Müharibə meydanında başkəsənlər: Qarabağdan səs-küylü video müzakirə mövzusuna çevrilib

Sosial şəbəkələrdə iki hərbçinin bir kişinin başını kəsdiyini əks etdirən video yayılıb. Bildirilir ki, video ikinci Qarabağ müharibəsində çəkilib və orada azərbaycanlı hərbçilər erməni kişini öldürür.

• Şərh: Qarabağda hadisələrin üç ssenari üzrə inkişafı – Bakıdan baxış 
• Şərh: Qarabağ və Ermənistanın aqibəti necə olacaq? – Yerevandan baxış

Video bütün Qafqazda, ilk növbədə də Azərbaycanda və Ermənistanda böyük rezonans doğurub.

Azərbaycanda reaksiya

Çoxları bu kadrları erməni tərəfinin Azərbaycan ordusunu nüfuzdan salmaq üçün qəsdən hazırladığı feyk adlandırır. 

Amma baş verənləri qınayan və Azərbaycan hakimiyyətindən faktı ciddi araşdırmağı və günahkarların sərt cəzalandırılmasını tələn edənlər də çoxdur.

Sosial şəbəkə istifadəçilərinin bir qismi isə yazır ki, belə bir hadisə olubsa da, bunu çəkmək və nümayiş etdirmək olmazdı.

Azərbaycanın Baş Prokurorluğu ikinci Qarabağ müharibəsi zamanı hər iki tərəfdən törədilən hər bir hərbi cinayət faktını araşdıracağını vəd edib.

Sosial şəbəkələrin Azərbaycan seqmentində istifadəçilərin xarakterik şərhləri:

“Bütün baş, qulaq kəsənlər də, onların videosunu çəkib bəh-bəhlə paylaşanlar da, sosial şəbəkədə onlara əhsən deyənlər də qanun qarşısında cavab verməlidir. Müharibə hər şeyə haqq qazandırmır. Azərbaycan Respublikası Müdafiə Nazirliyi, Azərbaycan Respublikasının Baş Prokurorluğu, ictimaiyyətə araşdırmaların nəticələri barədə məlumat verin”, – tanınmış jurnalist Xədicə İsmayıl yazıb.

Daha bir şərhi digər tanınmış jurnalist hazırda Almaniyada mühacirətdə yaşayan Əfqan Muxtarlı paylaşıb:

“Bəxtimizə müharibələrin ən iyrənci düşüb. Etnik müharibələrdə xüsusi amanslzlıq, qəddarlıq, qətllər adi hala cevrilir. Etnik nifrət bütün insani hissləri arxa plana keçirir. Hər döyüşdən, hər atəşkəsdən sonra bizi düşündürən ən ümdə sual qarşı tərəfdən neçə nəfərin ölməsi olur. 

Azad edilən ərazilərdən cox düşmənin canlı itkisinə sevinirik. Qarşı tərəfdə eynən bizim kimi düşünür. Etnik müharibədə bir nömrəli məqsəd daha çox düşmən öldürməkdir. 

Müharibəni sözün bütün mənalarında Vətən müharibəsinə cevirməliyik. Orduda ciddi islahat aparılmalıdır. Yalnız silahlanmada, təlimlərdə yox. Əsgər güclü pisixoloji hazırlıq kursu keçməlidir. 

Bu olmasa, coxlu baş kəsmə səhnələri görəcəyik. