ანდრეი კასიანოვი: უკრაინამ საქართველოს 2008 წელს გადაცემული ბუკის სისტემების დაბრუნება სთხოვა, რაზეც უარი მიიღო

ანდრეი კასიანოვი 2008 წელს გადაცემულ ბუკის სისტემებზე

უკრაინის ელჩის მოვალეობის შემსრულებლის, ანდრეი კასიანოვის თქმით, უკრაინის ხელისუფლებამ საქართველოს “ბუკის” ტიპის საზენიტო სარაკეტო სისტემების დაბრუნება სთხოვა, რომელიც უკრაინამ საქართველოს 2008 წლის ომის დროს გადასცა, თუმცა კატეგორიული უარი მიიღო. ამის შესახებ კასიანოვი Європейська правда-სთვის დაწერილ სტატიაში საუბრობს. სტატიის სახელწოდებაა “როგორ ეხმარება საქართველო უკრაინას და სად რჩება პრობლემები.”

კასიანოვი წერს, რომ უკრაინის თხოვნა ასევე მოიცავდა აშშ-ს მიერ საქართველოსთვის გადაცემულ ჯაველინის ტანკსაწინააღმდეგო კომპლექსების გადაცემასაც. დიპლომატის თქმით, ეს უკანასკნელი შეთანხმებული იყო არა მხოლოდ აშშ-სთან, არამედ არსებობდა წინადადებაც კი, რომ ისინი ახალი კომპლექსებით ჩაენაცვლებინათ.

“უკრაინული მხარე თანმიმდევრულია ყველა საერთაშორისო პარტნიორის, მათ შორის საქართველოს მიმართ, იარაღის, სამხედრო ტექნიკისა და საბრძოლო მასალის მიწოდების თხოვნის თვალსაზრისით. ასევე, გულწრფელად გამოაცხადა უკრაინამ იარაღის სასიცოცხლო საჭიროება რუსეთის ფედერაციის ფართომასშტაბიანი შეჭრის დაწყებისთანავე”,- აღნიშნულია კასიანოვის სტატიაში. 

უკრაინის ელჩის მოვალეობის შემსრულებლის განმარტებით, მიუხედავად იმისა, რომ საქართველოს მთავრობამ კატეგორიული უარი თქვა სამხედრო დახმარებაზე, “უკრაინა ეწინააღმდეგება ამ საკითხის შიდა პოლიტიკურ დავებში გამოყენებას და უარყოფს ნებისმიერ ბრალდებას რუსეთთან ომში საქართველოს ჩაბმის მცდელობის შესახებ.”

კასიანოვი სტატიაში ასევე საუბრობს ექსპრეზიდენტ მიხეილ სააკაშვილის ჯანმრთელობის მდგომარეობაზეც და საქართველოს ხელისუფლებას დაჟინებით მოუწოდებს, “გამოავლინოს მოწყალება და გადაიყვანოს” ევროპის ან აშშ-ს კლინიკაში სამკურნალოდ.

კასიანოვის სტატიას გამოეხმაურა “ქართული ოცნების” დეპუტატი, გიორგი ვოლსკი. მისი თქმით, კასიანოვი თავის მოქმედებებში არაადეკვატურია.

“არა მარტი იარაღის გადაცემაზე, არამედ მოხალისეების ორგანიზებულ გაგზავნაზე იყო მოთხოვნა. თვითმფრინავების კი გამოაგზავნეს, ჩარტერული რეისები უკრაინიდან და ამას არ დავთანხმდით, ვინაიდან ეს ომში ჩართვის [ტოლფასი] იქნებოდა.” – ამბობს ვოლსკი. 

● საქართველო-უკრაინის სავაჭრო ბრუნვა 463 მილიონი დოლარია
● რობერტ ჰამილტონი: უკვე ტრაგიკულია, რომ რომ კონგრესში საქართველოს დახმარების გადახედვას განიხილავენ
● ოლექსი არესტოვიჩი: რუსული ოკუპაციის მიუხედავად, საქართველოს ხელისუფლებას აბსოლუტურად პრორუსული კურსი აქვს

უკრაინის მიმართ საქართველოს ხელისუფლების მსგავსი დამოკიდებულება პირველი არ არის. 6 დეკემბერს “ქართული ოცნების” აღმასრულებელმა მდივანმა მამუკა მდინარაძემ განაცხადა, რომ “ომის პარტიის” წევრები [იგულისხმება “ნაციონალური მოძრაობა”] სოფელ-სოფელ დადიან და ეძებენ ადამიანებს, ვინ წაიყვანონ უკრაინაში და “რომანტიზება როგორ მოახდინონ ამ ამბების.”

საქართველოს პრემიერმინისტრმა ირაკლი ღარიბაშვილმა 5 დეკემბრის მთავრობის სხდომაზე ბახმუტში დაღუპული ქართველი მეომრების ოჯახებს მიუსამძიმრა და კვლავ “ომის პარტიაზე” [“ნაციონალურ მოძრაობაზე”} ისაუბრა. მისი თქმით, ქართველი მებრძოლები უკრაინაში “ომის პარტიას” მიჰყავს.

პრემიერის ამ განცხადებას საზოგადოებაში მწვავე რეაქცია მოჰყვა. მის სიტყვებს გამოეხმაურნენ როგორც პოლიტიკოსები და მწერლები, ასევე უკრაინაში მებრძოლი ქართველები და ბახმუტში დაღუპული ჯამბულატ ხოფერიას მამა.

18 ნოემბერს, პარლამენტში გამოსვლისას პრემიერმა კვლავ გაიმეორა, რომ მას სთხოვდნენ [ოპოზიცია], რომ საქართველოს მიეღო ჩარტერული თვითმფრინავები და აქედან გაეგზავნათ მოხალისეები საბრძოლველად. ღარიბაშვილის თქმით, ეს იყო პირდაპირ ომში ჩართვის მცდელობა და “გათვლილი იყო იმაზე, რომ რუსეთს შესაბამისი რეაქცია ექნებოდა და გაიხსნებოდა მეორე ფრონტი, როგორც ეს მათ უკრაინელ პარტნიორებთან ერთად დააანონსეს.”

“ეს ადამიანები [ნაციონალური მოძრაობა] რომ დღეს ხელისუფლებაში ყოფილიყვნენ… პოლიგონად გადააქცევდნენ ჩვენს ქვეყანას.” – თქვა ღარიბაშვილმა.