გერმანიის საგარეო უწყება: საქართველოსთან ევროკავშირის ურთიერთობა უნდა გადაიხედოს
გერმანიის განცხადება
გერმანიის საგარეო საქმეთა სამინისტრო აცხადებს, რომ საქართველოს ხელისუფლება ევროკავშირის ნორმებსა და ღირებულებებს ზურგს აქცევს. განცხადება ევროკავშირის საგარეო საქმეთა ხელმძღვანელების მინისტერიალის პარალელურად, გერმანიის საგარეო საქმეთა სამინისტროს ვებგვერდზე გამოქვეყნდა
ამასთან გერმანიის საგარეო უწყების განცხადებაში მოწოდებაა, 26 ოქტომბრის საპარლამენტო არჩევნებთან დაკავშირებით ყველა საჩივრისა და ბრალდების სრული და გამჭვირვალე გამოძიებისკენ.
18 ნოემბერს ევროკავშირის საგარეო საქმეთა მინისტერიალი დაიწყო. მაღალჩინოსნებმა სხვა საკითხებთან ერთად საქართველოს მოვლენებიც განიხილეს.
რას აცხადებს გერმანიის საგარეო საქმეთა სამინისტრო
“ბოლო რამდენიმე თვის განმავლობაში ვაკვირდებით, როგორ აქცევს ზურგს ევროკავშირის ნორმებსა და ღირებულებებს საქართველოს ხელისუფლება.
ასევე, საერთაშორისო დამკვირვებლებმა დაადასტურეს, რომ საქართველოში 26 ოქტომბრის საპარლამენტო არჩევნებზე დარღვევები დაფიქსირდა
ჩვენი მოწოდება ყველა საჩივრისა და ბრალდების სრული და გამჭვირვალე გამოძიებაა. ასევე, საქართველოსთან ევროკავშირის ურთიერთობა უნდა გადაიხედოს, მათ შორის ევროკავშირში გაწევრიანების პროცესის კონტექსტში ევროკავშირის მხრიდან საქართველოს მხარდამჭერი ღონისძიებები.“ – აღნიშნულია განცხადებაში.
ევროპის ქვეყნების საგარეო საქმეთა მინისტრების შეხვედრის შემდეგ, ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ჯოზეფ ბორელი ამბობს, რომ საქართველოში ჩატარებული არჩევნების გამოძიება უნდა ჩატარდეს. ასევე, ბორელის თქმით, ევროკავშირი საქართველოში გაგზავნის მისიას, რომელიც განიხილავს დარღვევებს.
