ოცნება ანტი-ლგბტ კანონპროექტს აინიციირებს - რას მოიცავს პაკეტი
ანტი-ლგბტ კანონპროექტი
საქართველოს პარლამენტის თავმჯდომარემ, შალვა პაპუაშვილმა ლგბტ უფლებების შემზღუდველი “ოჯახური ღირებულებებისა და არასრულწლოვანების დაცვის შესახებ” კანონის პაკეტი წარადგინა, რომელსაც საპარლამენტო უმრავლესობა დღეს, 4 ივნისს დააინიციირებს.
კანონპროექტი 19 კანონისგან შედგება და სხვა საკითხებთან ერთად შეკრების თავისუფლების შეზღუდვასა და მედია ცენზურასაც ითვალისწინებს. ასევე, პაპუაშვილის თქმით, 17 მაისს, ჰომოფობიასთან და ტრანსფობიასთან ბრძოლის დღეს დაწესდება “ოჯახის სიწმინდის და მშობლების პატივისცემის დღე” და უქმე დღედ გამოცხადდება.
პარლამენტის თავმჯდომარე ამბობს, რომ ტელეეთერებიდან და კინოთეატრებიდან ლგბტ ინტიმური სცენების ამოჭრა მოუწევთ.
“ამ შემთხვევაშიც მაუწყებლებს ეხება იმ ფარგლებში მხოლოდ, რომ პირობითად, თუ ტელევიზიით გადის რამე ფილმი და თუ იქ არის ინტიმური სცენა ამ შინაარსის, ეს სცენა უნდა იყოს შეზღუდული და არ გაშვებული”, – ამბობს პაპუაშვილი.
კითხვაზე, შეეხება თუ არა ეს კინოთეატრებსაც, პაპუაშვილი ამბობს, რომ შეეხება. მისი მტკიცებით, ეს არის “ჩვეულებრივი პრაქტიკა სხვადასხვა საკითხებთან დაკავშირებით”. ასევე, აზუსტებს, რომ ცენზურა მხოლოდ კინოჩვენებას შეეხება, მაგრამ არა სხვა სახის კულტურულ ღონისძიებებს.
რას მოიცავს პაკეტი
პირველი საკითხი – ქორწინების საკითხი, როგორც იცით კონსტიტუციით 2017 წელს მოწესრიგდა ეს საკითხი, როგორც კავშირი ქალს და მამაკაცს შორის ოჯახის შექმნის მიზნით, თუმცა გვესმის სხვადასხვა საუბრები, რომ ქორწინების ალტერნატიული ფორმები იქნას შემოღებული, ამიტომ კანონით მოწესრიგდება, რომ დაუშვებელი იქნება ქორწინების ალტერნატიული კავშირის რეგისტრირება.
მეორე საკითხი – შვილად აყვანის საკითხი. აქაც დაუშვებელი იქნება იმ ადამიანების მიერ არასრულწლოვანის შვილად აყვანა, ვინც თავის თავს თავისი სქესისგან განსხვავებულ სქესს მიაკუთვნებენ ან არ არიან ჰეტეროსექსუალი ადამიანები, მათ შორის მარტოხელა ადამიანებზეც.
მესამე საკითხი – სქესის შეცვლის ოპერაცია. აკრძალული იქნება პირისათვის სქესის შეცვლის მიზნით ქირურგიული ოპერაციის ჩატარება ან სხვა სახის სამედიცინო მანიპულაციის გამოყენება.
მეოთხე საკითხი – აკრძალული იქნება სახელმწიფოს მიერ გაცემულ დოკუმენტებში ადამიანის თავისი სქესისგან განსხვავებული სქესის მითითება.
მეხუთე საკითხი – დაუშვებელი იქნება საგანმანათლებლო დაწესებულებაში ლგბტ პროპაგანდის წარმოება, ისეთი ინფორმაციის გავრცელების ხელშეწყობა, რომელიც მიმართულია ადამიანის თავისი სქესისგან განსხვავებული სქესისთვის მიკუთვნების, ერთი და იმავე სქესის წარმომადგენლებს შორის ურთიერთობის ან ინცესტის პოპულარიზაციისკენ.
მეექვსე საკითხი – ინფორმაციის გავრცელების საკითხი. დაუშვებელი იქნება მაუწყებლის მიერ ისეთი ინფორმაციის გავრცელება, რომელიც მიმართულია ადამიანის თავისი სქესისგან განსხვავებული სქესისთვის მიკუთვნების, ერთი და იმავე სქესის წარმომადგენლებს შორის ურთიერთობის ან ინცესტის პოპულარიზაციისკენ, მნიშვნელოვანია აქ ის დათქმა, რომ ეს აკრძალვა მოქმედებს მხოლოდ იმ ფარგლებში, რომ არ იქნეს დაშვებული ერთი და იმავე სქესის წარმომადგენლებს შორის ინტიმური ურთიერთობის ამსახველი სცენის ან ინცესტის სცენის მაუწყებლის ეთერით გავრცელება, ასევე აკრძალული იქნება იმავე შინაარსის რეკლამა.
