შაბათის მარში თბილისში. ვიდეო ბლოგების სერიიდან „პროტესტი საქართველოში“
შაბათის მარში
“როცა სახელმწიფო ივანიშვილს ემსახურება, ქართველები ქვეყნიდან მიდიან”- ეს არის 15 აგვისტოს შაბათის მარშის გზავნილი.
პროტესტი საქართველოში. ყველა ვიდეო დღევანდელი მარშის ორგანიზატორები გაზრდილ ემიგრაციაზე საუბრობენ.
საქსტატის მონაცემებით, 2012 – 2025 წლებში, საქართველოდან 400 ათასზე მეტი ადამიანი წავიდა ემიგრაციაში.
მიგრაციის ასეთი ზრდა ქვეყანაში სამუშაო ადგილების არარსებობას, დაბალ ანაზღაურებას და არასტაბილურ გარემოს უკავშირდება.
ტრადიციული შაბათის მარში თბილისში უკვე 35-ე კვირაა იმართება. მსვლელობის მონაწილეების მოთხოვნები უცვლელია: პოლიტპატიმრების გათავისუფლება და ახალი საპარლამენტო არჩევნები.
თითქმის ორი წელია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.
აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.
აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.
პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.
