Müxalifətçilərin homofob çıxışları Azərbaycanın sosial şəbəkələrində növbəti qalmaqala səbəb olub

Azərbaycan müxalifəti çevrəsində növbəti qalmaqal baş verib – bu dəfə Demokratik Qüvvələrin Milli Şurasının (DQMŞ) üzvləri homofob fikirlər səsləndiriblər. DQMŞ üzvlərinin jurnalist İsmayıl Cəlilovu söydükləri və onun homoseksuallığına lağ etdikləri onlayn iclasın bir hissəsi internetdə yayılıb.

Qalmaqala əsasən DQMŞ üzvü olan keçmiş deputat Gültəkin Hacıbəylinin iclasdakı çıxışı səbəb olub.

• Türkiyədə LGBT: nazir hüquqşünaslara qarşı
• “Virusla sınaq” – Azərbaycan hakimiyyəti və cəmiyyəti bu sınaqdan necə çıxıb?
• Müharibədən qayıda bilməyən insanlar. Postravmatik sindromu yenmək mümkündürmü?

İsmayıl Cəlilov və Milli Şura arasında uzun zamandır sürən polemikanı sözügedən onlayn iclasda müzakirə edərkən Gültəkin Hacıbəyli gey olduğunu gizlətməyən Cəlilovun seksual oriyentasiyasını kobud şəkildə lağlağı mövzusuna çevirib, digər iclas iştirakçıları da onu dəstəkləyib, onların arasında jurnalistin ünvanına ağır söyüş səsləndirən də olub.

MŞ təmsilçisi və Vətəndaş Birliyi Partiyasının idarə heyətinin üzvü Rafiq Manaflı isə bir az da irəli gedərək belə deyib: “Mən çox təəssüf edirəm ki, 41-45-də Hitler bu geylərin hamısını qırıb qurtarmayıb”.

DQMŞ-a daxil olmayan müxalif Müsavat və Respublikaçı Alternativ partiyalarının da ünvanına təhqir payı düşüb.

Sosial şəbəkələrdə gedən müzakirələr

Qapalı onlayn iclasın bir hissəsini əks etdirən videonun sosial şəbəkələrə necə “sızdığı” bəlli deyil, amma qalmaqal bir anda böyüyüb.

Baş verənlərin müzakirəsinə müxalif mövqeli ictimai fəalların, jurnalistlərin əksəriyyəti və sadəcə siyasətlə maraqlanan istifadəçilər də qoşulublar.

Çoxlarını yalnız homofob çıxışlar yox, həm də bütün bunların özlərini demokrat adlandıran insanların dilindən səslənməsi daha çox qəzəbləndirib.

Jurnalist Xədicə İsmayil:

“Salam verilməyəcək bir qrup adam. Milli Şuranın sədri Cəmil Həsənli bir zəhmət, aydınlıq gətirsin silahdaşlarının lüğətinə və düşüncə tərzinə. Videonu yaymıram. Özləri də görüb yəqin. Dostlar dedi, diqqətlə baxdım. Özü də orada imiş. Həm də buna niyə rahat qulaq asdığını izah etsin”.

Keçmiş Siyasi məhbus və ictimai fəal İlkin Rüstəmzadə:

“Milli Şuranın məlum iclasının videosunu izlədim. Utancverici idi… Düşünürəm ki, AXCP Milli Şura qarşısında təcili olaraq bu şəxslərin qovulması məsələsini qaldırmalı, əks təqdirdə qurumu (DQMŞ-i – red.) tərk etməlidir”. 

Hüquq müdafiəçisi Bəşir Süleymanlı:

“Məlum videoda görünən şəxslər insanların şəxsi həyatını müzakirə edərək faşist yanaşmasına haqq qazandırırlar. Bu adamlar ölkədə özlərini alternativ fikir daşıcıyaları hesab edirlər. Heç biri də etiraz etmir ki, bu nə ritorikadır. Biabırçılıq!”

Hərçənd, DQMŞ-nın tərəfində duranlar və bunu “heç bir valideyn övladının gey olmasını istəməz” fikrilə arqumentləşdirənlər də olub.

DQMŞ-dan üzrxahlıq və ittihamlar

Bütün bunlardan sonra DQMŞ üzrxahlıq etmək məcburiyyətində qalıb.

İlk olaraq bunu Gültəkin Hacıbəylinin özü edib.

“İsmayıl Cəlilov dəfələrlə mənim haqqımda aşağılayıcı statuslar yazıb, təhqir edib, böhtan atıb, ancaq reaksiya verməmişəm… Sərt, kobud ifadə işlətmişəm, razıyam, ancaq yenə deyirəm, bu bilavasitə uzun müddətdir məni və dostlarımı ədalətsiz bir şəkildə hədəfə alan şəxslə bağlı olduğu üçün emosional münasibətin qüsuru kimi ortaya çıxıb… Əgər kimsə qapalı görüşdə işlətdiyim uyğunsuz ifadəni hansısa bir qrupa və ya azlığa qarşı hörmətsizlik kimi dəyərləndiribsə, səmimi üzrxahlığımı qəbul etsin”, – Hacıbəyli Facebook səhifəsində yazıb.

Bununla yanaşı Hacıbəyli hesab edir ki, video qanunsuz olaraq hakimiyyət tərəfindən internetdə yayılıb. Bundan başqa, o, artıq iki gündür ki, hakimiyyətin onun sosial şəbəkələrdəki akkauntlarını sındırdığından, onun foto və kontaktlarının intim-xidmət səhifələrində yerləşdirildiyindən və ümumiyyətlə ona qarşı “virtual müharibə” aparıldığından şikayət edib.

Daha sonra DQMŞ-nin sədri Cəmil Həsənli də rəsmi açıqlama ilə çıxş edib. O da hesab edir ki, video sosial şəbəkəyə hakimiyyət tərəfindən yerləşdirilib və bunu kiber-cinayət kimi, həmçinin hökumətin müxalifətə qarşı casusluq etməsinin növbəti sübutu kimi dəyərləndirib. Bu videonu öz səhifəsində paylaşanları isə Həsənli hakimiyyətin əlaltısı və cinayət iştirakçısı adlandırıb.

DQMŞ üzvlərinin homofob çıxışlarına gəlincə isə Həsənli deyib:

“Bu videonun ardı göstərilsəydi, hamıya aydın olardı ki, belə çıxışların cavabında kəskin etiraz bildirilib. Belə çıxış edənlərə dərhal bildirilib ki, bu, DQMŞ-nın prinsiplərinə ziddir. Milli Şura istisnasız bütün vətəndaşların haqlarını qoruyur, milli, dini, cinsi və ya başqa əlamətindən asılı olmayaraq. Bir də xatırladıram ki, bir neçə il əvvəl polis LGBT nümayəndələrinə qarşı ova başlayanda Milli Şura açıq etirazla buna qarşı çıxıb”.