Qarabağda müharibəyə səsləyən azərbaycanlı futbol məşqçisinə hökm oxundu
Ötən ilin iyulunda orduya dəstək aksiyasında saxlanılan Mehdi İbrahimov haqda məhkəmə hökmü elan edilib. Uşaq futbol komandasında məşqçi olaraq çalışan və ailə üzvlərinin müxalif siyasi fəaliyyəti üzündən həbs olunduğu bildirilən Mehdi İbrahimov 1 il 3 ay müddətinə şərti azadlıqdan məhrum edilib.
- Tofiq Yaqublu aclığı dayandırıb: məhkəmə qətimkan tədbirini dəyişdirib
- Bakıda etiraz, 40 nəfərə yaxın iştirakçı saxlanılıb. Fotoreportaj
- Azərbaycanda polis idarəsində saxlanılanlara işgəncə verilməsinin fotoları yayılıb – DİN təkzib, bloqerlər sübut edir
2020-ci il iyulun 12-dən Azərbaycan-Ermənistan sərhədinin Tovuz istiqamətində hərbi gərginləşmə başlayıb. 4 gün davam edən eskalasiya nəticəsində, rəsmi məlumata əsasən, Azərbayan tərəfindən 12 hərbçi və bir mülki şəxs, Ermənistan tərəfindən isə 6 hərbçi həlak olub, hər iki tərəfdən onlarla insan yaralanıb.
İyulun 14-də bu hadisələrlə əlaqədar olaraq Bakıda vətəndaşlar küçələrə axışaraq, müharibə tələbi ilə orduya dəstək aksiyası keçiriblər. Həmin aksiyada onlarla insan saxlanılıb.
Saxlanılanların bir qismi az sonra azad olunsa da, əsasən müxalif Azərbaycan Xalq Cəbhəsi Partiyasının fəallarından və tərəfdarlarından ibarət olan 45 nəfər həbs edilib. Onlardan biri də Mehdi İbrahimovdur.
![](https://jam-news.net/app/uploads/2021/02/115823503_3747564995273086_3806835607233146208_o-1024x779.jpg)
Qardaşı – AXCP gənclər təşkilatının fəalı Turan İbrahimin bildirdiyinə görə, ondan və AXCP sədrinin müşaviri olan atası Məmməd İbrahimdən fərqli olaraq, Mehdi İbrahimin siyasi fəaliyyətlə, ümumiyyətlə, heç bir əlaqəsi olmayıb.
“Böyük qardaşım Mehdi. Siyasətlə və AXCP ilə heç bir əlaqəsi yoxdur. Futbol məşqçisidir. Qarabağ yürüşü zamanı polislərin müdaxilə etmədiyini görüb orduya dəstək üşün aksiyaya qatılıb. Heç bir təxribata uymayıb. Səhərə yaxın evə gələrkən bulvar ərazisində döyüb saxlayıb, 37-ci polis bölməsinə aparıblar. Onunla birlikdə saxlanılan 100 nəfərdən artıq adam sərbəst buraxılıb. Qardaşımın izahatında atamın adını gördükdən sonra buraxmayıblar. 1 həftədir bölmələrə, idarələrə, istintaq idarəsinə aparıblar”, – qardaşı saxlanılan zaman Turan İbrahim sosial şəbəkələrdə yazmışdı.
M.İbrahimov karantin qaydalarını pozaraq COVID-19 infeksiyasını yaymaqda ittiham olunaraq barəsində 4 aylıq həbs qətimkan tədbiri seçilmişdi. Həbsdə aclıq aksiyasına başlayan İbrahimovun vəkili onun haqqında qətimkan tədbirinin ev dustaqlığı ilə dəyişdirilməsi haqda vəsatət qaldırmışdı. Avqust ayında məhkəmə vəsatəti təmin etmişdi. Amma həbsdə olduğu zaman COVID-19 virusuna yoluxan İbrahimov əvvəlcə xəstəxanaya yerləşdirilərək, müalicə olunmuş, daha sonra evə buraxılmışdı.
Mehdi İbrahimovun barəsində qaldırılan cinayət işi isə az əvvəl yekunlaşaraq məhkəməyə göndərilib və bu gün məhkəmə qərarı ilə o, 1 il 3 ay müddətinə şərti olaraq azadlıqdan məhrum edilib.
Mehdi İbrahimovun yaxınları və müdafiəçiləri ən başdan olduğu kimi, onun siyasi fəal ailə üzvlərinə təzyiq göstərilməsi məqsədilə məhkum olunduğuna əmindirlər.