"ევროკავშირის გზაზე ერთ-ერთი პრობლემის სახელი ბიძინა ივანიშვილია" - დებატები ევროპარლამენტში საქართველოზე
დებატები ევროპარლამენტში საქართველოზე
ევროპარლამენტში საქართველოს საკითხზე დებატები გაიმართა. გამომსვლელი ევროპარლამენტარების უმეტესობა ძირითადად ბიძინა ივანიშვილს და “ქართულ ოცნებას” აკრიტიკებდა.
რა თქვეს ევროპარლამენტში:
ევროპული სამეზობლო პოლიტიკისა და გაფართოების საკითხებში ევროკომისარი ოლივერ ვარჰეი:
“ქვეყნის მასშტაბით, ქალები და კაცები გამოვიდნენ ქუჩებში და აფრიალებდნენ ევროკავშირის დროშას იმისთვის, რომ ეჩვენებინათ საქართველოს მისწრაფება ევროკავშირისაკენ. ამ დემონსტრაციების შემდეგ, მმართველმა პარტიამ გამოაცხადა, რომ გამოითხოვდა კანონს, რომლის ხმის მიცემაც შემდეგ დღეს წარიმართა, ეს ნამდვილად პოზიტიური ნიშანია და ძვირფასო წევრებო, მინდა გითხრათ, რომ ქართველებს აქვთ მომავალი ევროკავშირში.”
მან ასევე მიხეილ სააკაშვილის ჯანმრთელობის მდგომარეობაზეც ისაუბრა და აღნიშნა, რომ “საქართველოს მთავრობის ვალდებულებაა, სრულად იყოს გარანტირებული სააკაშვილის, როგორც პატიმრისა და ქვეყნის ყოფილი პრეზიდენტის უფლებები”.
● “შეიძლება ევროპა მართლაც არ არის სათქვენო” – დასავლელი პარტნიორები ღარიბაშვილის ინტერვიუს ეხმაურებიან
● ივანიშვილის ადვოკატი: რატომ იყო საჭირო ამ კანონის ინიციირებით ვნებათაღელვის გამოწვევა?
● საპროტესტო ბანერები – აგენტების წინააღმდეგ მიმდინარე დემონსტრაციებიდან
ევროპარლამენტარი ვიოლა ფონ კრამონი გამოეხმაურა “ქართული ოცნების” ანტიდასავლურ რიტორიკას, მათ შორის ღარიბაშვილის ბრალდებებს კორუფციასთან დაკავშირებით.
“არცერთ ჩვენგანს არ აქვს საქართველოს ომში ჩართვის ინტერესი. ეს ბევრჯერ გვითქვამს და არ არსებობს მსგავსი ტყუილის განმეორების საფუძველი. ეს და სხვა ბრალდებები კორუფციასთან დაკავშირებით, ცხადია, მიმართულია ევროპარლამენტის დისკრედიტაციისკენ, ჩვენი მუშაობის დელეგიტიმიზაციისკენ, მაგრამ ჩვენი ჯგუფის არც ერთ წევრს, არასდროს აუღია ფული. მსგავსი რაღაცები ერთმანეთთან არ გვაახლოებს, მთელ ამ დრამას და სპექტაკლს, რუსული კანონის, ე.წ უცხოური აგენტების კანონის გარშემო აქვს საბჭოთა სულისკვეთება და არის საბჭოთა ტიპის და ახლა ჩვენ მიმართ ბრალდებები, როგორც პერსონალური ასევე ევროკავშირის ინსტიტუტების მიმართ, არ აადვილებს მომავალ თანამშრომლობას.”
მისივე თქმით, შეუძლებელია შეუძლებელია, ქართველი ხალხის ევროპული მისწრაფება დათრგუნო წყლის ჭავლით:
“ძალადობა არის ფუჭი იმ ადამიანების წინააღმდეგ, რომლებიც იბრძვიან თავისუფლებისთვის. საქართველოს კანონმდებლობა არის წმინდა და ადამიანები უზრუნველყოფენ იმას, რომ საქართველო იქცეს ევროკავშირის ნაწილად, მაგრამ როგორც ნახეთ, მთავრობამ დააყენა ერთი ოლიგარქი და კრემლი ხალხის ნებაზე წინ, თუმცა, ქართველმა ხალხმა ქუჩაში გაიტანა საკუთარი პროტესტი და შემიძლია ვთქვა, რომ ქართველი ხალხი ნამდვილად იმსახურებს, გახდნენ ევროკავშირის წევრები, მიუხედავად იმისა, რომ მათი მთავრობა არ იმსახურებს ამას.”
ევროპარლამენტარი ანა ფოტიგა:
“მინდა გავიხსენო მოლდოვის მაგალითი, როდესაც ევროპარლამენტიდან უზარმაზარი ზეწოლა განხორციელდა და საბოლოოდ გვქონდა შედეგი – ოლიგარქი პლახოტნიუკი, რომელიც მოლდოვის შიდა სიტუაციაზე ძალიან ცუდად მოქმედებდა, პოლიტიკური სცენიდან ჩამოაშორეს. მე აბსოლუტურად დარწმუნებული ვარ, რომ იგივე დაემართება ბიძინა ივანიშვილსაც, რომელიც ახლა დაკავშირებულია საქართველოს პრორუსულ ორიენტაციასთან.“
ევროპარლამენტარმა პეტრას აუსტრევიჩუსმა ევროპარლამენტში განაცხადა, რომ თბილისზე საუბარი აღარ მოქმედებს და საჭიროა ზეწოლა მთავრობასა და ივანიშვილზე:
“ჩვენს რეზოლუციაში, რომელიც მივიღეთ 1 თვის წინ, მოვითხოვეთ ბიძინა ივანიშვილის წინააღმდეგ სანქციების დაწესება. ეს იყო ძალიან მკაფიოდ ნათქვამი, ამიტომ ახლა ეს ევროპული ინსტიტუტების მიერ არის შესასრულებელი. ეს კითხვა შესაძლოა, დავუსვათ ევროკომისიის პრეზიდენტს, ურსულა ფონ დერ ლაიენს. არის ის მზად, რომ წინ წამოწიოს ეს საკითხი? სავარაუდოდ, ჩვენ უკვე მივედით იმ წერტილთან, რომ მკაფიოდ ვთქვათ, მზად ვართ თუ არა ამისთვის.”
ანდრიუს კუბილიუსის თქმით, საქართველოს ევროკავშირის გზაზე არაერთი პრობლემაა და ერთ-ერთის სახელი ბიძინა ივანიშვილია:
“ჩვენ ვიცით, რა ძლიერია საქართველოს სურვილი, იქცეს ევროკავშირის წევრად, თუმცა დღეს არსებობს არაერთი პრობლემა ამ გზაზე და ერთ-ერთი ამ პრობლემის სახელი არის ბიძინა ივანიშვილი. თუმცა ვხედავთ, რომ უფრო და უფრო მეტი პრობლემა იქმნება მთავრობის მხრიდან ამ გზაზე, სწორედ ამიტომ არიან ჯერ კიდევ პატიმრობაში მიხეილ სააკაშვილი, ნიკა გვარამია, სწორედ ამიტომ ცდილობდა მთავრობა მიეღო კანონი უცხოელი აგენტების შესახებ, ეს არის ქართველი ხალხის ნების წინააღმდეგ გადადგმული ნაბიჯი. აუცილებელია, პოლიტიკური ცხოვრების დეპოლარიზება. ქართველ ხალხს უნდა ჰქონდეს საშუალება, დაიცვას საკუთარი ევროპული მისწრაფება, ეს არ არის ნამდვილად მთავრობის მხრიდან წამოსული უკანასკნელი პროვოკაცია.”
● გაზი, წყლის ჭავლი, დაკავებები – მასშტაბური აქცია თბილისში რუსული კანონის წინააღმდეგ. ქრონოლოგია და ბევრი ფოტო
● “ქართული ოცნება” ამბობს, რომ გაიწვევს რუსულ კანონს. თუმცა, ექსპერტები გვაფრთხილებენ, რომ განცხადება არ კმარა
17 თებერვალს ოცნების სატელიტმა “ხალხის ძალამ” პარლამენტში განსახილველად ორი კანონპროექტი დაარეგისტრირა – „უცხოური გავლენის გამჭვირვალობის შესახებ“ კანონპროექტი და მეორე – „უცხოელი აგენტების რეგისტრაციის შესახებ“.
როგორც ამას პროცედურები ითვალისწინებს, ორივე კანონპროექტი ვენეციის კომისიაშია გადაგზავნილი.
ამ ორიდან ერთი – „უცხოური გავლენის გამჭვირვალობის შესახებ“ კანონპროექტი 7 მარტს პარლამენტმა 76 ხმით 13-ის წინააღმდეგ პირველი მოსმენით მიიღო.
კანონის ინიციირებას თბილისში, რუსთაველის გამზირზე საპროტესტო აქციები მოჰყვა. კანონპროექტის მიღების შემდეგ კი პროტესტი მრავალათასიან მიტინგებში გადაიზარდა, რომელიც ხელისუფლებამ ძალის გამოყენებით დაშალა. მომიტინგეებს დაუშინეს წყლის ჭავლსა და ცრემლმდენ გაზი.
ამ კანონპროექტს როგორც საქართველოში, ისე მის ფარგლებს გარეთ ყველა, მთავრობის გარდა, რუსულ კანონს უწოდებს და ამბობს, რომ მისი მიღება ქვეყნისთვის დიდი ბარიერია ევროკავშირისკენ მიმავალ გზაზე.
საბოლოოდ, უმრავლესობამ „რუსული კანონი“ მეორე მოსმენით ჩააგდო. „ხალხის ძალის“ მიერ ინიციირებული კანონის პროექტი კენჭისყრაზე განხილვის გარეშე დააყენეს. მის წინააღმდეგ ხმა 35 დეპუტატმა მისცა, მხარი 1-მა დაუჭირა.
რუსული კანონპროექტის ერთ-ერთი ავტორი დიმიტრი ხუნდაძე ამბობს, რომ ამ კანონის არმიღებით საზოგადოებამ “ხელიდან შანსი გაუშვა”. “ქართულმა ოცნებამ” “უცხოური გავლენის გამჭვირვალობის შესახებ” რუსული კანონპროექტის გაწვევის შესახებ 9 მარტს, დილას განაცხადა.
