აშურის დღე აზერბაიჯანში - მეჩეთში COVID-პასპორტით
მეორე წელია, აზერბაიჯანში აშურის დღე უჩვეულოდ აღინიშნება. 2020 წელს, მეჩეთებში შესვლა აკრძალული იყო კორონავირუსის პანდემიის გამო დაწესებული საკარანტინო ზომების გამო. წელს კი მეჩეთები გახსნილია, მაგრამ მხოლოდ მათთვის, ვისაც COVID-პასპორტები აქვთ.
- აზერბაიჯანში მუსლიმური გლოვის ნიშნად 1500 ლიტრზე მეტი სისხლი ჩააბარეს
- ჰიჯაბი და სამსახური – აზერბაიჯანში მუსლიმი ქალები დისკრიმინაციას უჩივიან
- ისლამური გლოვა აზერბაიჯანში: სისხლის ჩაბარება თვითგვემის ნაცვლად
ძველი შიიტური ტრადიციის თანახმად, მუსლიმური მუჰარამის თვის მეათე დღეს – აშურის დღეს – მორწმუნეები პატივს მიაგებენ წინასწარმეტყველი მუჰამედისა და მისი თანამოაზრეების ხსოვნას, რომლებიც მოწამებრივად დაიღუპნენ მეშვიდე საუკუნეში.
JAMnews-ის კორესპონდენტი დღეს ბაქოში, აჟდარბეის მეჩეთში იმყოფებოდა. ეს ორიდან ერთ-ერთი მთავარი მეჩეთია ბაქოში, რომლებიც საბჭოთა დროსაც კი ფუნქციონირებდნენ.
მაგრამ მეჩეთის ტერიტორიაზე მოხვედრა წელს მხოლოდ COVID-პასპორტის ქონის შემთხვევაშია შესაძლებელი. ეს ელექტრონული დოკუმენტი გადაეცემა ყველას, რომლებსაც მიღებული აქვთ კორონავირუსის საწინააღმდეგო ვაქცინის ორივე დოზა და მათ, ვინც ეს ინფექცია გადაიტანეს უკანასკნელი ექვსი თვის განმავლობაში.
მუსლიმების კავკასიის სამმართველომ, როგორც გასულ წლებში, ადამიანებს ამჯერადაც მოუწოდა აშურის დღეს დონორები გახდნენ და სისხლი ჩააბარონ სპეციალურად ამისთვის მოწყობილ პუნქტებში.
რა მოხდა VII საუკუნეში?
აშური – მუჰარამის სამგლოვიარო თვის მეათე დღე, მისი კულმინაცია, როდესაც შიიტი მუსლიმები გლოვობენ ჰუსეინს (წინასწარმეტყველი მუჰამედის შვილიშვილს) და მის თანამოაზრეებს, რომლებიც ხალიფა მუავის შვილთან, იაზიდთან ბრძოლაში დაიღუპნენ. ეს 680 წელს, ქალაქ ქერბალასთან მოხდა (მუსლიმების წმინდა ქალაქი, რომლებიც თანამედროვე ერაყის ტერიტორიაზე მდებარეობს).
ჰუსეინის დაღუპვის შემდეგ, მუსლიმური სამყარო ორ ფრთად გაიყო – შიიტებად, ჰუსეინის მომხრეებად და სუნიტებად – იაზიდის მხარდამჭერებად. ეს დაყოფა ამ დრომდე არსებობს – უამრავი ომისა და კონფლიქტის მიზეზი გახდა. შესაბამისად, აშურის დღე სამგლოვიაროდ მხოლოდ შიიტებისთვის მიიჩნევა.
მართალია სუნიტები მას ასევე აღნიშნავენ, მაგრამ სხვა მიზეზით. ყურანის თანახმად, ამ დღეს შეიქმნა ცა, დედამიწა, ანგელოზები და პირველი ადამიანი და აპოკალიფსიც ამ დღეს დადგება.
