სომხეთში რუსულ სამხედრო ბაზასთან დაკავშირებით ახალი სკანდალი აგორდა

სომხეთის  პრემიერ-მინისტრმა ნიკოლ ფაშინიანმა სოფელ პანიკთან, რუსეთის 102-ე სამხედრო ბაზაზე ჩატარებულ წვრთნებს სომხეთ-რუსეთს შორის ურთიერთობისა და სომხეთის სუვერენიტეტის საწინააღმდეგო პროვოკაცია უწოდა.

„ინციდენტზე პასუხისმგებელი პირები უნდა გამოვლინდნენ და პასუხი უნდა აგონ“, – განაცხადა ფაშინიანმა.

სოფლის ტერიტორიაზე განხორციელებულმა სროლებმა და აფეთქებებმა მაცხოვრებლებს შორის პანიკა გამოიწვია, რადგან ისინი წვრთნების ჩატარების თაობაზე გაფრთხილებულები არ იყვნენ.

შირაქის გუბერნატორი კარენ სარუხანიანი იქ მდებარე ბაზის წარმომადგენლებს შეხვდა. შეხვედრის შემდეგ მან განაცხადა, რომ სამხედროებმა ბოდიში მოიხადეს.

 „ისინი ამბობენ, რომ ეს ყველაფერი ფორს-მაჟორულ სიტუაციაში მოხდა, და რომ ამ წვრთნების ჩატარებას ზუსტად ამ ადგილას არ აპირებდნენ, რისთვისაც მოიბოდიშეს და დაგვპირდნენ, რომ ასეთი რამ მეტად აღარ განმეორდება.

მიმდინარეობს ოფიციალური გამოძიება, დამნაშავეები დაისჯებიან. მათ თქვეს, რომ ღონისძიებას გამართავენ, ღია კარის დღეს მოაწყობენ, და ადგილობრივ მაცხოვრებლებსაც მიიწვევენ, რათა შემთხვევით მტრობამ არ დაისადგუროს, მათ თქვეს, რომ ჩვენ მოძმე ქვეყნები ვართ, და ეს უბრალოდ დაუდევრობა იყო“.

•  გიუმრიში მდებარე რუსულ სამხედრო ბაზასთან დაკავშირებული  ტრაგიკული მოვლენებისა და დანაშაულების შესახებ. რუსული ბაზა სომხეთში: დაცვა თუ მუქარა?

 პრემიერ-მინისტრის განცხადება ყოფილი მმართველი რესპუბლიკური პარტიის წარმომადგენელმა არმენ აშოტიანმა გააკრიტიკა. მისი აზრით, სოფელ პანიკში მომხდარ ინციდენტზე ასეთი მწვავე რეაგირება საჭირო არ იყო:

 „სომხეთის სუვერენიტეტის ნებისმიერი ხელყოფა ერთმნიშვნელოვნად დაუშვებელია, მაგრამ ეს შემთხვევა ასეთი არ იყო. გუშინდელ დღეს წვრთნებთან დაკავშირებული ინციდენტი შეიძლებოდა, რომ  საზოგადოებრივ დისკურსში ამოწურულად მიჩნეულიყო – რუსი სამხედროებისგან მობოდიშების მიღებითა და ურთიერთობის სამუშაო რეჟიმში გაგრძელებით, სამომავლოდ კი მსგავსი შემთხვევების გამორიცხვით“. 

 აშოტიანის თქმით, „რუსეთ-სომხეთის ურთერთობის სტრატეგიულ სიღრმეებთან შეუსაბამო შეფასებების გაკეთება საშიშია“.