სომხეთის პრემიერ-მინისტრი: რუსეთი რეგიონში ომს არ დაუშვებს

რუსეთი რეგიონში ომს არ დაუშვებს, – განაცხადა დღეს სომხეთის პრემიერ-მინისტრმა ნიკოლ ფაშინიანმა:

 „ვერ დავიჯერებ, რომ რუსეთი – სომხეთის სტრატეგიული პარტნიორი და მეგობარი – თავის ბერკეტებს არ გამოიყენებს, რათა რეგიონში საომარი მოქმედებების განახლება არ დაუშვას“.

ამასთანავე ფაშინიანმა განაცხადა, რომ აზერბაიჯანის პრეზიდენტ ილჰამ ალიევთან ყარაბაღის კონფლიქტის მოგვარებასთან დაკავშირებული მოლაპარაკებების განსაახლებლად მზად არის, მაგრამ ცალმხრივ დათმობებზე წასვლის შესაძლებლობა გამორიცხა:

 „ჩვენთვის აზერბაიჯანის აგრესიული, მილიტარისტული რიტორიკა მიუღებელია. ჩვენ პერიოდულად ვუცხადებთ თანათავმჯდომარეებს, რომ დარეგულირებისთვის მზად ვართ, თუმცა ამისთვის საჭიროა ნდობის ატმოსფერო, რომელსაც აზერბაიჯანი ანგრევს. სომხეთისგან ვერც ერთ მსგავს ნაბიჯს ვერ ნახავთ. როდესაც სიგნალს მივიღებთ, რომ აზერბაიჯანი  ორმხრივ დათმობებზე წასასვლელად მზადაა, ჩვენც განვიხილავთ, თანაც არამხოლოდ მთავრობის დონეზე, არამედ მთელ ხალხთან ერთად, თუ სად გადის ჩვენთვის დათმობის ზღვარი“.

სომხეთის პრემიერ-მინისტრმა ნატოს სამიტში თავის მონაწილეობისა და ამასთან დაკავშირებით რუსეთის ნეგატიური რეაქციის შესახებაც  გააკეთა კომენტარი. მან აღნიშნა, რომ მონაწილეობა არ მიუღია ისეთ ღონისძიებებში, რაც სომხეთის საგარეო პოლიტიკის საერთო ხაზის საწინააღმდეგო იქნებოდა.

ფაშინიანმა კიდევ ერთხელ აღნიშნა, რომ სომხეთი საგარეო პოლიტიკური ვექტორის მკვეთრად შეცვლისკენ არ წავა. სომხეთი რუსეთის ეგიდით მოქმედი კოლექტიური უსაფრთხოების შეთანხმების ორგანიზაციის წევრად რჩება.

ეს იმ კონტექსტში ითქვა, რომ ბელარუსი, კოლექტიური უსაფრთხოების შეთანხმების ორგანიზაციის წევრობის მიუხედავად, იარაღს  ყიდის აზერბაიჯანზე,  რომელიც ამ ორგანიზაციის წევრი არ არის, და სომხეთთან კონფლიქტში იმყოფება:

 „რაც შეეხება ბელარუსის პრეზიდენტთან შეხვედრას, ეს საკითხი (აზერბაიჯანისთვის იარაღის მიყიდვა – JAMnews) წამოვწიეთ და მე ჩემი შეშფოთება გამოვთქვი. ეს საკითხი დღის წესრიგში დარჩება. თუკი ჩვენ კოლექტიური უსაფრთხოების შეთანხმების ორგანიზაციაში ვართ, ჩვენ თქვენს წინაშე გვაქვს ვალდებულება, თქვენ კი ჩვენს წინაშე. ჩვენი ამოცანაა, რომ კოლექტიური უსაფრთხოების შეთანხმების ორგანიზაციაში ჩვენი მონაწილეობის პროდუქტიულობა გავზარდოთ, და შესაბამისად – გავზარდოთ თავად ამ ორგანიზაციის პროდუქტიულობაც, და ჩვენ ამისთვის ყველაფერს გავაკეთებთ“.

რაც შეეხება ევროკავშირთან ურთიერთობებს, პრემიერ-მინისტრს მიაჩნია, რომ სომხეთში მომხდარ ცვლილებებს ბრიუსელში ყველა ვერ ამჩნევს:

„ევროკავშირის ბევრი პარტნიორი ჩემთან შეხვედრისას აცხადებდა, რომ სომხეთში გარდაქმნებს მოელიან. მაოცებს, რომ ევროკავშირში არსებობენ თანამდებობის პირები, რომლებიც სომხეთში არსებულ ცვლილებებს ვერ ამჩნევენ“.

ჩვენ, ფინანსური მხარდაჭერის (ევროპული სტრუქტურებიდან) გამო, არაფერი გაგვიკეთებია, და არც ვაპირებთ, რომ გავაკეთოთ. ყველაფერი მხოლოდ იმ მანდატის გასამართლებლად კეთდება, რომელიც ჩვენ ხალხისგან მივიღეთ. მინდა, რომ ეს ცხადი იყოს“.

ფაშინიანმა ასევე კომენტარი გააკეთა რუსი პრანკერების ლეკსუსის (ალექსეი სტოლიაროვი) და ვოვანის (ვლადიმირ კუზნეცოვის) მიერ მისი სახელით ევროკავშირის მაღალი თანამდებობის პირებთან განხორციელებული სკანდალური ზარების შესახებ. ისინი თითქმის 20 წუთის განმავლობაში ესაუბრებოდნენ ევროპის კომისიის  თავმჯდომარეს ჟან-კლოდ იუნკერს, შემდეგ კი – ევროკავშირის საგარეო საქმეებისა და უსაფრთხოების პოლიტიკის უზენაეს წარმოამდგენელს ფედერიკა მოგერინის:

„იუმორის გარდა, გარკვეული პოლიტიკური ინფორმაციის დაზუსტებისადმი მისწრაფებასაც ვხედავ. ჩემი აზრით, ამ საუბრების ავტორები იმის მიხვედრას ცდილობენ, ვთქვათ, რამდენად შეუწყო ხელი ევროკავშირმა სომხეთში მომხდარ რევოლუციურ პროცესებს. იმედი მაქვს, რომ დააზუსტეს და ამით დაასრულეს. მე ჩვენს დიპლომატებს ვთხოვე, ევროპელი პარტნიორებისთვის ეცნობებინათ, რომ მე მათთან ტელეფონით არ მისაუბრია“.