აფხაზეთში, ერთ კვირაში უკვე ტურისტები ჩამოვლენ?
აფხაზეთში, 1 ივნისს, კორონავირუსის პანდემიის გამო გამოცხადებული საგანგებო მდგომარეობა მთავრდება და იხსნება ფაქტობრივად ყველა შეზღუდვა, მათ შორის, სასტუმროებისა და ტურიზმთან დაკავშირებული ბიზნესების საქმიანობაზე.
პოპულარული რუსული ტუროპერატორების ვებგვერდებზე უკვე შესაძლებელია აფხაზეთში სასტუმროებისა და სანატორიუმების ნომრების დაჯავშნა, თანაც უფასოდ – რადგან არანაირი გარანტია არ არსებობს, რომ საკურორტო სეზონი მართლაც 1 ივნისს გაიხსნება.
- სოხუმის ინფექციურ საავადმყოფოში ერთი ექიმი დარჩა, დანარჩენი მედიკოსები თვითიზოლაციაში არიან
- აფხაზეთი: შვიდი კადეტი კორონავირუსით და უსიმპტომოდ. ისტორიები კლინიკიდან და კარანტინიდან
- აფხაზეთის ახალი პრეზიდენტის გამოწვევები
აფხაზეთში, ჯერჯერობით საზღვრები სრულად დაკეტილია. მართალია, საკარანტინო ზომები შემსუბუქებულია, ზოგიერთი აკრძალვა ჯერ კიდევ ძალაშია, მათ შორის, დახურულია სასტუმროები და საექსკურსიო ბიუროები.
იმ შემთხვევაშიც კი, თუკი აფხაზეთის ხელისუფლება ამ ვადის ამოწურვის შემდეგ, კარანტინს არ გააგრძელებს, სეზონის გახსნა მაინც არ იქნება გარანტირებული. ტურისტები აფხაზეთში ძირითადად რუსეთიდან ჩადიან, იქ კი მძიმე ეპიდემიოლოგიური ვითარებაა და საზღვრები ჩაკეტილია.
25 მაისისთვის, აფხაზეთში, COVID-19-ით ინფიცირების 25 შემთხვევაა დაფიქსირებული. აპრილში ვირუსი ქალაქ გაგრის სამ მცხოვრებს გამოუვლინდა. ორი მათგანი გამოჯანმრთელდა, ერთი პაციენტი, 95 წლის ქალი კი გარდაიცვალა.
ინფიცირების დანარჩენი შემთხვევები 2020 წლის მაისში დაფიქსირდა. დაავადებულთა უმეტესობა – სამხედრო სასწავლებლების კურსანტები არიან, რომლებიც რუსეთიდან დაბრუნდნენ სახლში.
ოფიციალური ინფორმაციით, ყოველდღიურად, აფხაზეთში, COVID-19-ზე ტესტირებას 70-დან 100 კაცამდე გადის.
რუსეთი მსოფლიოში მესამე ადგილზეა კორონავირუსით ინფიცირებულთა რაოდენობით. 25 მაისის მონაცემებით, სულ 353 437 ადამიანი დაინფიცირდა, მათგან 3 633 პაციენტი გარდაიცვალა.
აფხაზეთის სასტუმროების გილდიაში მიაჩნიათ, რომ საუკეთესო შემთხვევაში, საკურორტო სეზონი 2020 წლის ივნისის ბოლოს გაიხსნება.
ინფორმაციას აფხაზეთში სასტუმროების 1 ივნისიდან დაჯავშნის შესახებ, სოციალურ ქსელებში მწვავე კრიტიკა მოჰყვა.
„აქ, რამდენიმე ასეული კურსანტი დაბრუნდა რუსეთის სამხედრო სასწავლებლებიდან და უკვე 20 მათგანია ინფიცირებული. და რა იქნება, თუკი ტურისტები ჩამოვლენ?“.
„რუსეთში გახურებული პანდემიაა. ჩვენი სასტუმროების მეპატრონეები, როგორც ჩანს, ვერ ითმენენ, ისე უნდათ ამ „ვითარების“ აფხაზეთში გადმოტანა“
