დედოფლისწყაროს საკრებულოს „ქართული ოცნების“ წევრმა 2 ადამიანი დაჭრა

დედოფლისწყაროს საკრებულოს ფრაქცია „ქართული ოცნების“ თავმჯდომარის მოადგილემ, გიორგი ჭინჭარაულმა ორი ახალგაზრდა დანით დაჭრა. ინციდენტი 7 ივნისს, დედოფლისწყაროს მუნიციპალიტეტის სოფელ გამარჯვებაში მოხდა. გიორგი ჭინჭარაული საკრებულოს წევრია ამ სოფლიდან.

დაჭრილები ჭინჭარაულის თანასოფლელები არიან. მათი ჯანმრთელობის მდგომარეობა მძიმეა. ისინი კატასტროფის ცენტრის ბრიგადებმა თბილისის კლინიკებში გადაიყვანეს.

თანასოფლელებს შორის დაპირისპირება გამარჯვებაში, სოფლის დღეობაზე მოხდა.

ადგილობრივი მოსახლეობის ინფორმაციით, სისხლიან გარჩევას წინ სიტყვიერი დაპირისპირება უძღოდა. 

დაჭრილი ახალგაზრდები ძმები არიან. ერთი მათგანი გულმკერდის არეშია დაჭრილი და ფილტვი აქვს დაზიანებული, მეორე კი მუცელშია დაჭრილი და ღვიძლი აქვს დაზიანებული.

შინაგან საქმეთა სამინისტროს ინფორმაციით, გიორგი ჭინჭარაული პოლიციამ ჯანმრთელობის განზრახ მძიმე დაზიანების ბრალდებით დააკავა. გამოძიებით დადგინდა, რომ 38 წლის გიორგი ჭინჭარაულმა ურთიერთშელაპარაკების ნიადაგზე, 1997 წელს დაბადებულ გ.ჭ.-ს და 1994 წელს დაბადებულ მ.ჭ.-ს ცივი იარაღით სხეულზე დაზიანებები მიაყენა. დანაშაულის ჩადენის იარაღი ამოღებულია ნივთმტკიცების სახით.

შსს-ს ცნობით, დაკავებული ჩადენილ დანაშაულს აღიარებს.

გამოძიება სისხლის სამართლის კოდექსის 117-ე მუხლის მე-7 ნაწილის „ა“ ქვეპუნქტით მიმდინარეობს, რაც გულისხმობს ჯანმრთელობის განზრახ მძიმე დაზიანებას, ჩადენილს ორი ან მეტი პირის მიმართ.

დანაშაული 9-დან 13 წლამდე თავისუფლების აღკვეთით ისჯება.