"ამორალური" პოზიცია - ზელენსკიმ საქართველოდან ელჩი გაიწვია

ზელენსკიმ საქართველოდან ელჩი გაიწვია

უკრაინის პრეზიდენტმა ვოლოდიმირ ზელენსკიმ საქართველოდან ელჩი კონსულტაციებისთვის გაიწვია. მისი თქმით, ამ გადაწყვეტილების მიზეზი უკრაინის ომთან დაკავშირებით საქართველოს ხელისუფლების პოზიციაა.

„ჩვენ სასწრაფოდ ვიწვევთ ელჩს საქართველოდან იმ მოხალისეებისთვის ხელის შეშლის გამო, რომლებსაც ჩვენი დახმარება სურთ, ამორალური პოზიციისთვის სანქციებთან დაკავშირებით“, – განაცხადა ზელენსკიმ.

რატომ ვერ გაფრინდნენ მოხალისეები?

28 თებერვალს მოხალისეთა ჯგუფმა, უკრაინის საელჩოს დახმარებით, ჩარტერული რეისით თბილისიდან პოლონეთის მიმართულებით გაფრენა სცადა.

თუმცა, თვითმფრინავი, რომელსაც მოხალისეები უნდა წაეყვანა, გაურკვეველი მიზეზების გამო, საქართველოში არ შემოუშვეს.

1 მარტს მმართველი „ქართული ოცნების“ ლიდერმა, ირაკლი კობახიძემ განაცხადა, რომ მოხალისეების გაგზავნა ომში მონაწილეობას ნიშნავს, რასაც ხელისუფლება არ გააკეთებს. მან ოპოზიცია საქართველოს კონფლიქტში ჩართვის მცდელობაში დაადანაშაულა.

„ აქ საუბარია სამხედრო ძალის გაგზავნაზე, ეს ყველაფერი ადასტურებს ერთადერთ რამეს, ერთადერთი მიზანი რაც აქვს ანტისახელმწიფოებრივ ძალას, რასაც ჰქვია “ნაციონალური მოძრაობა” თავისი დანამატებით, არის ის, რომ საქართველო როგორმე ჩართონ ომში. საუბარი იყო სამხედრო კონფლიქტში სამხედრო ძალის გაგზავნაზე. მოხალისეები არ არიან სამხედრო ძალა? ზელენსკიმ სთხოვა დასავლეთს, რომ ჩართულიყვნენ სამხედრო კონფლიქტში, გვახსოვს არაერთი საყვედურიც, მაგრამ არ ჩაერთო დასავლეთი,”- განაცხადა კობახიძემ.“, – განაცხადა კობახიძემ.

• როგორ იმოქმედებს ღარიბაშვილის განცხადებები დასავლეთზე. ექსპერტების შეფასებები
• ირაკლი ღარიბაშვილი: ომის შემჩერებელი არავინაა, სანქციები არაა ეფექტური

უარი სანქციების შემოღებაზე

გარდა ამისა, საქართველოს მთავრობამ უარი თქვა რუსეთის წინააღმდეგ რაიმე სახის სანქციების დაწესებაზე. ამის შესახებ საქართველოს პრემიერმინისტრმა ირაკლი ღარიბაშვილმა 28 თებერვალს მთავრობის სხდომაზე გამოსვლისას განაცხადა.

“და ვთქვათ პირდაპირ, რომ სანქციები არ არის ეფექტური საშუალება. და ისიც ვთქვათ, რომ დღეს უკრაინაში ვინ ომობს? ომობს უკრაინელი ჯარისკაცი, უკრაინის ჯარი.

ჩვენ კარგად უნდა გვახსოვდეს, რომ ქვეყანა და მთელი მსოფლიო არის ძალიან დიდი გამოწვევების წინაშე. ამ სიტუაციაში ყოველგვარი ემოცია, ყოველგვარი გაუთვლელი ნაბიჯები, სიტყვა, ქმედება არის ძალიან დიდი რისკის შემცველი“, – განაცხადა ღარიბაშვილმა.

პირველი რეაქცია

“საქართველო “ხელისუფლება” ოფიციალურად ჩაეწერა რუსულ ბანაკში. მიზეზი ორია: პუტინის შიში და მიშას შიში. ანუ, ძალაუფლების დაკარგვის შიში. აუცილებლად დაკარგავენ. თან ისე, რომ პოლიტიკაში დარჩენის შანსიც აღარ ექნებათ”, – წერს ფეისბუქზე ილიას უნივერსიტეტის პროფესორი დავით დარჩიაშვილი.

თუმცა, ამ ოპტიმიზმს ყველა არ იზიარებს.

„რუსეთი რომ შემოვა და გადაგვჯეგავს, არავინ გვეყოლება დამტირებელი მთელ მსოფლიოში. ახლა არ თქვათ რატომო, ხომ რუსეთის ვიქნებითო, რატომ გადაგვჯეგავსო. აი ეგრე, ეგეთი ხოში ექნება და იმიტომ“, – წერს ერთ-ერთი მომხმარებელი.

„ასე ვასრულებთ 33 წლიან ომს რუსეთთან? ასე დავივიწყოთ 9 აპრილი? 8 აგვისტო? იმიტომ რომ ვიღასაც ვიღაცის გვერდით დადგომა უტყდება მიტინგზე? მე არავის გვერდით დგომა არ მიტყდება, დაე გამომიყენოს ნებისმიერმა პოლიტიკურმა ძალამ, ვინც რუსეთისკენ არ წამათრევს“, – წერს კიდევ ერთი მომხმარებელი.

ოპოზიციონერები და მოქალაქეები სოციალურ ქსელების მეშვეობით 19:00 საათზე პარლამენტის შენობის წინ საპროტესტო აქციისკენ მოუწოდებენ.

რუსეთმა უკრაინაში შეჭრა 2022 წლის 24 თებერვალს დაიწყო. უკვე რამდენიმე დღეა მძიმე ბრძოლები მიმდინარეობს უკრაინის დედაქალაქ კიევისთვის, ასევე ქვეყნის მრავალ ქალაქში. რუსეთის ხელისუფლება აცხადებს, რომ შემოჭრის მიზანია ხელისუფლების შეცვლა, უკრაინის „დემილიტარიზაცია და დენაციფიკაცია“.

დასავლეთის ქვეყნებმა განაცხადეს, რომ რუსეთმა მოახდინა არაპროვოცირებული შეჭრა დამოუკიდებელ ქვეყანაში და დააწესეს ახალი სანქციები რუსეთის წინააღმდეგ, ასევე უკრაინას დახმარებას უწევენ იარაღით და ჰუმანიტარული დახმარებით.