ციხეში მყოფ აზერბაიჯანელ ბლოგერს, კიდევ 7 წლით პატიმრობა ემუქრება
აზერბაიჯანელი ბლოგერისა და პოლიტიკური აქტივისტის, მეჰმან ჰუსეინოვის წინააღმდეგ ახალი სისხლის სამართლის საქმე აღიძრა. ის ციხიდან სამ თვეში უნდა გამოსულიყო – მისი ორწლიანი პატიმრობა სრულდებოდა. ციხის ადმინისტრაცია ირწმუნება, რომ ჰუსეინოვმა დაცვის თანამშრომელს, იუსტიციის ლეიტენანტს სცემა. თუკი სასამართლო დაეთანხმება, ბრალდებულმა შეიძლება კიდევ შვიდი წელი გაატაროს ციხეში.
• აზერბაიჯანელ ბლოგერს ორი წლით პატიმრობა შეეფარდა
26 წლის მეჰმან ჰუსეინოვი პოპულარული ონლაინ ვიდეოარხისა და ფეისბუკგვერდ „სანჯაკის“ შემქმნელი და წამყვანია. თავის ვიდეოსიუჟეტებში ის ხელისუფლებას აკრიტიკებდა. ის არასამთავრობო ორგანიზაციების – თავისუფლების ინსტიტუტისა და რეპორტიორების უსაფრთხოების ერთ-ერთი დამაარსებელია.
ჰუსეინოვს ბაქოს რაიონული პოლიციის უფროსის მიმართ ცილისწამებისათვის 2017 წელს ორი წლით თავისუფლების აღკვეთა მიუსაჯეს. ის ამბობდა, რომ პოლიციის განყოფილებაში აწამეს, თუმცა სასამართლომ ეს სიტყვები ცილისწამებად ჩათვალა. უფლებადამცველმა ორგანიზაცია „Amnesty International“-მა ჰუსეინოვი „სინდისის პატიმრად“ აღიარა. ადგილობრივმა უფლებადამცველებმა მისი სახელი პოლიტპატიმრების სიაში შეიყვანეს.
მეჰმან ჰუსეინოვის უფროსი ძმა, თავისუფლების ინსტიტუტისა და რეპორტიორების უსაფრთხოების დირექტორი ემინ ჰუსეინოვი (ამჟამად შვეიცარიაში აქვს მიღებული პოლიტიკური თავშესაფარი) ბლოგერის წინააღმდეგ ახალ სისხლის სამართლის საქმეს პროვოკაციას უწოდებს.
„მას კოლონიაში აფრთხილებდნენ, რომ ციხიდან მარტში, სასჯელის ამოწურვისას ვერ გავიდოდა“, – განუცხადა ემინ ჰუსეინოვმა საინფორმაციო სააგენტო „თურანს“.
