მოსაზრება: რუსეთი ცდილობს სომხეთის ეკონომიკის მოგუდვას სხვისი ხელებით და ეს "სხვისი ხელები“ არის საქართველო
საქართველო და სომხეთი
პოლიტოლოგმა პაატა ზაქარეიშვილმა გადაცემა “დღის ნიუსრუმში“ ისაუბრა გავრცელებულ ინფორმაციაზე, რომ საქართველომ რუსეთიდან სომხეთში თხევადი გაზის იმპორტი დააბრკოლა და განაცხადა, რომ რუსეთი საქართველოს ხელებით, სომხურ ეკონომიკას ახრჩობს. მისი თქმით, რუსეთი მაქსიმალურად ცდილობს, სომხეთის მოგუდვა სხვების ხელებით მოახერხოს და ეს სხვისი ხელები არის საქართველო.
პაატა ზაქარეიშვილი: “ჩვენი ქვეყნის ტერიტორიაზე გამავალ ტვირთებს საქართველოსთან საერთო არაფერი აქვს. თუ ტვირთი არის ნორმალურად შეფუთული, საქართველო მას ატარებს. ეს ხდებოდა წლების განმავლობაში, მით უმეტეს, სომხეთის მიმართ ჩვენ ყოველთვის განსაკუთრებული დამოკიდებულება გვქონდა და უცებ, ბოლო პერიოდში წამოვიდა უცნაურობები.
მაგალითად, რუსეთმა უცებ დაიწყო სომხური კონიაკის გაჩერება და ხარისხის შემოწმება. რა შენი საქმეა, კონიაკის ხარისხი, როცა შენთან არ შემოდის?! რუსეთსა და სომხეთს შორის ვითარება იძაბება და იძაბება. რუსეთს სომხეთში პრორუსული ძალები ჰყავს, არ უნდა ამ ძალების დასუსტება და ამიტომ მაქსიმალურად ცდილობს, სხვების ხელებით მოახერხოს სომხეთის მოგუდვა, აგრძნობინოს, “შენ კარგად მოიქეცი მანდ, თორემ უარესი მოგელის“.
სამწუხაროდ თუ საუბედუროდ, ეს სხვისი ხელები არის საქართველო. რუსეთის იმპერიის წინაშე ვართ იმპერიის ხელთათმანები. იმპერიამ თავის ხელებზე წამოგვაცვა საქართველო და ჩვენ ვახრჩობთ დღეს სომხურ ეკონომიკას. ეს ყოვლად მიუღებელი და ამორალურია.”
16 ივლისს საქართველოს შემოსავლების სამსახურმა განაცხადა, რომ სიცრუეა გავრცელებული ინფორმაცია იმის თაობაზე, რომ საქართველო რუსეთიდან სომხეთის მიმართულებით გაზის ტრანზიტს აფერხებს.
მათი განმარტებით, გაზრდილი ტვირთბრუნვის პირობებში, განსაკუთრებულ აქტიურ რეჟიმში ხორციელდება საერთაშორისო გადაზიდვებში ჩართული სატრანსპორტო საშუალებების მიმართ ყველა საბაჟო პროცედურა, რათა შეუფერხებლად მოხდეს მათი გატარება. ამასთან, საქართველოს მასშტაბით არსებულ ყველა საბაჟო გამშვებ პუნქტზე, მებაჟე ოფიცრები სრულ მზადყოფნაში არიან, 24-საათიან რეჟიმში, სწრაფად განახორციელონ როგორც ფიზიკური პირების, ასევე მსუბუქი და სამგზავრო ავტომობილების კონტროლის პროცედურები.
მანამდე მედიაში გავრცელდა ინფორმაცია, რომ სომხეთში სატრანსპორტო საშუალებებში ფართოდ გამოყენებული თხევადი გაზის (LNG) ფასი 40%-ით გაიზარდა მას შემდეგ, რაც საქართველომ რუსეთიდან სომხეთის მიმართულებით გაზის ტრანზიტი შეაფერხა.
