AZAL-ın qəzaya uğrayan təyyarəsi ilə bağlı istintaqın yekun hesabatı dekabradək təqdim olunacaq
Rusiyanın vurduğu Azərbaycan təyyarəsi
Azərbaycan Hava Yollarına (AZAL) məxsus təyyarənin Aktau yaxınlığında qəzaya uğraması ilə bağlı araşdırmanın yekun hesabatı bu ilin dekabr ayınadək təqdim ediləcək.
“Amerikanın səsi”nin verdiyi məlumata görə, bunu Qazaxstanın nəqliyyat nazirinin müavini Talqat Lastayev fevralın 19-da paytaxt Astanada keçirilən mətbuat konfransında deyib.
“Beynəlxalq Mülki Aviasiya Təşkilatının (ICAO) standartlarının tələbləri və tövsiyə olunan təcrübələrinə əsasən, istintaq müddəti 1 ildir və yekun istintaq hesabatı cari ilin dekabr ayına qədər tamamlanmalıdır”, Lastayev bildirib.
Qazaxıstanlı nazir müavini əlavə edib ki, hadisə ilə bağlı cinayət araşdırması artıq prokurorluğun səlahiyyətindədir və işlə bilavasitə məşğul olan əməliyyat-istintaq qrupu var.
O, həmçinin hadisə ilə bağlı ilkin hesabatın yüksək səviyyədə hazırlandığını və ICAO rəsmiləri tərəfindən yüksək qiymətləndirildiyini deyib.
İlkin hesabata pilotların danışıqlarının daxil edilməməsinin səbəbi ilə bağlı suala cavab olaraq Talqat Lastayev qeyd edib ki, danışıqların stenoqramları bütün maraqlı tərəflərin əlindədir.
“Stenoqramlara gəlincə, onlar bütün maraqlı tərəflərin əlindədir. Burada heç bir qeyri-obyektivlik ola bilməz. Bunlar deşifrələmənin aparıldığı Braziliyadan olan mütəxəssislər, bizim, Azərbaycandan, Rusiyadan, ICAO-dan olan mütəxəssislərdir. Bütün tərəflərdə bu stenoqramlar var”, Lastayev bildirib.
Bakı-Qroznı reysini həyata keçirən AZAL-ın sərnişin təyyarəsi dekabrın 25-də Qazaxıstanın Aktau yaxınlığında məcburi eniş edərkən qəzaya uğrayıb. Təyyarədə 5 ekipaj üzvü də daxil olmaqla, 67 nəfər olub. Qəza nəticəsində 38 nəfər həlak olub, 29 nəfər sağ qalıb.
Azərbaycan mediası, həmçinin “Euronews” və “Reuters” Rusiya hava hücumundan müdafiə sistemindən atılan raketin fəlakətə səbəb olması barədə materiallar dərc edib.
Dekabrın 28-də Rusiya Prezidenti Vladimir Putin “faciəvi hadisənin Rusiya hava məkanında baş verdiyinə görə” üzrxahlıq edib.
Dekabrın 29-da Prezident İlham Əliyev bildirib ki, Rusiya ərazisində, Qroznı şəhəri yaxınlığında Azərbaycanın mülki təyyarəsi kənar təsirə məruz qalaraq zədələnib və idarəetməni praktiki olaraq itirib. Onun sözlərinə görə, təyyarə elektron idaretmə vasitəsi ilə idarəolunmaz hala salınıb.
İlham Əliyev təyyarənin təsadüfən vurulduğunu, amma Rusiya tərəfinin məsələni ört-basdır etmək istədiyini vurğulayıb.
Bundan başqa, Azərbaycan Prezidenti Rusiyaya qarşı üzr istənilməsi, günahkarların cəzalandırılması və kompensasiya verilməsi kimi tələblər irəli sürüb.
Moskva isə Qazaxıstanın qəza ilə bağlı ilkin hesabatını şərh etməyib və istintaqın tamamlanmasını gözləməyə çağırıb.
