რით დაეხმარა covid-19-თან ბრძოლაში საქართველო ოსურ და აფხაზურ მხარეებს

შერიგებისა და სამოქალაქო თანასწორობის საკითხებში სახელმწიფო მინისტრის აპარატი ავრცელებს იმ დახმარების ჩამონათვალს, რაც ქართულმა მხარემ კორონავირუსის პანდემიასთან ბრძოლისთვის სოხუმს და ცხინვალს გაუწია.

აფხაზეთში კორონავირუსის ინფექციის მკვეთრი აფეთქება დაიწყო მას შემდეგ, რაც იქ რუსი ტურისტები ჩავიდნენ.

მხოლოდ ერთ დღეს, 16 აგვისტოს, აფხაზეთში, covid-19-ით ინფიცირების 26 შემთხვევა გამოვლინდა, რაც სამჯერ მეტია დღე-ღამის წინა „სარეკორდო მაჩვენებელზე“. სულ, 17 აგვისტოსთვის, აფხაზეთში, კორონავირუსით დაინფიცირდა 189 ადამიანი. მათგან სამი პაციენტი გარდაიცვალა, 69 კი გამოჯანმრთელდა.

•  ოკუპირებულ აფხაზეთში კორონავირუსის პანდემიის გავრცელების დღიდან, საქართველოს კონტროლირებად ტერიტორიაზე სამკურნალოდ გადმოსულია 4 პაციენტი, აქედან 2 – სამედიცინო პერსონალი. მათგან ერთი უკვე გამოჯანმრთელდა, სამი კი ისევ აგრძელებს მკურნალობას. 

•  ენგურის ხიდთან გაიხსნა საველე ჰოსპიტალი. ჰოსპიტალში მყოფი ექიმები ოკუპირებული ტერიტორიიდან გადმოსულ ყველა პაციენტს სინჯავენ და შემდეგ მათ, ჩივილების შესაბამისად, სხვადასხვა სამედიცინო დაწესებულებაში ანაწილებენ.

• აფხაზეთში, კორონავირუსის აფეთქებაა მას შემდეგ, რაც იქ რუსი ტურისტები ჩავიდნენ

• აფხაზი ექიმები შიშობენ, რომ ჯანდაცვის სისტემა რუსეთთან საზღვრის გახსნას ვერ გაუძლებს

• „იმედი გვაქვს, რომ ტურისტები ჩამოვლენ“ – აფხაზეთში კარანტინის დასრულებასა და ფულის შოვნას ელოდებიან. ვიდეო

•  გამყოფ ხაზთან ახლოს გაიხსნა რუხის საავადმყოფო, რომელიც  ოკუპირებულ ტერიტორიაზე მცხოვრები მოსახლეობის უფასო სამედიცინო მომსახურების უზრუნველსაყოფად აშენდა. 

• კორონაპანდემიის გამო დაწესებული შეზღუდვების მიუხედავად, მთავრობას არ შეუჩერებია აფხაზეთსა და ცხინვალში მცხოვრები ადამიანებისთვის სხვადასხვა სამედიცინო მომსახურება. 

22 მარტიდან დღემდე, ოკუპირებული რეგიონებიდან საქართველოს კონტროლირებად ტერიტორიაზე 1000-მდე ადამიანი გადმოვიდა, აქედან 316 ადამიანი, რომლებსაც სამედიცინო დახმარება სასწრაფოდ სჭირდებოდათ, პირდაპირ საავადმყოფოებში გადაიყვანეს, 589 ადამიანს კი შესაბამისი სამედიცინო დახმარება კარანტინის გავლის შემდეგ გაუწიეს.

•  აფხაზურ და ოსურ ენებზე ითარგმნა და გავრცელდა საინფორმაციო მასალები covid-19-ზე, ასევე დაავადებათა კონტროლის ეროვნული ცენტრის მიერ მომზადებული პროტოკოლები და სახელმძღვანელოები. 

•  ოფიციალურ ვებ-გვერდზე www.stopcov.ge არსებული ინფორმაცია ხელმისაწვდომი გახდა აფხაზურ და ოსურ ენებზე.

•  ქართველი სპეციალისტები, გამოცდილების გაზიარების მიზნით, ადგილობრივ ექიმებს რეგულარულად უწევენ ონლაინ-კონსულტაციას.  საქართველოს ხელისუფლების მხარდაჭერით, აფხაზეთში ჩავიდა ჯანდაცვის მსოფლიო ორგანიზაციის მისია, ადგილზე არსებული მდგომარეობის შეფასებისა და რეკომენდაციების შემუშავებისთვის.

•  პანდემიასთან გასამკლავებლად, საქართველოს ხელისუფლებისა და საერთაშორისო ორგანიზაციების მიერ აფხაზეთს რეგულარულად მიეწოდება სამედიცინო აღჭურვილობა, მედიკამენტები და ჰიგიენური საშუალებები.

“სამწუხაროდ, ახალგორის მიმართულებით ე.წ. „გადასასვლელი პუნქტის“ დახურვის შედეგად, ამ დრომდე სრულიად ჩაკეტილი და ხელოვნურად იზოლირებული რჩება ცხინვალის რეგიონი. ხელისუფლებამ იმთავითვე გამოთქვა ადგილობრივი მოსახლეობის დახმარების მზადყოფნა როგორც საჯაროდ, ისე საერთაშორისო პარტნიორებისა და ცხელი ხაზის მეშვეობით, თუმცა ამ დრომდე ამის შესაძლებლობა არ არსებობს. 

აღნიშნულიდან გამომდინარე, წითელი ჯვრის საერთაშორისო კომიტეტს – ადგილზე მოქმედ ერთადერთ საერთაშორისო ორგანიზაციას, ეთხოვა მოსახლეობის ჰუმანიტარული და სამედიცინო დახმარების გაზრდა, რასაც კონკრეტული შედეგები მოჰყვა. უწყვეტ რეჟიმში გაგრძელდება ძალისხმევა, რათა ადგილობრივ მოსახლეობას მიეცეს თავისუფალი გადაადგილების შესაძლებლობა და კვალიფიციურ სამედიცინო მომსახურებაზე წვდომა,” – წერია შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის მიერ გავრცელებულ განცხადებაში.