აფხაზეთში USAID-ის დაფინანსებული პროექტები აიკრძალა
USAID-ის დაფინანსებული პროექტები
აშშ-ის საერთაშორისო განვითარების სააგენტოს (USAID) პროექტები აფხაზეთში აიკრძალა, USAID-ის მისიის ხელმძღვანელი სამხრეთ კავკასიაში ჯონ პენელი კი აფხაზეთში პერსონა ნონ გრატად გამოცხადდა. გარდა ამისა, სოხუმი კრძალავს იმ პროექტების განხორციელებას, რომლებიც მიმართულია აფხაზეთისა და საქართველოს მოქალაქეებს შორის კონტაქტების დამყარებისკენ.
აფხაზეთის ე.წ. საგარეო საქმეთა მინისტრმა ინალ არძინბამ სპეციალურ განცხადებაში განმარტა, რომ საგარეო საქმეთა სამინისტრო არ დაუშვებს ახალ პროექტებს, რომლებიც ნაწილობრივ ან სრულად დაფინანსებულია USAID-ის მიერ.
ეს გასაკვირი არ ყოფილა. ჯერ კიდევ ნოემბრის დასაწყისში არძინბამ, რომელიც ორი წლის წინ თანამდებობის დაკავების შემდეგ მუდმივად ემხრობოდა საერთაშორისო არასამთავრობო ორგანიზაციების საქმიანობის შეზღუდვას, სურვილები სისრულეში მოიყვანა.
- საერთაშორისო ორგანიზაციები აფხაზეთში უფრო მკაცრი წესებით იმუშავებენ, მაგრამ არ დაიხურებიან
- აფხაზეთის საგარეო საქმეთა მინისტრი რუსეთთან დაახლოების კამპანიას ეწევა
აკრძალვის შემოღების მიზეზი გახდა გაეროს განვითარების პროგრამის „პარტნიორობა მდგრადობისთვის“ პროექტი, რომლის დონორია USAID და რომელიც დასამტკიცებლად წარედგინა აფხაზეთის საგარეო საქმეთა სამინისტროს.
ინალ არძინბას თქმით, ამ პროექტს, რომლის ბიუჯეტი 8 მილიონი დოლარია, აქვს „მიზანმიმართულად ბუნდოვანი განცხადებები მიზნებისა და ამოცანების შესახებ“.
“აფხაზეთის რესპუბლიკის საგარეო საქმეთა სამინისტრომ მიიღო ბლანკი გაეროს განვითარების პროგრამის “პარტნიორობა მდგრადობისთვის” პროექტისგან აფხაზეთის საგარეო საქმეთა სამინისტროსთან კოორდინაციისთვის. ამ პროექტის დონორია USAID. პროექტის ბიუჯეტი 8 მილიონი აშშ დოლარია. ბლანკი შეიცავდა, როგორც აღმოჩნდა, ამ პროექტის მიზნებისა და ამოცანების მიზანმიმართულად ბუნდოვან ფორმულირებებს. ამ პროექტის პრაქტიკული განხორციელების დროს გამოიკვეთა დიალოგის პლატფორმების შექმნა ონლაინ და ოფლაინ ფორმატებში, რათა დამყარებულიყო პირდაპირი კონტაქტი აფხაზეთის რესპუბლიკის მოქალაქეებსა და საქართველოს მოქალაქეებს შორის, მათ შორის ლტოლვილებს შორის”, – თქვა ანძიბამ.
თუმცა, აფხაზეთის საგარეო საქმეთა სამინისტროს მიერ შემოღებული აკრძალვები არა მხოლოდ USAID-ს შეეხება.
ასევე აკრძალულია:
- პროექტების განხორციელება, რომლის მიზანია კონტაქტების დამყარება აფხაზეთისა და საქართველოს მოქალაქეებს შორის
- პროექტები ბუნდოვანი და არაზუსტი ინფორმაციით
- მედია პროექტების დაფინანსება, რომელთა მიზანია აფხაზეთის საშინაო და საგარეო პოლიტიკის საკითხების გაშუქება.
და ბოლოს, საერთაშორისო ორგანიზაციებს და გაეროს სააგენტოებს მოუწევთ აფხაზეთის საგარეო საქმეთა სამინისტროსთან კოორდინაცია გაუწიონ აფხაზური არასამთავრობო ორგანიზაციების ინიციატივებისთვის თანხების გამოყოფას.
აღსანიშნავია, რომ რამდენიმე დღის წინ RT-ის რედაქტორი და რუსი პროპაგანდისტი მარგარიტა სიმონიანი აფხაზ სტუდენტებს შეხვდა, სადაც USAID-ს საქმიანობა გააკრიტიკა. მისი მტკიცებით, ასეთი ორგანიზაციები, “თავიანთ პოლიტიკასა და ღირებულებებს ახორციელებენ”, “ცვლიან ქვეყნების კულტურულ კოდს“, ართმევენ მათ დამოუკიდებლობას.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
