Koronavirus, dünya: sutkanı əks etdirən fotolar, rəqəmlər və faktlar. Yenilənir

ABŞ-da artıq 123,781 nəfər yoluxub. Yalnız ötən sutka ərzində 20 mindən artıq insan xəstələnib.

Koronavirusdan 2,229 nəfər həyatını itirib.

Amma prezident Tramp fövqəladə vəziyyət elan etməkdən imtina edir və bildirir ki, əhali bir neçə həftədən sonra işə qayıtmalıdır.

Vitse-prezident Pens bəyan edib ki, sosial dinstansiyanın dayandırılması, ofis və bizneslərin açılması ilə bağlı prezidentə öz tövsiyələrini verəcək.

İspaniya kralı VI Filippin əmisiqızı, şahzadə Mariya Tereza koronavirusdan vəfat edib. Onun 86 yaşı vardı. O, Avropanın monarx sülalələri arasında COVID-19 virusunun ilk qurbanı olub.

İspan kralının özündə isə test neqativ nəticə verib.

Kral ailəsinin daha iki nümayəndəsi koronavirusa yoluxub: Böyük Britaniya kraliçası II Yelizavetanın oğlu, Britaniya taxtının varisi şahzadə Çarlz və Monakonu idarə edən knyaz II Alber.

ABŞ – 104,256 xəstə

İtaliya – 86,498 xəstə.

Çində 2019-cu ilin dekabrında epidemiya başlayan andan indiyə qədər 81,394 nəfər xəstələnib.

Bütün dünya ölkələri arasında ən çox xəstələnənlər ABŞ-da qeydə alınıb – 104,256 nəfər.

1,704 nəfər ölüb.

Yerli həkimlər və tibb bacıları minlərlə pasiyentin müalicəsi üçün daha çox müdafiə geyimi və avadanlıqla təmin olunmaları üçün yalvarırlar.

ABŞ-da xəstəxanalar artıq xəstələrin çoxluğunun öhdəsindən gələ bilmir. Ekspertlər bildirirlər ki, əgər dərhal tədbirlər görülməzsə, fəlakət baş verəcək.

Nyu Yorkda “Çılpaq kovboy” kimi tanınan Robert Berk bomboş “Times Square” küçəsində tibb maskası ilə fotoqrafa poza verir. 24 mart, 2020. REUTERS/Carlo Allegri

İtaliyada koronavirusdan ölüm halı çox yüksəkdir. Yalnız son sutka ərzində 969 nəfər ölüb.

Ümumilikdə qurbanların sayı 9,134 nəfərə çatıb.

Daha əvvəl Ümumdünya Səhiyyə Təşkilatının rəhbəri Tedros Adxanom Qebreesis bildirmişdi ki, İtaliyada ölüm səviyyəsinin bu qədər yüksək olması “müdafiə vasitələrinin və avadanlıqlarının xroniki qlobal çatışmazlığı” ilə bağlıdır.

İtaliyanın qədim Bari şəhərinin küçələrində addımlayan karabiner. 27 mart, 2020. REUTERS/Alessandro Garofalo

İspaniya da Avropanın ən çox ziyan çəkən ölkələrindən biridir. Son bir sutka ərzində orada 769 ölüm halı qeydə alınıb.

Ölənlərin ümumi sayı 4,858 nəfərə çatıb.

Ölkə hakimiyyəti koronavirusun yoxlanılması üçün Çin istehsalı olan 9 min test dəstini istifadədən toplayıb. Məlum olub ki, bu testlərin virusu aşkarlamaq dəqiqliyi cəmi 30 faiz təşkil edir.

Eyni testlərdən 215 min dəst almaq niyyətində olan Gürcüstan Çinin “Shenzhen Bioeasy Biotechnology” şirkətilə müqaviləni pozub.

Evlərə sifariş daşıyan kuryer. Velosipedçi Madriddə tamam boş küçə ilə məşhur La Almudena Cathedral kilsəsi və kral sarayının yanından keçib gedir. 16 mart, 2020. REUTERS/Juan Medina

Britaniyanın nüfuzlu “The Lancet” tibb jurnalının redaktoru bildirib ki, Böyük Britaniya “xaos və panika astanasındadır”, çünki hökumət səhiyyə sistemini “pandemiyaya tamam hazırlıqsız” vəziyyətdə qoyub.

Riçard Xorton nazirləri Ümumdünya Səhiyyə Təşkilatının əhalinin total test yoxlamasından keçirilməsi və sosial təmasların kəskin məhdudlaşdırılması ilə bağlı əsas tövsiyəsini yerinə yetirməməkdə günahlandırıb.

“İnfeksion xəstəliklərlə mübarizənin bu baza prinsipləri naməlum qalan səbəblər üzündən iqnor edilib”, – Xorton deyib.

Böyük Britaniya Covid-19 epidemiyasının əvvəlindən indiyə qədər gündəlik ölüm sayının ən çox olduğu ölkədir.

Baş nazir Boris Conson və səhiyyə naziri Mett Xenkok koronavirusa yoluxub.

Londonda küçə. 26 mart, 2020. REUTERS/Hannah McKay