ერევნის ბაზრობის მოვაჭრეები საგადასახადო სამსახურების მხრიდან ზეწოლას უჩივიან
დღეს ერევნის ბაზრობების ასობით მოვაჭრემ სომხეთის მთავრობის შენობასთან საპროტესტო აქცია გამართა. ისინი საგადასახადო სამსახურების მხრიდან საქონელბრუნვის კონტროლს აპროტესტებენ. ამ სამსახურების წარმომადგენლები მოვაჭრეებს შესყიდული და გაყიდული საქონლის დოკუმენტაციის წარდგენას სთხოვენ, ხოლო დაუმოწმებელი სალაროს ქვითრისთვის ჯარიმით ემუქრებიან.
მოვაჭრეები აცხადებენ, რომ ამ მოთხოვნების შესასრულებლად მათ ბუღალტრების დაქირავება მოუწევთ, „მაგრამ მოსახლეობის მსყიდველუნარიანობის შემცირების პირობებში, დამატებითი სამუშაო ადგილის შექმნა სავაჭრო წერტილების დახურვას გამოიწვევს“. წვრილ მოვაჭრეებს ასევე უჭირთ, რომ შეიძინონ ძვირადღირებული სალარო აპარატები, რათა მყიდველებზე ქვითრები გასცენ. შესყიდული საქონლის დოკუმენტაციის წარდგენაც ხშირად არ ხერხდება, რადგან მსხვილი ბიზნესის წამომადგენლები, ვისგანაც მოვაჭრეები ამ საქონელს იძენენ, ყოველთვის არ აძლევენ მათ ანგარიშფაქტურებს.
ბაზრობის მოვაჭრეები ჩივიან, რომ საგადასახადო სამსახურის თანამშრომლები მთელი დღის განმავლობაში ბაზრობის შესასვლელთან მორიგეობენ, და მყიდველებს ეკითხებიან, მისცეს თუ არა მათ გამყიდველებმა ნაყიდი საქონლის ქვითრები. ისინი ამგვარ კონტროლს „საგადასახადო ტერორს“ უწოდებენ.
დღეს საპროტესტო აქციის მონაწილეებს სახელმწიფო შემოსავლების კომიტეტის ხელმძღვანელის მოადგილე ვახტანგ მირუმიანი და იმავე კომიტეტის ოპერატიული სამძებრო სამართველოს უფროსი გარეგინ არაქელიანი შეხვდნენ.
მოვაჭრეებმა საქონელბრუნვიდან ფიქსირებული გადასახადის დაწესება შესთავაზეს. მოვაჭრეებთან შესახვედრად მისული მთავრობის წარმომადგენლები დაჰპირდნენ მათ, რომ საბოლოო გადაწყვეტილების მიღებამდე სავაჭრო კომპლექსების შემოწმება დროებით შეწყდება.
