიღებულია: უკრაინას და მოლდოვას კანდიდატის სტატუსი მისცეს. საქართველოს – მხოლოდ პერსპექტივა
8 ნოემბერს ევროპარლამენტარებმა ბრიუსელში, საგარეო კომიტეტის სხდომაზე, საქართველოს ევროკავშირთან ასოცირების შეთანხმების დანერგვის ყოველწლიური ანგარიში განიხილეს. მიღებული კომპრომისული დოკუმენტის მიხედვით, ბიძინა ივანიშვილი აღარ არის ნახსენები როგორც ოლიგარქი, თუმცა დეოლიგარქიზაციის პუნქტის თავშივე მოცემულია მისი სახელი და გვარი და წერია, რომ აუცილებელია ივანიშვილის ჭარბ გავლენებთან დაკავშირებით მიღებული იყოს, მათ შორის, საკანონმდებლო გადაწყვეტილებები.
გარდა ამისა, დოკუმენტში საუბარია მედიის შევიწროებაზე, პოლიტიკურ დევნაზე, სახალხო დამცველის არჩევის წესზე და ასევე, ევროპარლამენტი მოუწოდებს საქართველოს ხელისუფლებას, “ჰუმანიტარული მიზნებით და პოლარიზაციის შესამცირებლად”, გადაიყვანოს მიხეილ სააკაშვილი საზღვარგარეთ სამკურნალოდ.
2022 წლის 13 ივლისს კი ცნობილი გახდა, რომ ევროკომისია საქართველოსთვის ევროკავშირის მიერ გაწერილი 12 პუნქტის შესრულების შესახებ შეფასებას 2022 წლის ნაცვლად, 2023 წლისთვის მოამზადებს. ამის შესახებ ევროპარლამენტში გამოსვლისას ევროკომისიის წარმომადგენელმა, მაიკლ რუპმა ისაუბრა.
ევროკომისიამ საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე 17 ივნისს დასკვნა მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.
