Ermənistanın tələbilə Moskvada Azərbaycan vətəndaşı saxlanılıb
Kamil Zeynallı Rusiyada saxlanılıb
Azərbaycanda tanınmış bloqer və fitnes məşqçisi Kamil Zeynallı Rusiyada saxlanılıb. Məlum olub ki, Ermənistan Daxili İşlər Nazirliyi onu “qətl” maddəsi ilə beynəlxalq axtarışa verib. Vəkil Elman Paşayevin sözlərinə görə, bloqer bir ay müddətinə istintaq təcridxanasına salına bilər.
- Navalnının ölümü Azərbaycana təsir edə bilərmi? Bakıdan şərhlər
- “Mən Aleksey Navalnının işini davam etdirəcəyəm” – Yuliya Navalnaya videomüraciət yayıb
- “Flora Hostel” – müxtəlif incəsənət növlərini bir dam altında birləşdirən məkan
Fevralın 21-nə keçən gecə fitnes məşqçisi Kamil Zeynallı Moskvanın Domodedovo hava limanında saxlanılıb. Bu barədə onun özü Instagram sosial şəbəkəsindəki hesabında məlumat verib.
“Azərbaycana gəlirdim. Rusiyanın Domodedovo şəhər aeroportunda polislər məni saxlayıb bölməyə gətirdilər. Dedilər ki, Ermənistan məni beynəlxalq axtarışa verib. Bildirdilər ki, ya səni Ermənistana təhvil verəcəyik, ya da onlar gəlib səni burdan aparacaqlar. Səhər məhkəmə qarşısına çıxarılacağam”, – o deyib.
K.Zeynallı bildirib ki, o, ötən ilin mayından axtarışa verilib:
“Lakin maydan indiyədək 3-cü dəfədir, Rusiyaya gəlib-gedirəm, indi həbs elədilər. Ümid edirəm ki, dövlət qurumlarımız mənə dəstək olacaqlar. Qoymazlar ki, məni onlara təhvil versinlər. Hazırda polis bölməsindəyəm. Gözləyirəm, inşallah yaxşı olar”.
Kamil Zeynallının vəkili Elman Paşayevin sözlərinə görə, o, bir ay müddətinə istintaq təcridxanasında saxlanıla bilər. Rusiya qanunvericiliyinə görə, bu zaman ərzində Ermənistan Rusiya Baş Prokurorluğuna lazımi sənədləri təqdim etməlidir.
“Daha sonra onun Ermənistana verilməsi məsələsinə baxılacaq”, – rusiyalı hüquqşünas Baku TV-yə müsahibəsində qeyd edib.
“Beynəlxalq konvensiyaya görə, məhbus düşmən ölkə tərəfindən axtarışdadırsa, oraya ekstradisiya edilə bilməz. Azərbaycanla Ermənistan arasında sülh müqaviləsi imzalanmayıb. Buna görə də Rusiya heç bir halda onu Ermənistana verə bilməz”, – Paşayev əlavə edib.
Əvvəlcə Ermənistan Baş Prokurorluğu qeyd edib ki, azərbaycanlı blogerin saxlanılması ilə bağlı onlarda məlumat yoxdur. Amma sonradan, erməni mənbələrinin yazdığına görə, Ermənistan Daxili İşlər Nazirliyinin mətbuat xidməti Kamil Zeynallının “qətl ittihamı ilə” beynəlxalq axtarışa verildiyini təsdiqləyib. Nazirlik qeyd edib ki, o, 44 günlük müharibə zamanı Qarabağda bir qocanın başını kəsməkdə şübhəli bilinir.
“Unikal”ın məlumatına görə, Kamil Zeynallı Ermənistan Cinayət Məcəlləsinin 135-ci (insanlıq əleyhinə cinayətlər), 137-ci (müharibə cinayətləri), 140-cı (qadağan olunmuş müharibə üsullarından istifadə etməklə hərbi cinayətlər), 147-ci (muzdluların cəlb edilməsi) və 149-cu (aqressiya) maddələri ilə ittiham olunur. Kamil Zeynallı sabah məhkəmə qarşısına çıxarılmalıdır.
Kamil Zeynallının həyat yoldaşı, tanınmış müğənni Gülay Zeynallı Azərbaycan prezidenti İlham Əliyevə müraciət edib.
“İnşallah, bu da keçər. Prezidentimdən kömək istəyirəm. Xahiş edirəm, Kamili yad ölkədə tək buraxmayın”, – deyə o yazıb.
Məsələ Rusiyadakı Azərbaycan səfirliyinin nəzarəti altındadır. Bu barədə Azərbaycan Xarici İşlər Nazirliyindən (XİN) bildirilib. Qeyd olunub ki, vətəndaşa müvafiq konsulluq-hüquqi yardım göstərilir.
“Kamil Zeynallı ötən gecə saxlanılıb. Onun həbsinin əsl səbəblərini bilmirik. Amma Azərbaycan səfirliyi dərhal bütün addımları atıb. Onun üçün vəkil tutulub. Səfirlik əlindən gələni edir”, – deyə Azərbaycanın Rusiyadakı səfiri Polad Bülbüloğlu bildirib.
2020-ci ilin oktyabrında ikinci Qarabağ müharibəsi zamanı Füzuli Rayon Məhkəməsinin qərarı ilə Kamil Zeynallı “internetdə yayılması qadağan olunmuş məlumatları yerləşdirməyə” və “hərbi vəziyyət rejiminin tələblərini pozmağa” görə 10 sutka müddətinə inzibati qaydada həbs edilib.
2020-ci ilin dekabrında 44 günlük müharibədən sonra isə Kamil Zeynallı yenidən həbs edilib. Bu dəfə o, həmin günlərdə işğaldan azad edilmiş Kəlbəcər rayonuna qanunsuz daxil olmağa cəhd etdiyinə görə 30 sutka inzibati həbs cəzası alıb.
Material yayıma hazırlanarkən Kamil Zeynallının azadlığa buraxıldığı məlum olub. Oxu.az-ın məlumatına görə, o, bu gün Bakıya qayıdacaq.
