ჩეჩნეთის მთავრობას გროზნოდან თბილისში პირდაპირი ფრენების დანიშვნა უნდა. ამის შესახებ ჩეჩნეთის ტრანსპორტისა და კავშირგაბმულობის მინისტრმა რამზან ჩერხიგოვმა Azimuth Airlines-ის აღმასრულებელ დირექტორთან შეხვედრაზე განაცხადა.
ტრანსპორტის მინისტრმა შეხვედრაზე რამდენიმე პრიორიტეტული მიმართულება დაასახელა, მათ შორის, თბილისი:
“ჩვენ განვიხილეთ არაერთი პერსპექტიული პროექტი ჩეჩნეთის რესპუბლიკის მეთაურის, რუსეთის გმირის, რამზან კადიროვის ინსტრუქციების შესრულების ფარგლებში სამგზავრო ფრენების გეოგრაფიის გაფართოების მიზნით, როგორც ქვეყნის შიგნით, ასევე, მის ფარგლებს გარეთ. ჩვენ გამოვყავით მგზავრთა საჰაერო გადაყვანის რამდენიმე მიმართულება, მათ შორის ფრენები ქალაქებში – სოჭში, ვოლგოგრადში, თბილისში და ჯედაში.”
მისივე განმარტებით, გაწერილი გეგმების განხორციელება არა მხოლოდ ხელს შეუწყობს ჩეჩნეთის მაცხოვრებლების კომფორტს, არამედ მნიშვნელოვან დადებით გავლენას მოახდენს ტურისტული ინდუსტრიის განვითარებაზე.
Azimuth Airlines პირდაპირ ფრენებს მოსკოვიდან თბილისში ასრულებს.
● პირდაპირი ფრენები საქართველოსა და რუსეთს შორის ვლადიმირ პუტინის 10 მაისის გადაწყვეტილებით აღდგა.
● საქართველოს პრეზიდენტის, სამოქალაქო საზოგადოების, ოპოზიციის და დასავლელი პარტნიორების პროტესტის მიუხედავად, საქართველოს მთავრობა პუტინის ამ ინიციატივას შეუერთდა. პუტინის განცხადებიდან რამდენიმე დღეში, 20 მაისს, მთავარმა ეროვნულმა ავიაგადამზიდმა “ჯორჯიან ეარვეისმა” მოსკოვის მიმართულებით პირველი რეისი განახორციელა. საქართველოს პრეზიდენტმა სალომე ზურაბიშვილმა ამის გამო “ჯორჯიან ეარვეისს” ბოიკოტი გამოუცხადა.
● 1 ივლისს უკრაინამ სანქციების ახალი პაკეტი მიიღო. სანქცირებულთა სიაში ასევე აღმოჩნდა რუსულ და ბელარუსულ კომპანიებთან ერთად ქართული ავიაკომპანია Georgian Airways, რომელსაც სანქციები 10 წლით დაუწესდა. განკარგულების თანახმად, გადამზიდავის წინააღმდეგ მიღებული ზომები მოიცავს აქტივების გაყინვას, ასევე უკრაინის ტერიტორიაზე ფრენების სრულ აკრძალვას.