მეშვიდე საკითხი – შეკრების და მანიფესტაციის საკითხი. დაუშვებელი იქნება საჯარო შეკრება ან მანიფესტაცია, რომელიც მიმართული არის ადამიანის თავისი სქესისგან განსხვავებული სქესისთვის მიკუთვნების, ერთი და იმავე სქესის ადამიანებს შორის ურთიერთობის ან ინცესტის პოპულარიზაციისკენ.
მერვე საკითხი – შრომითი ურთიერთობების საკითხი. ბათილი იქნება შრომითი ურთიერთობის ფარგლებში ისეთი ვალდებულება, რომელიც მიმართულია ბიოლოგიური საკითხის უგულებელყოფისკენ.
“ეს არის ის 8 საკითხი, რომელიც მოწესრიგებული იქნება ამ 19 კანონის მეშვეობით, გარდა ამისა, თავად ძირითად კანონში [ოჯახურ ღირებულებათა და არასრულწლოვანთა დაცვის შესახებ] და შრომის კოდექსში, 17 მაისი დაწესდება ოჯახის სიწმინდის და მშობლების პატივისცემის დღედ და გამოცხადდება უქმე დღედ”. – თქვა პაპუაშვილმა.
● პაატა ზაქარეიშვილის კომენტარი: ლგბტ პროპაგანდის შესახებ საუბარი არის ისეთივე ბოდვა, როგორიც იყოს ის, რომ ვიღაც ომში გვრთავდა
● როგორ იბრძვის ლგბტქ თემი საკუთარი უფლებებისთვის საქართველოში და რას მიაღწია?
როდის მოხდება კანონის მიღება
საკონსტიტუციო ცვლილებების მისაღებად ოცნებას პარლამენტში საკონსტიტუციო უმრავლესობა სჭირდება, რაც არ აქვთ. შალვა პაპუაშვილის თქმით, სწორედ ამიტომ გადაწყვიტეს ამ ეტაპზე კანონის მიღება, რისთვის საკმარისი უმრავლესობა აქვთ. რაც შეეხება საკონსტიტუციო ცვლილებს, მას არჩევნების შემდეგ, პარლამენტში საკონსტიტუციო უმრავლესობის მოპოვების შემთხვევაში გეგმავენ.
პარლამენტის თავმჯდომარე ხაზს უსვამს, რომ საგაზაფხულო სესიის განმავლობაში ამ კანონპროექტს პირველი მოსმენით განიხილავენ და მიიღებენ, ხოლო საშემოდგომო სესიაზე მესამე მოსმენით. მისივე განმარტებით, ცვლილებები შედის სხვადასხვა კანონში, სამოქალაქო კოდექსში, შრომის კოდექსში, განათლების შესახებ კანონმდებლობაში და ა.შ.
“ჩვენ თავიდანვე ვთქვით, რომ კონსტიტუციურ კანონპროექტთან ერთად იქნება დაინიცირებული პაკეტი კანონებისა, რომელიც უკვე პრაქტიკულად, მოაწესრიგებს ლგბტ პროპაგანდის საკითხს.
სხვათა შორის, საყოველთაო სახალხო განხილვის პროცესშიც იყო ამ საკითხთან დაკავშირებით ჩვენი მოქალაქეების მხრიდან კითხვები, თუ რა ხდება თავად მოწესრიგების მხრივ კანონების დონეზე და ჩვენ ზუსტად ამაზე იყო საუბარი, რომ საკონსტიტუციო ცვლილებას რაც შეეხება, აქ დამოკიდებულები ვართ ოპოზიციაზე, არ ვიცით რამდენად წარმატებული იქნება ამ მოწვევის პარლამენტში კონსტიტუციის ცვლილება და კონსტიტუციური პროექტის კანონის მიღება.
ამიტომაც ჩვენ გვჭირდება კონსტიტუციური უმრავლესობა მომავალ პარლამენტში, რომ ეს ცვლილებებიც მივიღოთ, თუმცა კანონის მისაღებად ჩვენ გვაქვს საკმარისი უმრავლესობა და ესეც იყო ჩვენი დაპირება ჩვენი მოქალაქეების მიმართ, რომ ამ პაკეტს აუცილებლად დავაინიციირებდით.” – ამბობს შალვა პაპუაშვილი.
