"გადმოგვცეს ხატი, ილოცეს და ამით ვიზიტი დასრულდა" - რას აკეთებდა ინაშვილი აფხაზეთში?
ინფორმაცია იმის შესახებ, რომ პოლიტიკური პარტიის, „პატრიოტთა ალიანსის“ ლიდერები, ირმა ინაშვილი და გიორგი ლომია აფხაზეთში ჩავიდნენ, პირველად ტელეკომპანია “მთავარმა არხმა” გაავრცელა.
“მთავარი” აღნიშნავდა, რომ „პატრიოტთა ალიანსის” ლიდერები – გიორგი ლომია და ირმა ინაშვილი 18 აგვისტოს ენგურის ხიდის გავლით აფხაზეთის ტერიტორიაზე გადავიდნენ და იქ დაახლოებით 4 საათის განმავლობაში დარჩნენ.
“მთავარი არხის” ინფორმაციით, პოლიტიკოსებმა უპრობლემოდ გაიარეს ბლოკ-საგუშაგოები – ქართველი სამართალდამცველების მიერ კონტროლირებადი, და ასევე ის, სადაც სპეცდანიშნულების რაზმი დგას.
ჟურნალისტების მტკიცებით, ენგურის ხიდთან ისინი სპეციალურმა მანქანამ მიაცილა.
ვიზიტის ნამდვილობა მოგვიანებით თავად პოლიტიკოსებმა დაადასტურეს.
“პატრიოტთა ალიანსის” ლიდერების გასაიდუმლოებულ ვიზიტს დიდი ვნებათღელვა მოჰყვა როგორ ენგურს გაღმა, ისე გამოღმა.
ეს საკმაოდ არაორდინალური ვითარებაა ქართულ-აფხაზური რეალობისთვის – უკვე წლებია, რაც არც ერთი ქართველი პოლიტიკოსი აფხაზეთში არ ჩასულა.
რა ვიცით აფხაზეთში ვიზიტზე
24 აგვისტოს, მას შემდეგ, რაც მედიაში ინფორმაცია გავრცელდა, ინაშვილმა დადასტურა, რომ ის და მისი თანაპარტიელი გიორგი ლომია მართლაც იყვნენ აფხაზეთში.
„მე და გიორგი ლომია ნამდვილად ვიყავით აფხაზეთში. ნამდვილად ვიყავით. ჩვენ ღვთისშობლის ხატი დავაბრძანეთ ილორის ტაძარში,“ – თქვა ინაშვილმა.
ირმა ინაშვილმა ფეისბუკის პირად გვერდზე აფხაზეთში, ილორის ტაძარში ყოფნის ამსახველი ფოტოც ატვირთა.
ის ამბობს, რომ აფხაზეთში გიორგი ლომიასთან ერთად, ილორის ტაძრისთვის ღვთისმშობლის ხატის შესაწირად წავიდა.
“მე და გიორგი ლომიამ ილორის ტაძარს ღვთისმშობლის ხატი შევწირეთ – ილორის ღვთისმშობელი, სასოგადაწურულთა შემწყალებელი და აღმაშენებელი. შეგეწიოთ! “- წერს ინაშვილი ფეისბუკში.
დასახელდა იმ ადამიანის ვინაობაც, ვისაც აფხაზეთში ინაშვილი და ლომია შეხვდნენ. ის დე ფაქტო პრეზიდენტის, ასლან ბჟანიას მრჩეველი და პარტია “სახალხო ფრონტი – აფხაზეთის” წევრი ლაშა საქანიაა.
საქანიამ ინაშვილთან და ლომიასთან მოლაპარაკება თავდაპირველად უარყო, მოგვიანებით კი განაცხადა, რომ მათ შეხვდა, მაგრამ არა რაიმე საქმიანი მოლაპარაკებისთვის.
• გიგა ოთხოზორიას მკვლელობიდან 4 წელი გავიდა. მკვლელი ისევ დაუსჯელია
საქანია აცხადებს, რომ ქართველი პოლიტიკოსების დახვედრა მას რუსეთში მცხოვრებმა მეგობრებმა სთხოვეს.
მისი თქმით, ქართველი პოლიტიკოსები აფხაზეთში „ჰუმანიტარული მისიით“ იყვნენ ჩასულები.
„არანაირი მოლაპარაკება არ ყოფილა. ეს იყო ჰუმანიტარული აქცია და რაიმე პოლიტიკური სარჩული ამას არ აქვს. გადმოგვცეს ხატი, ილოცეს და ამით ვიზიტი დასრულდა“, – ამბობს საქანია.
