აფხაზეთში ოპოზიციური მიტინგის მონაწილეები დააკავეს

ოპოზიციონერების დაკავება აფხაზეთში 

აფხაზეთში ხუთი ოპოზიციონერი დააკავეს საპროტესტო აქციაში მონაწილეობისა და ხელისუფლების წარმომადგენლებთან შეტაკებების გამო. რესპუბლიკის თანამედროვე ისტორიაში აქამდე მსგავსი რამ არ მომხდარა. ოპოზიცია ხელისუფლებას კანონის შერჩევითად გამოყენებაში ადანაშაულებს – მოქმედი პრეზიდენტი ასლან ბჟანია ხელისუფლებაში მასობრივი აქციებისა და სამთავრობო შენობების შტურმის შედეგად მოვიდა. 

სოხუმის პროკურატურა ოპოზიციის რიგით აქტივისტებს, რამაზ ჯოპუას, ჭიჭე ინაპშბას, ბესლან ცვიჟბას, ბელან მიშელიასა და ასლან ტანიას ბრალს სდებს „მასობრივ არეულობებში მონაწილეობასა და ხელისუფლების წარმომადგენლების წინააღმდეგ ძალადობაში, რასაც ადგილი ჰქონდა გასული წლის 21 დეკემბერს სამთავრობო შენობების კომპლექსთან“. 

• მოსაზრება: რატომ ვერ “ყლაპავს” რუსეთი აფხაზეთს
• აფხაზეთში პრემიერის პოსტის გაუქმებას ვარაუდობენ
• აფხაზეთში ოპოზიციამ საპროტესტო აქცია დაიწყო, ხელისუფლებას შტურმის ეშინია. ვიდეო

საუბარია გაერთიანებული ოპოზიციის მიტინგზე, რომელიც სოხუმის თეატრის მოედანზე, სამთავრობო შენობების კომპლექსიდან ას მეტრში გაიმართა. 

ოპოზიციას მოქმედი ხელისუფლების მიმართ პრეტენზიების დიდი სია აქვს, რომელთაგან უმთავრესად მიტინგზე გამოყოფილი იყო რესპუბლიკაში არსებული მწვავე ენერგეტიკული კრიზისი, პანდემიასთან არაეფექტიანი ბრძოლა და სამართალდამცავი ორგანოების ცუდი მუშაობას. 

ოპოზიციის აქცია სოხუმში 2021 წლის 21 დეკემბერს. კადრი ვიდეოდან

შებინდებისას მიტინგის მონაწილეებმა გადაინაცვლეს მილიციისა და სპეცრაზმის გაძლიერებული ქვედანაყოფების მიერ დაცულ პრეზიდენტის სასახლესთან და მის აღებას შეეცადნენ. თუმცა, მცდელობა უშედეგო აღმოჩნდა. რამდენიმე ადგილობრივი შეტაკების შემდეგ, დაპირისპირება დასრულდა პრეზიდენტ ასლან ბჟანიასა და ოპოზიციის ლიდერ ადგურ არძინბას შორის შეთანხმებით, შეეწყვიტა ოპოზიციას აქცია და დაეწყოთ კონსტრუქციული დიალოგი. 

აღნიშნული დიალოგის მიუხედავად, რვა იანვრიდან დაკავებები დაიწყო. წყაროები სამართალდამცავი ორგანოებიდან ამბობენ, რომ მოცემული სისხლის სამართლის საქმის ფიგურანტთა წრე ამ ხუთი დაკავებულით არ შემოიფარგლება და რომ „დაკავებები კიდევ იქნება“ და შესაძლოა, ის ამჟამინდელი ოპოზიციის ლიდერთაგან რომელიმესაც კი შეეხოს. 

კერძოდ, დეკემბრის ბოლოდან აქტიურად დადიოდა ხმები, რომ არეულობების ორგანიზებაში შესაძლოა დაედანაშაულებინათ სოხუმის ყოფილი მერი კან კვარჩია. 

დამოუკიდებელი აფხაზეთის არსებობის ისტორიაში, მწვავე შიდაპოლიტიკური კრიზისი რამდენჯერმე დასრულდა პრეზიდენტის სასახლის შტურმით. ორ მათგანს, 2014 წლის მაისსა და 2019 წლის იანვარში, ხელისუფლების ვადამდე შეცვლა მოჰყვა. თუმცა, აქამდე ეს მასობრივი არეულობები არასდროს გადაზრდილა სისხლის სამართლის საქმეებში და მით უმეტეს დაკავებებში. 

ახლა გაუთვალისწინებელი ექსცესების თავიდან ასაცილებლად, რესპუბლიკის სამართალდამცავი ორგანოები მუშაობის საგანგებო რეჟიმზე არიან გადაყვანილი. გაძლიერებულია შინაგან საქმეთა სამინისტროსა და სახელმწიფო უსაფრთხოების სამსახურის შენობების დაცვა. 

გაერთიანებული აფხაზური ოპოზიცია აღშფოთებულია დაკავებებით და მიმდინარე მოვლენებს „სახელმწიფოში ტოტალიტარული რეჟიმის დამყარების მცდელობად“ მიიჩნევს. 

„ჩვენი სამართალდამცავი სისტემა ხელისუფლების ინტერესებს ემსახურება. არანაირ კანონზე აქ ლაპარაკი არ არის. ცდილობენ ადამიანები დაადანაშაულონ მასობრივ არეულობებსა და სახელმწიფო გადატრიალების მცდელობაში. დღეს კი, 9 იანვარს, რეალური სახელმწიფო გადატრიალების მეორე წლისთავია. ეს ცინიზმის მწვერვალია“, – ამბობს ოპოზიციონერი, პარლამენტის დეპუტატი, გივი კვარჩია. 

2020 წლის 9 იანვარს, მაშინდელი ოპოზიციის მომხრეებმა, რომელსაც აფხაზეთის ამჟამინდელი პრეზიდენტი ასლან ბჟანია მეთაურობდა, სოხუმში სამთავრობო შენობების კომპლექსის შტურმით აღებით, აიძულეს პრეზიდენტი რაულ ხაჯიმბა ვადაზე ადრე დაეტოვებინა თანამდებობა.  

„ჩვენ ვაცხადებთ, რომ კანონმდებლობის შერჩევითი, პოლიტიკურად მოტივირებული გამოყენება დაუშვებელია და ამას არ დავუშვებთ. სამართლებრივ საკითხებში არ შეიძლება არსებობდეს ხანდაზმულობის ვადა. რა უშლიდა ხელს მოქმედ პრეზიდენტსა და ძალოვან ბლოკს ასევე განეხილა 2020-სა და 2019 წლებში პრეზიდენტის სასახლის ხელში ჩაგდებისა და 2016 წელს შსს-ს შენობის შტურმის საქმეები? ახლა კანონის ნორმები მხოლოდ ხელისუფლების ოპონენტების მიმართ გამოიყენება. რა უნდა იყოს სახელმწიფოს ერთიანობისთვის იმაზე უარესი დარღვევა, ვიდრე შენიანებად და სხვებად დაყოფა“, – განაცხადა სპეციალურად მოწვეულ პრესკონფერენციაზე ოპოზიციის ერთ-ერთმა ლიდერმა, ახრა ბჟანიამ.