ბაქოში პოლიციელმა მეუღლე პოლიციის განყოფილებაში მოკლა
ბაქოში, პოლიციის განყოფილებაში, პოლიციის სერჟანტმა ისმაილ მამედოვმა პირდაპირ ესროლა და მოკლა საკუთარი მეუღლე, 27 წლის ჰანიმ მამედოვა, რომელიც იქ ქმარზე საჩივრის დასაწერად მივიდა. ამ მკვლელობამ აზერბაიჯანულ საზოგადოებაში პროტესტი გამოიწვია, მაგრამ გამოჩნდნენ ისეთებიც, რომლებმაც მხარი მკვლელს დაუჭირეს.
- ფემიციდი საქართველოში: გამოცხადებული სიკვდილების ქრონიკა გრძელდება
- ბაქოში საპროტესტო აქციის მონაწილეებს პოლიციის განყოფილებაში სცემეს
- აზერბაიჯანელი კინორეჟისორი გამოვიდა მოწოდებით, “თამამად ჩაცმული ქალები გააუპატიურონ”
რა მოხდა?
30 სექტემბერს, დილის საათებში, ქალაქ ბაქოში, ნიზამის რაიონის პოლიციის №24-ე განყოფილებაში მკვლელობა მოხდა.
როგორც აზერბაიჯანის შინაგან საქმეთა სამინისტროს პრესსამსახური იტყობინება, 27 წლის ჰანიმ მამედოვა პოლიციის განყოფილებაში საკუთარ ქმარზე საჩივრის დასაწერად მივიდა. ის ქმრის მხრიდან ხშირ ცემაზე ჩიოდა. ამის შესახებ პოლიციელებმა საკუთარ კოლეგას, ახალგაზრდა ქალის მეუღლეს, სერჟანტ ისმაილ მამედოვს აცნობეს.
განყოფილებაში მისულმა ისმაილ მამედოვმა ტაბელური იარაღიდან ესროლა მეუღლეს და ადგილზე მოკლა. არსებული ინფორმაციით, მამედოვმა ქალს რვა ტყვია დაახალა.
ამის შემდეგ, ისმაილ მამედოვი სამართალდამცავ ორგანოებს ჩაბარდა. ფაქტზე გამოძიება მიმდინარეობს.
რას ამბობენ ნათესავები?
მოკლულის მამიდის, ნასიბი მამედოვას თქმით, მისი ძმისშვილის მეუღლე ყოველთვის გამოირჩეოდა ეჭვიანობით:
„მე თვითონ ბაქოში ვცხოვრობ, მაგრამ მას შემდეგ, რაც ჩემი ძმისშვილი გათხოვდა, ის არასოდეს მოსულა ჩვენთან. მისი ტელეფონის ნომერიც კი არ ვიცოდი. ისმაილი მას სახლიდან გამოსვლის უფლებას არ აძლევდა“.
ცნობილი გახდა, რომ მოკლულმა ჰანიმ მამედოვამ ბაქოს უნივერსიტეტის მათემატიკის ფაკულტეტი დაამთავრა.
„მათ ერთმანეთი მაშინ გაიცნეს, როდესაც ჰანიმი მეორე კურსზე სწავლობდა. ორი შვილი დარჩა. უფროსი უკვე სკოლაში დადის, პატარა – ბაღში“.
მედიის ცნობით, ჰანიმი 19 წლის ასაკში გათხოვდა.
საზოგადოების რეაქცია
„აზერბაიჯანში „ფასეულობების მახინჯი სისტემა“ არსებობს და როგორც საზოგადოების ნაწილი, პოლიციაც ამ სისტემის ერთგულია. კითხვას სვამენ, რატომ ესროლა პოლიციელმა ცოლს, რომელიც მასზე საჩივრის დასაწერად მივიდა? იმიტომ რომ, მას კოლეგების წინ ასეთი სირცხვილის მოთმენა არ შეეძლო. იმიტომ რომ, დარწმუნებულია, კოლეგებიც ჩვენი საზოგადოების იმავე ფასეულობების სისტემის მატარებლები არიან. მათ კანონის დამცველის აზროვნება არ აქვთ, მათ ქურდული აზროვნება აქვთ.
ავტოკრატიულმა ხელისუფლებამ იცის ამ ფასეულობების სისტემის შესახებ და პერიოდულად საკუთარი მოწინააღმდეგეების კომპრომეტირებისთვის იყენებს. ხან ინტიმური ვიდეოების, ხან კი სხვა საშუალებით. მათ შესანიშნავად იციან, რომ ადამიანები არავის დაგმობენ კორუფციის გამო, სხვა უკანონო ქმედებების გამო, მაგრამ ასეთი რამის გამო ნამდვილად დაგმობენ“, – წერს ისტორიკოსი ალთაი გიუშოვი.
„პირველი ახალი ამბავი, რომელიც დღეს დილით წავიკითხე – ქალი პოლიციის განყოფილებაში მოკლეს. წარმოდგენაც კი მიჭირს, რა დღეში აგდებდა სახლში, თუკი პოლიციის განყოფილებაში ასეთი რამის გაკეთების უფლება მისცა საკუთარ თავს. რა გადაიტანა მანამდე, სანამ პოლიციაში საჩივრის დასაწერად მივიდა?
ვუშვებ, რომ ახლა ზოგიერთ სხვა პოლიციელს, სხვა მოძალადეს ეს შემთხვევა მაგალითად მოჰყავს სახლში ცოლთან. ეუბნებიან, რომ არ არსებობს ისეთი ადგილი, სადაც ისინი წასვლას შეძლებენ, და თუკი უცებ „ნერვები უმტყუნებთ “, შეიძლება პოლიციის განყოფილებაშიც კი მოკლან.
დღევანდელი შემთხვევა – აზერბაიჯანის სამართალდამცავი სისტემის დაფარული მხარეა, დამოკიდებულება დაზარალებული ქალების მიმართ, ქვეყანაში ქალთა მიმართ ძალადობის საკითხისადმი.
და ეს აზერბაიჯანია. ქალების მკვლელობა – პოლიტიკურია“, – წერს ფემინისტი გულნარა მეჰდიევა.
მაგრამ გამოჩნდნენ ისეთებიც, რომლებმაც სოციალურ ქსელებში მხარი მკვლელს დაუჭირეს.
„კარგად მოიქცა. კიდევ რამდენიმე ასეთი შემთხვევა და შესაძლოა ქვეყანაში განქორწინებების რიცხვი შემცირდეს. ქალმა ქმარს უნდა მოუსმინოს, მისი ნებართვის გარეშე სახლიდან არ გავიდეს, მისი მოვალეობა – ბავშვების აღზრდაა“, – დაწერა სოციალური ქსელების აზერბაიჯანული სეგმენტის ერთ-ერთმა მომხმარებელმა.
და ბოლოს
ამავე დღეს, 30 სექტემბერს, ბაქოს განსაკუთრებით მძიმე დანაშაულთა სასამართლოში დასრულდა საბუნჩის რაიონის ყოფილი მოსამართლის, ფაგან აჰმედოვის საქმეზე სასამართლო პროცესი, რომელმაც ცეცხლსასროლი იარაღიდან გასროლით მოკლა მეუღლე.
სასამართლოს გადაწყვეტილებით, ფაგან აჰმედოვს 10 წლით თავისუფლების აღკვეთა და სასჯელის მკაცრი რეჟიმის კოლონიაში მოხდა მიესაჯა.
