საქართველოს მთავრობა წინასაარჩევნოდ ამნისტიის კანონის მიღებას გეგმავს

ამნისტიის კანონი საქართველოში

საქართველოს მთავრობა წინასაარჩევნოდ ამნისტიის კანონის მიღებას გეგმავს. ამის შესახებ პრემიერმინისტრმა ირაკლი კობახიძემ პარლამენტში მოხსენებისას განაცხადა. როგორც კობახიძე ამბობს, ამნისტიის კანონს სექტემბერში, საპარლამენტო არჩევნებამდე 1 თვით ადრე მიიღებენ.

ირაკლი კობახიძის განმარტებით, დღეს საქართველოში 10 ათასამდე პატიმარია სასჯელაღსრულების დაწესებულებებში და მნიშვნელოვანია, რომ “მნიშვნელოვნად შემცირდეს” მათი რაოდენობა. კობახიძეს კითხვა ამნისტიის შესახებ „გირჩის“ წევრმა ჰერმან საბომ დაუსვა.

“უკვე არის შედგენილი შესაბამისი მუხლების, პუნქტების სია საქართველოს სისხლის სამართლის კოდექსიდან, რომელიც შესაძლოა, უკავშირდებოდეს ამნისტიის წესით პირთა გათავისუფლებას. ჩვენ დაგეგმილი გვაქვს, რომ უახლოეს დღეებში დავაინიციიროთ შესაბამისი კანონპროექტი. ჩვენ, ალბათ, ივლისში რიგგარეშე სესიაზე საუბარი მოგვიწევს, სადაც საკითხები იქნება განსახილველი. ივლისში შესაძლებელი იქნება პირველი მოსმენით ამ კანონპროექტის მიღება ისე, რომ სექტემბერში სამი მოსმენით დასრულდეს ამნისტიის კანონის მიღება.“ – განაცხადა ირაკლი კობახიძემ.

ოპოზიციის ნაწილმა პარლამენტში მასშტაბური ამნისტიის კანონპროექტი შეიტანა. შეეხება თუ არა ის სააკაშვილს?

შალვა პაპუაშვილი პირდაპირ ამბობს, რომ ყოფილი პრეზიდენტის ამნისტირება უნდა “დაივიწყონ”

ოპოზიციის ნაწილმა პარლამენტში ამნისტიის შესახებ კანონპროექტი 28 თებერვალს შეიტანა. კანონპროექტის ავტორია პარტია “გირჩი”, ხოლო პროექტის თანაავტორები არიან: “ნაციონალური მოძრაობა”, “სტრატეგია აღმაშენებელი”, “ევროპელი სოციალისტები”, ალეკო ელისაშვილი, ხატია დეკანოიძე და ტარიელ ნაკაიძე.

აღნიშნული კანონპროექტის მიღების შემთხვევაში, სასჯელი თითქმის ყველა პატიმარს შეუმცირდება გარდა იმ პირებისა, რომლებიც არასრულწლოვანთა წინააღმდეგ ჩადენილ დანაშაულში არიან მსჯავრდადებულნი.

“გირჩის” ლიდერი იაგო ხვიჩია ამბობს, რომ აღნიშნული ამნისტია მათ შორის მიხეილ სააკაშვილს შეეხება. თუმცა პარლამენტის თავმჯდომარე შალვა პაპუაშვილი პირდაპირ ამბობს, რომ ყოფილი პრეზიდენტის ამნისტირება უნდა “დაივიწყონ.”

ექსპრემიერ გიორგი გახარიას პარტიასაც დაუშვებლად მიაჩნია, რომ სამოხელეო დანაშაულისთვის მსჯავრდადებულებს ამნისტიის კანონპროექტით პასუხისმგებლობა მოეხსნათ. პარტია “საქართველოსთვის” წევრი ალექსანდრე მოწერელია ამბობს, რომ “თუ გადავხედავთ” ისტორიას და დღევანდელი დღით შევაფასებთ, “ჩვენთვის მიუღებელია” სამოხელეო დანაშაულებზე დათმობებზე წასვლა.

პარლამენტში შესული კანონპროექტის თანახმად:

• მძიმე და განსაკუთრებით მძიმე დანაშაულზე სასჯელი უნდა შემცირდეს 1/4-ით.
• ნაკლებად მძიმე დანაშაულზე – განახევრდეს.
• ნარკოტიკულ და სამოხელეოზე – განახევრდეს.
• უვადო პატიმრობა გადაკვალიფიცირდეს 30 წლით.

განმარტებით ბარათში ვკითხულობთ, რომ დღეს საქართველო ევროპაში პატიმრების რაოდენობით “მოწინავეა”, ხოლო სისხლის სამართლის კოდექსი უფრო “რეპრესიულია, ვიდრე საბჭოთა კანონმდებლობა”.