Laçında məskunlaşma davam edir, sakinlər isə şəraitdən narazıdır
Laçına köçürülənlər
Bu gün daha 13 məcburi köçkün ailəsi – 44 nəfər Laçın şəhərinə köçürülüb. Rəsmi məlumata əsasən, bu ailələr Laçın şəhərində vaxtilə yaşadıqları, Azərbaycanın nəzarəti altına keçəndən sonra bərpa edilən və ya yenidən tikilən evlərdə məskunlaşacaqlar.
Bununla da, artıq Laçın şəhərində 55 ailə, yəni 213 nəfər məskunlaşdırılıb. Mediada gedən məlumatlara əsasən daha əvvəl köçürülən ailələr onlar üçün yaradılmış şəraitdən narazılıq edirlər.
- Saakaşvili Gürcüstanda siyasətə qayıdır və “bütün səviyyələrdə xainlərlə mübarizə aparmaq” niyyətindədir
- “Valideynlər susur”: Ermənistanda yaşlılara qarşı zorakılıq halları artıb
- “Laçın SBM-nin atəşə tutulması Qarabağ ermənilərinə çətinliklər yaradır”
Onu da qeyd edək ki, iyunun 19-da Laçına köçürülən ailələr 2020-ci ildə məcburi köçkünlər üçün inşa edilmiş və hazırda binalarının qəzalı vəziyyətə düşdüyü deyilən Bakının Qaradağ rayonundakı “Qobu Park-3” yaşayış kompleksinin sakinləridir.
“İş yox, market yox”
Bir neçə gün əvvəl “Abzas Media” saytı Laçına ilk yerləşdirilən ailələrlə söhbətləşərək, onların şəraiti ilə maraqlanıb.
Saytın yazdığına görə, Laçına köçürülən sakinlər ərzaq təminatından və işsizlikdən şikayət edirlər.
“Biz gələndə ərzaq gətirmişdik, hələ onunla dolanırıq, o da azalıb. Burada market çətinliyimiz var. Mən işləmək istəyirəm, müraciət etmişəm, deyirlər düzələr” – mayın 27-də Laçına köçürülən Könül Nəcəfova oradakı yaşayışı ilə bağlı “Abzas Media”ya danışıb.
İlkin mərhələdə Laçına 20 ailədən ibarət 97 nəfər köçürülüb. Laçında onlarla ölkə başçısı İlham Əliyev görüşüb.
Görüşdə prezident laçınlılara bildirib ki, onların yaşayışı üçün hər cür şərait yaradılıb:
“Artıq 764 ailə Laçın şəhərində yaşaya bilər. Laçın şəhərində ikinci mərhələdə görüləcək işlərlə bağlı bizim çox dəqiq təsəvvürümüz var və beləliklə, hesab edirəm ki, ilin sonuna qədər daha çox insan Laçında yaşaya biləcək”, – deyə prezident bildirib.
Laçına ikinci köç 14 iyunda baş tutub. Daha 22 ailə (72 nəfər) Laçına yola düşüb.
Ancaq Laçına köçən sakinlər heç də hər şeyin yaxşı olmadığını deyirlər.
Könül Nəcəfova bildirir ki, 7 nəfər ailə üzvü ilə birlikdə Laçına köçürülüblər. O, ərzaq təminatı ilə bağlı çətinlik yaşadıqlarını deyir:
“Gələndə elə təsəvvür eləmirdim ki, burada market olmayacaq. Deyiblər, 15 günə market açılacaq. Burada da bizi yeməklə təmin elədilər. Prezidentlə görüşdə oğluma iş istədim, sağ olsunlar, verdilər. Abadlıqla bağlı işləyir. Gəlinimin işləməsi üçün gözəllik salonu istəmişik, ona söz veriblər”.
Laçına köçənlərdən Gündüz Təhməzov da deyir ki, o, Bakıda sürücü işləyib, ancaq Laçında onun üçün iş yoxdur. Sözlərinə görə, əlavə dəstək olmasa, orada tələbatlarını təmin edə bilməyəcəklər:
“5 nəfərlik ailəyik. İşə ehtiyacımız var. Mən sürücüyəm, dedilər, müəssisələr açılanda iş olacaq. Hazırda öz hesabımıza dolanırıq. Zəng edirik, lazım olanları qardaşlarım Bakıdan göndərirlər. Burada xırda marketlər var, onlarda da hər şey satılmır. Mən Bakıda işləyirəm, bura müvəqqəti icazə ilə gəlmişəm. Uşaqlar da azyaşlıdır, burada da heç nə yoxdur. Təlabatlar çoxdur. Evlə bağlı bir-iki çatışmazlıqlar var. Qaz yoxdur, işıq, su var. Uşaqlar körpədir, biri 8-də oxuyur, biri 5-də, anam yaşlıdır, yoldaşım şəkər xəstəsidir. Oradan aldığım 500 manatla təlabatlar ödənmir. Bakıdan işdən də zəng edirlər ki, ya orda qal işlə, ya gəl. Mən də elə adam deyiləm hər şeyi tələb edim”.
“Bir az səbrli olmaq lazımdır”
Laçın rayon İcra Hakimiyyətinin ümumi şöbəsinin müdiri Eldəniz Qasımov “Abzas Media”ya deyib ki, orada işləri əsasən Prezidentin Xüsusi Nümayəndəliyi görür:
“Bizim Laçında fəaliyyətimiz təmin olunmayıb. Laçında işləri xüsusi nümayəndəlik görür. Bizim orada nümayəndəmiz də yoxdur. Köçürülməni Qaçqınların və Məcburi Köçkünlərin İşləri Üzrə Dövlət Komitəsi ilə biz təşkil edirik. Ancaq oradakı insanların problemi üçün xüsusi nümayəndəlik var. Köçürülənlər, zəruri olan hər şeylə təmin olunublar. Orada kifayət qədər iş var, 2-3 min nəfər tikintidə işləyir. Köçən ailələrdən nə qədər adam işləyir, məlumatımız yoxdur. Gələcəkdə də kifayət qədər iş yeri olacaq, səbrli olmaq lazımdır, yaxşı olacaq. Marketlər də var, bizdə olan məlumata görə gündə onlara 3 dəfə pulsuz yemək də verilir”.
Laçın birinci Qarabağ müharibəsi zamanı 1992-ci il 18 mayda Ermənistan ordusu tərəfindən işğal edilib. İkinci Qarabağ müharibəsinə son qoyan 10 noyabr 2020-ci il tarixli üçtərəfli bəyannaməyə əsasən, Laçın rayonu həmin il dekabrın 1-də boşaldılıb və yenidən Azərbaycanın nəzarəti altına keçib.
