Rusiya xüsusi xidmət orqanları Facebook, Google və Viber-dən öz internet-trafikinə və şəxsi yazışmalara giriş tələb edir

Rusiya rabitə operatorlarnın hazırladığı qanun layihəsinə əsasən, 2019-cu il yanvarın 1-dən xarici internet şirkətləri öz məlumat bazasını Rusiyada saxlamalı olacaq və xidmətə görə pul ödəyəcək.

Söhbət Google, Facebook, Viber və bir neçə daha kiçik şirkətdən gedir. Onlar yeni tələbə razı olsalar, Rusiya xüsusi xidmət orqanları faktiki olaraq onların internet trafikinə və yazışmalara giriş əldə edəcək, – Reuters xəbər verir.

Yeni qanun layihəsi daha əvvəl Rusiyada qəbul olunmuş “Yarova qanununa” əsaslanır. Bu qanuna görə, bütün rabitə operatorları 2018-ci il iyulun 1-dən yarım il müddətində öz abonentlərinin bütün telefon danışıqlarnı və sms-lərini saxlamalıdır. Bu informasiya xüsusi xidmət orqanlarına, əsasən də FTX-ya lazımdır, qanunda deyilir.

Rusiyanın “Rostelekom”, “Tattelekom” və “Krımtelekom” kimi iri rabitə şirkətləri qanunun bu tələblərini yerinə yetirə bilmək üçün yeni maliyyə yatırımları etməli olub. Və indi onlar eyni zamanda iki hədəfə yönəlik yeni sxem təklif ediblər: yerli rabitə operatorlarının üzərindən maliyyə yükünün xarici internet şirkətlərinin üzərinə qoyulması və bununla da eyni zamanda FTX-nın iri sosial şəbəkələrin istifadəçilərinin şəxsi akkauntlarına və internet yazışmalarına giriş imkanı əldə etməsi.

Sxem qanunla təsbit edilmiş olacaq və əgər xarici şirkətlər bu sxemdə iştirak etməkdən imtina edəcəklərsə, Rusiya hakimiyyətinin rusiyalı istifadəçilər üçün bu saytlara giriş sürətini azaltmaq hüququ yaranacaq.

“Google, Facebook, Viber və digər [xarici şirkətlər] ümumilikdə runet trafikinin üçdə ikisinə qədərini təşkil edir” – Reuters-ə Rusiya İnternet Tədqiqatları İnstitutunun strateji layihələr üzrə direktoru İrina Levova deyib.

Onun fikrincə, şirkətləri Rusiyada trafikə görə pul ödəməyə məcbur etmək “onların biznesi üçün ədalətli yük” olacaq.