აფხაზეთის ხელისუფლება შიშობს, რომ შესაძლოა მორიგი გადატრიალება მოხდეს
აფხაზეთის ხელისუფლებას ეშინია მორიგი სახელმწიფო გადატრიალების
აფხაზური ოპოზიცია სოციალური ქსელების საშუალებით აქტიურ კამპანიას აწარმოებს, რათა მოქალაქეები 30 მაისს, სოხუმში დაგეგმილ „სახალხო აქციაზე“ გავიდნენ. ესპერტები ვარაუდობენ, რომ პრეზიდენტის სასახლიდან 100 მეტრში დაგეგმილ საპროტესტო აქციაზე მინიმუმ 5000 ადამიანი შეიკრიბება. აფხაზეთის ხელისუფლებას ეშინია მორიგი სახელმწიფო გადატრიალების, რომელიც ბოლო ათი წლის განმავლობაში მესამე იქნება.
აქცია და კონტრაქცია
ოპოზიცია ალექსანდრ ანქვაბის ხელმძღვანელობით მთავრობის გადადგომას და რიგ კანონპროექტებზე მორატორიუმის გაუქმებას მოითხოვს, თუ პრეზიდენტი ასლან ბჟანია ამ მოთხოვნებს 30 მაისამდე შეასრულებს, აქცია გაუქმდება.
- ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
- რა ტერიტორიების და ობიექტების მიღება სურს რუსეთს აფხაზეთისგან. კომენტარი
- ულტიმატუმი ასლან ბჟანიას: ოპოზიცია ხელისუფლების გადადგომას და რუსეთისთვის „არას“ თქმას ითხოვს
მაგრამ, პრეზიდენტის სასახლის კულისებიდან გამოსული ინფორმაციის მიხედვით, ბჟანია დათმობაზე წასვლას არ აპირებს. პირიქით, აქციის დღეს თავის მხარდამჭერებს ერთგვარი „კონტრაქციისთვის“ აორგანიზებს. სახელმწიფო დაწესებულებების ხელმძღვანელებს ფარულად ჩამოაყვანინეს რეგიონებიდან ხალხი აქციაში მონაწილეობის მისაღებად.
ამ ზომებს ძნელად შეიძლება ვუწოდოთ გადამეტებული, იმის გათვალისწინებით, რომ ბოლო დროს – 2014 და 2020 წლებში – მსგავსი აქციები პრეზიდენტის სასახლის შტურმით და სახელმწიფოს მეთაურის გადადგომით დასრულდა. ახლა კი ბჟანიას და მის თანამოაზრეებს კიდევ ერთი გადატრიალების ეშინიათ.
სწორედ იმის შიშით, რომ ოპოზიციის აქცია ხელისუფლების დამხობის მცდელობად გადაიქცევა, ნაკარნახევი იყო აფხაზეთის საზოგადოებრივი პალატის განცხადებაც:
„პატივს ვცემთ რა მოქალაქეთა შეკრების და გამოხატვის თავისუფლებას, აფხაზეთის რესპუბლიკის საზოგადოებრივი პალატა მოუწოდებს მოახლოებული აქციის ორგანიზატორებს, მოქმედი კანონმდებლობის მკაცრი დაცვით, უზრუნველყონ აქციის მშვიდობიანი მიმდინარეობა. დაუშვებელია ბუნტი, რამაც შეიძლება გამოიწვიოს შეტაკება სამართალდამცავებთან“.
“რევოლუციის ოსტატი”
ამავე დროს, დონეცკის თვითგამოცხადებული რესპუბლიკის გმირმა ახრა ავიძბამ, “პიატნაშკას” საერთაშორისო ბრიგადის მეთაურმა, გამოხატა მხარდაჭერა ოპოზიციის “სახალხო აქციის” მიმართ.
2020 წლის იანვარში სწორედ მან მიიყვანა ხალხი პრეზიდენტის სასახლესთან, რის შედეგადაც ხალხი შენობაში შტურმით შეიჭრა, რამდენიმე დღის შემდეგ კი მაშინდელმა პრეზიდენტმა რაულ ხაჯიმბამ თანამდებობა დატოვა. ამის შემდეგ, ვადამდელი არჩევნების გზით, პრეზიდენტად აირჩიეს ასლან ბჟანია, რომელიც მაშინ ოპოზიციის ლიდერი იყო.
ახრა ავიძბა პრეზიდენტის თანაშემწედ საერთაშორისო ურთიერთობების საკითხებში დაინიშნა. თუმცა, ერთი წლის შემდეგ, ის პრეზიდენტთან მწვავე დაპირისპირებაში შევიდა და თანამდებობა დატოვა.
მოგვიანებით ავიძბა და მისი ხუთი ხელქვეითი “პიატნაშკიდან” აფხაზეთის ხელისუფლებამ დააკავა. თავდაპირველად მათ ბრალი სახელმწიფო გადატრიალების მცდელობაში წაუყენეს, მაგრამ შემდეგ ბრალდება „იარაღის უკანონო შენახვაში“ გადაკვალიფიცრდა, შედეგად, ავიძბას სამწლიანი პირობითი პატიმრობა მიესაჯა.
სამი ვარიანტი: კონსენსუსი, თავდასხმა, დიალოგი
ამ დროისთვის, მოვლენების განვითარების რამდენიმე სცენარი არსებობს:
ოპოზიცია მიტინგს გამართავს, ხელისუფლებასთან კომპრომისს მიაღწევს და ალექსანდრ ანქვაბის მთავრობა გადადგება.
ოპოზიცია აქციას გამართავს, მაგრამ ხელისუფლებასთან მოლაპარაკებას ვერ შეძლებს, შედეგად მოხდება შტურმი პრეზიდენტის სასახლეზე. თუ თავდასხმა წარმატებული იქნება, მაშინ ასლან ბჟანია გადადგება – შედეგად, ოპოზიციის ლიდერი ადგურ არძინბა ვადამდელი საპრეზიდენტო არჩევნების უდავო ფავორიტი გახდება.
თუ შტურმი ვერ მოხერხდა, მაშინ ასლან ბჟანია ფაქტობრივად იღებს კარტ ბლანშს ყველა მისი გეგმის განსახორციელებლად: უცხოელებისთვის ბინების შეძენის უფლება, ენერგეტიკული ინდუსტრიის დენაციონალიზაცია, ბიჭვინთაში სახელმწიფო აგარაკის რუსეთისთვის გადაცემა და ა.შ.
ოპოზიცია აქციას გამართავს, რის შემდეგაც მისი მხარდამჭერები, რომლებმაც აჩვენეს, რომ ხელისუფლებას გეგმების რეალიზების საშუალებას არ მისცემენ, სახლში წავლენ, ხოლო ხელისუფლება მიიღებს სიგნალს აფხაზურ საზოგადოებაში რეალური განწყობების შესახებ და დაიწყებს კონსტრუქციულ დიალოგს ოპოზიციასთან.
