აფხაზეთის გენერალური პროკურატურა ანონიმური მედიასაშუალებებისთვის ინფორმაციის გაჟონვაში დაადანაშაულეს
აფხაზეთის გენერალური პროკურატურიდან ინფორმაციის გაჟონვა
აფხაზეთში ანონიმურ სოციალურ მედიაში ინფორმაციის გაჟონვის ბრალდებით ერთი პირი დააკავეს, თუმცა ე.წ. ხელისუფლება კვლავ უარყოფს რაიმე კავშირს იმ პროსამთავრობო Telegram არხებთან, რომლებიც რეგულარულად აქვეყნებენ შიდა, ხშირად ჯერ კიდევ გაუხმაურებელ მასალებს.
ბოლო ინციდენტი პარლამენტის კომიტეტის სხდომის დროს გამოვლინდა. სხდომაზე განიხილებოდა გენერალური პროკურატურის შუამდგომლობა ოპოზიციონერი ლიდერის, კან კვარჩიასთვის საპარლამენტო იმუნიტეტის მოხსნის თაობაზე. როგორც თავად კვარჩიამ განაცხადა, შესაბამისი დოკუმენტი, მისი მიღების თარიღი და მოსმენების დაგეგმილი დღე ანონიმურმა Telegram არხებმა ჯერ კიდევ პარლამენტში ოფიციალურად წარდგენამდე ორი დღით ადრე გაავრცელეს, იმ დროს, როცა ეს ინფორმაცია არც ერთ დეპუტატს არ ჰქონდა.
ეჭვები მალევე გენერალური პროკურორის, ადგურ აგრბას მიმართულებით გაჩნდა, რომელიც კომიტეტის სხდომას ესწრებოდა. მიუხედავად ამისა, აგრბამ კატეგორიულად უარყო რაიმე კავშირი აღნიშნულ არხებთან და განაცხადა, რომ თავადაც გამხდარა მათი მხრიდან შეურაცხმყოფელი პოსტების სამიზნე.
ოპოზიციური მედია პლატფორმა “აფხაზეთის პორტალი“ ამტკიცებს, რომ მსგავსი გაჟონვები მიუთითებს სახელმწიფოსა და ანონიმურ არხებს შორის კოორდინაციაზე. მათი შეფასებით, ეს არხები გამოიყენება როგორც ინსტრუმენტი, რომლის მეშვეობითაც ვრცელდება დისკრედიტაციის კამპანიები და ცილისმწამებლური მასალა მოქალაქეების, განსაკუთრებით კი ოპოზიციის წარმომადგენლების წინააღმდეგ.
ამავე პლატფორმის ავტორები აღნიშნავენ, რომ თუ გენერალურ პროკურორს პირადად არ მიუღია მონაწილეობა ინფორმაციის გაჟონვაში, მაშინ მას მაინც უნდა ჰქონდეს ინფორმაცია იმის შესახებ, თუ როგორ აღმოჩნდა დახურული ინფორმაცია მესამე მხარის ხელში. წინააღმდეგ შემთხვევაში, მათი თქმით, ჩნდება საფუძვლიანი ეჭვი, რომ მაღალი რანგის ოფიციალური პირები პირდაპირ ან ირიბად არიან ჩართული მსგავს პრაქტიკაში.
აფხაზეთის ოპოზიცია უკვე წლებია ამტკიცებს, რომ ხელისუფლება და მასთან დაახლოებული მედია საშუალებები კოორდინირებულად მოქმედებენ ანონიმური სოციალური მედიის ქსელთან, რომელიც სისტემატურად აქვეყნებს დაუდასტურებელ და ხშირად დისკრედიტაციულ ინფორმაციას.
მიუხედავად ამისა, იმ შემთხვევებშიც კი, როდესაც ინფორმაციის გაჟონვა აშკარა იყო, მსგავსი ფაქტები გამოძიების საგნად იშვიათად ქცეულა.
