"Zirehli jiletsiz və texnikasız" - Cənubi Osetiyadan olan hərbçilər Ukraynada döyüşməkdən imtina ediblər
Osetinlər Ukraynada döyüşməkdən imtina ediblər
Cənubi Osetiyanın paytaxtı Sxinvaldakı Rusiya hərbi bazasından bir neçə gün əvvəl Ukraynada müharibəyə göndərilən hərbçilərin bir hissəsi icazəsiz vətənə qayıdıb. Bunlar Rusiya ordusunda müqavilə əsasında xidmət edən yerli osetinlərdir. Yerli hakimiyyət orqanları nə baş verdiyini izah etmir. Mənbələr bunun əsgərlərin hazırlığının və təchizatının olmaması səbəbindən baş verdiyini iddia edirlər.
Cənubi Osetiya döyüşçülərinin gözlənilmədən Ukraynadan evə qayıtması ilə bağlı vəziyyəti “ВЧК-ОГПУ” Telegram kanalı öz mənbəsinə istinadən belə izah edib:
“Əvvəla, əsgərlər qaçmayıb, lakin onları Cənubi Osetiyanın keçmiş prezidenti (Eduard Kokoytı) və onun “Bala” ləqəbli adamı evlərinə aparıb.
İkincisi isə, onları ona görə aparıblar ki, Ukraynaya göndərilən əsgərlər 58-ci Ordunun hərbçisi kimi yox, könüllü kimi qeydə alınıblar. Baxmayaraq ki, əslində bu əsgərlər müqavilə əsasında xidmət edirlər.
Bundan əlavə, bu hərbçilər Ukraynaya “yüngül” göndərilib: zirehli jiletsiz, lazımi həcmdə silah və texnika olmadan, çünki Cənubi Osetiyadakı 58-ci Ordunun komandanlığı indiki hakimiyyətlə birlikdə hərbi personalı təmin etmək üçün ayrılan pulu intensiv yeməklə məşğul idi.
Əslində, yerli generallar və Cənubi Osetiya prezidenti şəxsən öz medallarını alsınlar deyə bu uşaqlar açıq-aşkar qırğına göndərilib.
Bu səbəblərdən də həmin hərbçilər cəbhədən geri aparılıb, onlar qaçmayıblar.
Rəhbərliklərinin korrupsioner olmasında əsgərlərin günahı yoxdur”.
Cənubi Osetiyanın keçmiş prezidenti Eduard Kokoytı Ukraynaya göndərilən əsgərlərin bəzilərinin vətənə qayıtdığını təsdiqləyib.
“Biz hamımız müharibə zonasından Osetiyaya qayıdan əsgərlərimizin vəziyyəti ilə bağlı narahatıq. Heç kimin bu adamları qınamağa, qorxaqlıqda ittiham etməyə haqqı yoxdur. Baş verənlərin əsas səbəblərini anlamaq və onların iştirakının necə təşkil edildiyini öyrənmək lazımdır…
Yadda saxlamaq lazımdır ki, yüzlərlə döyüşçümüz hazırda döyüş əməliyyatı zonasındadır və öz borcunu qəhrəmancasına yerinə yetirir. Heç bir şəraitin onların mənəviyyatını sarsıtmasına yol verilməməlidir.
Şübhə etmirəm ki, vətənə qayıdan həmin uşaqlar, LAZIM BİLƏRLƏRSƏ, iştirakları lazımi şəkildə təşkil edildiyi təqdirdə xüsusi əməliyyat zonasına qayıda və Donbasın azad edilməsinə kömək edə bilərlər. Amma vurğulayıram ki, onların iştirakının təşkili mümkün qədər məsuliyyətli olmalıdır. Biz hər bir həyatı qorumağa borcluyuq”, – Kokoytı bildirib.
Jurnalist Murat Qukemuxov “Exo Kavkaza”da “yerli ekspertlərə” istinad edərək yazır ki, məhz Cənubi Osetiya prezidenti Anatoli Bibilov Ukraynaya göndərilən Cənubi Osetiya hərbçilərinin sayının maksimum olmasına israr edib:
“4-cü bazanın komandanlığı məqamın həssaslığını (müharibədən sağ çıxan kiçik bir xalq və s.) başa düşüb və bu qədər adam göndərmək istəməyib. Amma Bibilov tərəfindən bu, Kremlə sadiqliyin nümayişi idi, hansı ki, indi xüsusilə qiymətlidir.
İndi məlum olub ki, uşaqlar siqaretsiz, isti paltarsız və zirehli jiletsiz göndəriliblər.
Cənubi Osetiya ordusunu ləğv edəndə və 4-cü Rusiya bazasında əsgərləri müqaviləli xidmətə keçirəndə Bibilovun onlardan bircə nəfərin də respublikadan kənara göndərilməyəcəyinə dair and içdiyini indi çoxları ona xatırlada bilər.
“Bizim oğlanlar fəxrlə qaldırdıqları bayraq altında öz hərbi borclarını yerinə yetirməyə gedirlər”, – prezident Bibilov Teleqram kanalında yazıb. – “Əgər faşizm uzaq sərhədlərdə əzilməsə, sabah Vətənimizə münasibətdə yenidən özünü göstərəcək”.
Yalnız bu uşaqlar arasında onun oğlu yoxdur, o, hazırda Rusiyanın nüfuzlu universitetində oxuyur”.
Məqalə müəllifinin təklif etdiyi terminlər, toponimlər, fikir və ideyalar onun özünə məxsusdur, JAMnews və ya ayrı-ayrı əməkdaşının fikir və ideyaları ilə üst-üstə düşməyə bilər. JAMnews məqaləyə yazılan təhqir, təhdid, zorakılığa çağırış kimi dəyərləndirilən və ya digər səbəblərə görə etik sayılmayan şərhləri silmək hüququnu özündə saxlayır.
