ბელგიამ საქართველო უსაფრთხო ქვეყნების სიიდან ამოიღო
ბელგიამ საქართველო პარტნიორი უსაფრთხო ქვეყნების სიიდან ამოიღო. 10 ივლისს ბელგიის მოქალაქეობის არმქონე პირთა გენერალური კომისრის საიტზე განახლებულ სიაში საქართველო აღარ არის. ბელგიის სამეფოს მხრიდან განმარტებულია, რომ გადაწყვეტილება კომისრის მოსაზრებას ეფუძნება.
პარტნიორი უსაფრთხო ქვეყნების სიაში საქართველო ალბანეთთან, სერბეთთან, კოსოვოსთან, ბოსნია-ჰერცეგოვინასთან, მონტენეგროსთან, ჩრდილოეთ მაკედონიასთან და ინდოეთთან ერთად იყო.
“კრიტერიუმი ეხება არა მხოლოდ ზოგად პოლიტიკას (მაგალითად, დემოკრატიული ინსტიტუტების არსებობას, პოლიტიკურ სტაბილურობას) არამედ სამართლებრივ მდგომარეობას და ადამიანის უფლებების პატივისცემას ადამიანის უფლებათა ევროპული სასამართლოს (ECHR) სტანდარტების შესაბამისად”. – ნათქვამია განახლებულ სიასთან თანდართულ განკარგულებაში.
სალომე სამადაშვილი, პარტია “ლელო”: “ეს გადაწყვეტილება მიიღო ბელგიამ იმიტომ, რომ საქართველოს დღევანდელი ხელისუფლება ვერ უზრუნველყოფს ჩვენს ქვეყანაში კანონის უზენაესობას, ვერ უზრუნველყოფს საკუთარი მოქალაქეებისთვის მინიჭებული უფლებების დაცვას და შესაბამისად, ბელგიამ მიიღო გადაწყვეტილება, რომ საქართველოს მოქალაქეებისთვის ლტოლვილის სტატუსის მინიჭება მათთვის შესაბამისი მიმართვის შედეგად მოხდეს გამარტივებული პროცედურით, როგორც მოქალაქეებისთვის, რომლებიც ცხოვრობენ ქვეყანაში, სადაც მათ საკუთარი ხელისუფლება ვერ იცავს.
როდესაც ბელგია იღებს მსგავს გადაწყვეტილებას და ამბობს, რომ საქართველო არ არის მისი მოქალაქეებისთვის უსაფრთხო ქვეყანა, საფრთხე არსებობს ძალიან სერიოზული, რომ ბელგიას თან მიჰყვეს სხვა ქვეყნების გადაწყვეტილებაც და არც ისაა გამორიცხული, რომ რომელიმე მათგანმა დღის წესრიგში დააყენოს უვიზო მიმოსვლის შეჩერების მექანიზმის ამუშავების საკითხი. ჩვენი ქვეყნის რუსული ხელისუფლება ყველაფერს აკეთებს იმისთვის, რომ საქართველო საბოლოოდ ჩამოშორდეს ევროპულ ორბიტას და ევროპულ სივრცეს.”
გია ვოლსკი, პარლამენტის ვიცესპიკერი, პარტია “ქართული ოცნება”:“ვფიქრობ, ბელგიის გადაწყვეტილება გარკვეულწილად ბოლო პერიოდში განვითარებულ მცირე მასშტაბის შეჯახებებს ეხება, მაგრამ ამავე დროს, თავის შინაარსით არის პოლიტიკური.
სულ ახლახან საქართველოში საერთაშორისო ტურისტული ორგანიზაციის კონფერენცია ჩატარდა, მთელი მსოფლიოს ტურისტული ადმინისტრაციები საქართველოში იყვნენ. ახლახან იყო ევროპის ჩემპიონატი, მსოფლიო ჩემპიონატი რაგბიში, უშველებელი რაოდენობის ფორუმები, საერთაშორისო სპორტული ღონისძიებები.
ცუდია, რომ ოპოზიციის გარკვეულ ნაწილს ეს სიხარულს ანიჭებს და ვფიქრობ, ამ მიმართულებით მათი მუშაობა ინტენსიურად გრძელდება, რომ როგორმე დამატებით ნეგატიური ინფორმაცია შეიტანონ ევროპაში, თუმცა, ფაქტები გვიჩვენებს იმას, რომ საქართველო რჩება ტურისტულ ჰაბად და უსაფრთხო ქვეყანაა. საკმაოდ დიდი ბრიგადა მუშაობს იმისათვის, რომ როგორმე იქნებ საქართველოს მოქალაქეებს უვიზო გადაადგილება შეეზღუდოს ევროპაში, ეს თემა არ ეხება ამას, მაგრამ ბევრი რამ გამოავლინა ჩვენს ყოველდღიურ ყოფიერებაში და კიდევ ერთხელ დაადასტურა, რომ საქართველოს შიდა მტერი გაცილებით მეტი ჰყავს, ვიდრე ოპონენტი საგარეო ფორმატში და სივრცეში.”
