Türkiyə hakimiyyətinə Almaniyadakı türklər üçün tədbir keçirməyə yenə də icazə vermirlər

Türkiyə Xarici İşləri naziri Mövlut Çavuşoğlunun martın 7-də Hamburqda keçiriləcək mitinqdə planlaşdırılmış çıxışı təhlükəsizlik səbəbilə təxirə salınıb. Şəhər hakimiyyəti əmin edir ki, aksiyanın keçirilməsi planlaşdırılan zal yanğına qarşı siqnalizasiya xarab olduğu üçün bağlanıb.

Hamburq Türkiyə məmurlarının ölkədə keçiriləcək konstitusiya islahatlarına dəstək çıxışının təxirə salındığı dördüncü Almaniya şəhəri olub – Alman dalğası xəbər verir. Martın 5-də silsilə rədd cavabları ilə bağlı Türkiyə prezidenti Rəcəb Tayyib Ərdoğan qəzəbini ifadə edərək bildirib ki, “Almaniya artıq demokratiya yolundan azıb, hazırkı təcrübəsinin demokratiya ilə heç bir əlaqəsi yoxdur, hətta nasist rejimi ilə eynidir”.

Onun bu bəyanatı Berlini hiddətləndirib. Almaniya kansleri Anqela Merkel bildirib ki, Türkiyə prezidentinin sözlərinə “heç bir bəraət” yoxdur. O, qeyd edib ki, Ərdoğanın bəyanatı “nasistlərin cinayətlərindən əziyyət çəkmiş insanların əzablarını sadəcə bayağılaşdırır”.

Bununla yanaşı Almaniya lideri etiraf edib ki, Berlin və Ankara arasında ciddi fikir ayrılığı var, xüsusən də media azadlığı və Die Welt nəşrinin müxbiri Deniz Yücelin həbsi ilə bağlı məsələlərdə.

Türkiyədə prezident hakimiyyətini gücləndirəcək konstitusiya dəyişikliklərinə dair referendum aprelin 16-da baş tutacaq. Almaniyada referendumda səs haqqı olan 1,4 milyon türk yaşayır. Bununla bağlı Türkiyə hakimiyyəti konstitusiya dəyişikliklərini dəstək məqsədilə Almaniyada tədbirlər planlaşdırıb.