საქანია ამტკიცებს, რომ “პატრიოტთა ალიანსის” ლიდერები აფხაზეთში ისე შევიდნენ, რომ ამ ვიზიტის შესახებ დე ფაქტო ხელისუფლებამ არაფერი იცოდა. აფხაზი პოლიტიკოსის თქმით, მას საქმის კურსში არ ჩაუყენებია არც გალის და არც დე ფაქტო აფხაზეთის საგარეო საქმეთა სამინისტროს ხელმძღვანელობა, რათა ამ ღონისძიებას რაიმე “ოფიციალური სახე” არ ჰქონოდა.
თბილისის რეაქცია
ამ ინფორმაციის გავრცელების შემდეგ, აფხაზეთის ომის ვეტერანთა საზოგადოებრივმა ორგანიზაცია „არუაამ“, რომელიც ქართულ მხარესთან ნებისმიერი დიალოგის წინააღმდეგია, „პატრიოტთა ალიანსის“ ლიდერებთან შეხვედრის თაობაზე დე ფაქტო ხელისუფლებისგან განმარტებები მოითხოვა.
ოპოზიციური პოლიტიკური პარტიები აცხადებენ, რომ ინაშვილის და ლომიას აფხაზეთში გადასვლა კრემლისა და მმართველი პარტიის თავმჯდომარის, ბიძინა ივანიშვილის ნებართვის გარეშე შეუძლებელი იქნებოდა.
“რბილად რომ ვთქვა, ცოტა უცნაური ამბავია. ეს ხომ არ არის გვერდითა ქუჩაზე გადასვლა. ეს ძალიან მნიშვნელოვანი აქტია, რომელსაც კონკრეტული პარტია ახორციელებს. საერთოდ წარმოუდგენელია, როგორ შეიძლება ეს მოხდეს ხელისუფლების თანხმობის გარეშე. ან როგორი იყო რუსეთის პოზიცია. იყო თუ არა მათი თანხმობა? წესით უნდა ყოფილიყო, აბა ისე ვინ გაატარებდა,” – ამბობს ევროპული საქართველოს წევრი, გიგი წერეთელი.
“პრობლემური ფაქტია სხვადასხვა მიზეზების გამო,” – ამბობს პარლამენტის დამოუკიდებელი დეპუტატი თამარ ჩუგოშვილი, – “ ერთი არის მიზანი, რას ემსახურებოდა იქ ჩასვლა და მეორეა ფიზიკურად იქ მოხვედრა როგორ არის შესაძლებელი. ძალიან ბევრი კითხვებია.”
თბილისში ასევე ფიქრობენ, რომ ამ ვიზიტმა აფხაზეთში დიალოგის მომხრეთა რიგები სერიოზუალდ შეარყია, ქართველებთან ურთიერთობის განახლების მოწინააღმდეგეთა პოზიციები კი გააძლიერა.
სოხუმის რეაქცია
ქართველი პოლიტიოკოსების სოხუმში ვიზიტის გახმაურების შემდეგ აფხაზეთის პრეზიდენტის მრჩეველმა, ლაშა საქანიამ, თანამდებობა დატოვა.
ამის შესახებ საქანიამ ფეისბუკში დაწერა და აღნიშნა, რომ თანამდებობა მან საკუთარი ნებით დატოვა და ეს გადაწყვეტილება 18 აგვისტოს აფხაზეთში ინაშვილის და ლომიას ვიზიტს უკავშირდება, გადაწყვეტილების მიზანი კი საზოგადოების დაშოშმინებაა.
ვინ არის პატრიოტთა ალიანსი?
“პატრიოტთა ალიანსი” პრორუსული ორიენტაციის პოლიტიკური პარტიაა. ის ღიად ლობირებს რუსეთთან ურთიერთობის განახლებას და ჰომოფობიური და ანტიდასავლური რიტორიკით გამოირჩევა.
რუსული ინტერნეტგამოცემა „დოსიეს“ მიერ გავრცელებული ინფორმაციით, პატრიოტთა ალიანსი“ წინასაარჩევნოდ რჩევებს და ფულს კრემლისგან იღებს.
გამოცემა ასახელებს თანხასაც. მათი ინფორმაციით, პარტია 2020 წლის ოქტომბრის საპარლამენტო არჩევნების დასაფინანსებლად მოსკოვისგან 8 მილიონ დოლარს ითხოვდა.
“პატრიოტთა ალიანსის” ლიდერი, ირმა ინაშვილი არ უარყოფს, რომ მათ პარტიას რუსეთის საკონსულტაციო კომპანია მართლაც ემსახურება, თუმცა, მოსკოვისგან 8 მილიონი დოლარის მიღებას კატეგორიულად უარყოფს.
ინაშვილი ამბობს, რომ აფხაზეთში ვიზიტის დეტალურ მიზანზე საუბრისთვის სპეციალურ პრესკონფერენციას მოაწყობს.
