ბოლნისში მცხოვრები ათივე ინფიცირებული საავადმყოფოში გადაიყვანეს

ბოლნისის მუნიციპალიტეტის სოფელ მუშევანში, სადაც გუშინ ინციდენტი მოხდა და კორონავირუსით ინფიცირებულები საავადმყოფოში არ გადააყვანინეს, ადგილობრივებსა და ექიმებს შორის მოლაპარაკება შეთანხმებით დასრულდა: ათივე ინფიცირებული საავადმყოფოში გადაიყვანეს. მოლაპარაკებაში ექიმებთან ერთად ადგილობრივი ხელისუფლება და სამართალდამცავებიც იყვნენ ჩართულები. 

1 მაისის მონაცემებით, საქართველოში კორონავირუსით ინფიცირების  582 შემთხვევაა დადასტურებული. კარანტინის რეჟიმშია 5025 ადამიანი, ხოლო სტაციონარში მეთვალყურეობის ქვეშ – 540 პირი. კორონავირუსით ინფიცირებულთაგან 207 გამოჯანმრთელდა და 8  გარდაიცვალა.

ბოლნისის მაჟორიტარი დეპუტატის, გოგი მეშველიანის თქმით, 

პროტესტის მთავარი მიზეზი იყო ის, რომ “ამ ადამიანებს პრაქტიკულად არც ერთს არ ჰქონდა სიმპტომი და თავს არ მიიჩნევენ დაავადებულად.” 

როგორც მეშველიანი ამბობს, ინფიცირებულთა გადაყვანაში ეპიდემიოლოგებს ხელი ადგილობრივმა ახალგაზრდებმა შეუშალეს, რომლებიც ნასვამ მდგომარეობაში იმყოფებობდნენ. ახალგაზრდებმა სასწრაფო დახმარების მანქანებს ქვები დაუშინეს.

“დღეს ვესტუმრეთ ამ ოჯახებს, ავუხსენით დეტალური ვითარება. ისინი დაგვთანხმდნენ სამკურნალოდ მათ გადაყვანაზე. ეპიდემიოლოგები და მედიკოსები გააგრძელებენ მუშაობას –  ამ ადამიანების ყველა კონტაქტი უკვე ცნობილი და გამოკვლეულია,“ – აცხადებს მეშველიანი.

სოფელ მუშევანში, სადაც ძირითადად ეთნიკური აზერბაიჯანელები ცხოვრობენ, კორონავირუსი ათ ადამიანს გუშინ დაუდასტურდა. 

დაავადებათა კონტროლის ეროვნული ცენტრის დირექტორის, ამირან გამყრელიძის თქმით, საქართველოში covid-19-ის დადასტურებული შემთხვევების 32% ქვემო ქართლზე მოდის. 

გამყრელიძემ  აღნიშნა, რომ აუცილებელია მეტი კომუნიკაცია ეთნიკურად აზერბაიჯანელ მოსახლეობასთან და მათი დარწმუნება, რომ კორონავირუსი სურდო არ არის:

“აუცილებელია კარგი, ორენოვანი კომუნიკაცია მოსახლეობასთან, რათა დავაჯეროთ, რომ ეს არ არის ჩვეულებრივი სურდო და ალერგია. ეს არის სერიოზული კორონავირუსული ინფექცია, რომელმაც მსოფლიოში გამოვლენილი ადამიანების 7% შეიწირა.”

• ორი გვამი, გირგვლიანის საქმე, ციხის კადრები – რას ამბობს ხმაურიან საქმეებზე ვანო მერაბიშვილი
• მთავრობის ანტიკრიზისული გეგმა: ვინ რა დახმარებას მიიღებს
• საქართველო: რა ბედი ელის ტურიზმს?
• როგორ მოიხსნება შეზღუდვები – მთავრობის გეგმა
• პანდემიის ეკონომიკა – სად არის გამოსავალი კრიზისიდან? საუბარი ბესო ნამჩავაძესთან და ანდრია გვიდიანთან

დაავადებათა კონტროლის ცენტრის დირექტორის განცხადებით, ადგილობრივი მოსახლეობის ინფორმირების პროცესში უნდა ჩაერთონ როგორც რწმუნებულები, ისე რელიგიური ლიდერები და სამედიცინო საკითხებში ჩახედული ადამიანები.

მუშევანში გუშინ მომხდარ ინციდენტზე შსს-მ გამოძიება სისხლის სამართლის 187-ე მუხლით დაიწყო, რაც ნივთის დაზიანებას ან განადგურებას გულისხმობს. შსს-ს ინფორმაციით, დაზიანებულია ორი მანქანა.

მაღალი ეპიდემიოლოგიური რისკის გამო მუშევანში კარანტინი 25 აპრილს გამოცხადდა. სოფლის შესასვლელს ძალოვნები აკონტროლებენ.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.