"ალიანსმა გააძლიერა პარტნიორობა საქართველოსთან" - NATO-ს საგარეო მინისტრების შეხვედრა ბუქარესტში

NATO-ს საგარეო მინისტრების შეხვედრა ბუქარესტში

29 ნოემბერს, ბუქარესტში, NATO-ს საგარეო საქმეთა მინისტრების შეხვედრის დაწყებამდე NATO-ს გენერალურმა მდივანმა იენს სტოლტენბერგმა განაცხადა, რომ ბუქარესტის წინა სამიტზე [რომელიც 14 წლის წინ – 2008 წელს გაიმართა] მიღებული გადაწყვეტილების შემდეგ ალიანსმა გააძლიერა პარტნიორობა როგორც საქართველოსთან, ასევე უკრაინასთან.

“მაშინ [2008 წელს] მეც ვიმყოფებოდი [სამიტზე], ნორვეგიის პრემიერმინისტრის რანგში. ეს შეხვედრა ძალიან კარგად მახსოვს. მოხარული ვარ, რომ მას შემდეგ გავაძლიერეთ პარტნიორობა საქართველოსთანაც და უკრაინასთანაც. ველი საგარეო საქმეთა მინისტრებისგან იმის გამეორებას, რომ NATO-ს კარი ღია რჩება. ჩვენ მოვახდინეთ იმის დემონსტრირება, რომ ბუქარესტის სამიტზე მიღებულ გადაწყვეტილებას ვასრულებთ არა მხოლოდ სიტყვიერად, არამედ საქმითაც“, – თქვა სტოლტენბერგმა.

2008 წლის 2-3 აპრილს, ქ. ბუქარესტში, ნატოს სამიტი გაიმართა. სამიტის დასრულების შემდეგ საქართველოს მაშინდელმა საგარეო საქმეთა მინისტრმა დავით ბაქრაძემ უცხოელი და ქართველი ჟურნალისტებისთვის ბრიფინგი გამართა და აღნიშნა, რომ საქართველომ და უკრაინამ გაწევრიანების სამოქმედო გეგმა (MAP) ვერ მიიღო, მაგრამ, ამავე დროს, ჩრდილოატლანტიკური ალიანსის სრული შემადგენლობისგან მიიღო გაცილებით მეტი – მტკიცე პირობა, რომ საქართველო ნატოში უნდა გაწევრიანდეს და ეს ჩანაწერი არის ძლიერი და ღია ვალდებულება ალიანსისთვის.

29 ნომბერს ბუქარესტში ბალკანეთისა და შავი ზღვის რეგიონის ქვეყნების მხარდაჭერის საკითხზე გამართულ შეხვედრას აშშ-ის სახელმწიფო მდივანი, ენტონი ბლინკენიც ესწრებოდა. როგორც მან განმარტა, გარდა ალიანსისა, შავი ზღვის რეგიონს სტრატეგიული და სასიცოცხლო მნიშვნელობა აქვს შეერთებული შტატებისთვისაც. ბლინკენის თქმით, უკრაინაში რუსეთის აგრესიის ფონზე, აშშ გააძლიერებს NATO-ს ყოფნას შავი ზღვიდან ბალტიის ზღვამდე.

“შავი ზღვის რეგიონს სტრატეგიული და სასიცოცხლო მნიშვნელობა აქვს ჩვენთვის და NATO-თვის. ამ რეგიონში ჩვენ გვყავს სამი მოკავშირე და ასევე ორი მჭიდრო პარტნიორი: საქართველო და უკრაინა. შავი ზღვის გარკვეული რაიონები რუსეთმა საომარ ზონად აქცია. ვხედავთ გემებიდან გაშვებულ რაკეტებს უკრაინული ქალაქების მიმართულებით. ასევე რუსეთის მიერ უკრაინული პორტების ბლოკირებას, რამაც გამოიწვია ყველაზე სერიოზული – სასურსათო კრიზისი. ჩვენ გავაძლიერებთ NATO-ს ყოფნას შავი ზღვიდან ბალტიის ზღვამდე. შავი ზღვის რეგიონი NATO-ს თავდაცვისა და სტრატეგიის კრიტიკულად მნიშვნელოვანი კომპონენტია“, – თქვა სახელმწიფო მდივანმა.

● ახალ დოკუმენტში ევროკავშირი საქართველო-უკრაინა-მოლდოვას რეფორმებისკენ მოუწოდებს
● “კატასტროფაა”, “ჩვენთვის უინტერესოა” – როგორ გამოეხმაურა ოპოზიცია და მმართველი პარტია აშშ-ის სენატის სხდომას
● საქართველო თურქეთისგან NATO-ს სტანდარტების ჯავშანმანქანებს მიიღებს

ბუქარესტში გამართული შეხვედრის შემდეგ, NATO-ს საგარეო საქმეთა მინისტრებმა ერთობლივი განცხადება გაავრცელეს, სადაც საქართველოს მხარდაჭერაზეც არის საუბარი და აღნიშნულია, რომ საგარეო საქმეთა მინისტრები ერთგულები არიან ალიანსის ღია კარის პოლიტიკისადმი.

“დასავლეთ ბალკანეთის და შავი ზღვის რეგიონებს სტრატეგიული მნიშვნელობა აქვს ალიანსისთვის. მივესალმებით ჩვენს შეხვედრას NATO-ს პარტნიორების, ბოსნია და ჰერცეგოვინას, საქართველოსა და მოლდოვას რესპუბლიკის საგარეო საქმეთა მინისტრებთან, რადგანაც NATO აძლიერებს მორგებულ მხარდაჭერას მათი მთლიანობისა და გამძლეობის შესაქმნელად, შესაძლებლობების განვითარებისა და მათი პოლიტიკური დამოუკიდებლობის დასაცავად. მტკიცედ ერთგული ვართ ალიანსის ღია კარის პოლიტიკისადმი. ვადასტურებთ ჩვენს გადაწყვეტილებებს, რომლებიც მივიღეთ 2008 წლის ბუქარესტის სამიტზე და ყველა შემდგომ გადაწყვეტილებას საქართველოსა და უკრაინის მიმართ.” – აღნიშნულია განცხადებაში.