აფხაზეთში დენი უკვე 5 საათით ითიშება. ოპოზიცია მთავრობის გადადგომას ითხოვს
აფხაზეთში დენი უკვე 5 საათით ითიშება
გრძელვადიანი ენერგეტიკული კრიზისი აფხაზეთში უკიდურესად გაუარესდა. ელექტროენერგიის დეფიციტის გამო, აფხაზეთში მცოცავი გამორთვა უკვე ხუთ საათამდე, ხოლო აღმოსავლეთ ნაწილში – შვიდამდე გაგრძელდა. ამ ფონზე ენერგოკომპანიის ხელმძღვანელმა თანამდებობა დატოვა, ოპოზიცია კი მთელი ხელისუფლების გადადგომას ითხოვს.
პირველი თებერვლიდან დაწესებული ახალი გრაფიკი შუალედურია და უახლოეს მომავალში მოძრავი გრაფიკი ხანგრძლივობა კიდევ ორი საათით გაიზრდება, განაცხადა დეპუტატმა ერიკ რშტუნიმ და ენერგოკომპანია “ჩერნომორენერგოს” მენეჯმენტზე მიუთითა.
- თბილი საბანი და ცირკი სახლში – როგორ გადააქვთ აფხაზეთის მცხოვრებლებს უშუქობა
- აფხაზეთის ოპოზიციის ლიდერმა პრეზიდენტს რვა შეკითხვა დაუსვა და მიანიშნა, რომ მისი გადადგომის დროა
სამი გადადგომა ორ წელიწადში
სიტუაციას ვერ გაუმკლავდა და “ჩერნომორენერგოს” ხელმძღვანელმა ზურაბ ბაღაფშმა თანამდებობა დატოვა. ამავე მიზეზით ნებაყოფლობით გადადგომის შესახებ განცხადება მისმა ორმა წინამორბედმაც დაწერა. და ეს ყველაფერი ბოლო ორი წლის განმავლობაში მოხდა.
მთავრობა ახალ კრიზისს ენგურჰესის კაშხალზე წყლის დონის მკვეთრი ვარდნით ხსნის, რის გამოც სადგურმა მნიშვნელოვნად შეამცირა ელექტროენერგიის გამომუშავება. ელექტროენერგიის ის ნაკადი, რომელიც რუსეთმა აფხაზეთს ზამთრის პერიოდში მიაწოდა, საკმარისი არ აღმოჩნდა დეფიციტის შესავსებად.
დეფიციტის შევსების მცდელობები
სამი წლის განმავლობაში აფხაზეთის მიერ ელექტროენერგიის მოხმარება წელიწადში ორიდან სამ მილიარდ კვტ/სთ-მდე გაიზარდა. ამ მხრივ აფხაზეთი აღარ ჯდება იმ 40%-იან გამომუშავების კვოტაში, რომელსაც აფხაზეთის ომის შემდეგ დადებული ჯენტლმენური ხელშეკრულებით სოხუმი ენგურჰესიდან იღებდა.
ელექტროენერგიის მოხმარების მკვეთრი მატება მაინინგთან წარუმატებელი ბრძოლის შედეგია. ხელისუფლება სიტუაციის სტაბილიზაციას ელექტროენერგიის ტარიფის გაზრდით ცდილობდა, რომელიც ბოლო ექვსი თვის განმავლობაში სამჯერ გაიზარდა. თუმცა, ამას საპირისპირო ეფექტი მოჰყვა – რეალური გადასახადები 51 პროცენტიდან 32 პროცენტამდე დაეცა. სოციალურ ქსელებში კი პროტესტის ტალღა სულ უფრო მატულობს – ხალხი დენის საფასურის გადახდაზე უარს აცხადებს.
ხალხი პრეზიდენტის სასახლისკენ მიემართება
2 თებერვალს პრეზიდენტის სასახლესთან საპროტესტო აქციაზე რამდენიმე ათეული რიგითი მოქალაქე გამოვიდა.
“აქცია ყოველდღიური ხასიათის იქნება”, – განაცხადა აქციის ორგანიზატორმა ასიდა ქორთუამ.
მეტიც, მალე აქციის მონაწილეთა რიცხვი რამდენჯერმე გაიზრდება, რადგან ოპოზიცია იმავე ადგილას, პრეზიდენტის სასახლესთან აქციის მოწყობას აპირებს. აფხაზეთის თანამედროვე ისტორიაში მსგავსი ქმედება რამდენჯერმე გადაიზარდა სასახლეზე თავდასხმაში, ორ შემთხვევაში კი პრეზიდენტი გადადგა.
ამ ეტაპზე ოპოზიცია “ჩერნომორენერგოს” ხელმძღვანელის გადადგომას არასაკმარისად მიიჩნევს და მთელი მთავრობის გადადგომას მოითხოვს. და თუ პრეზიდენტი ასლან ბჟანია ამას არ გააკეთებს, აქციის მონაწილეები უკვე მოითხოვენ მის გადადგომას.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
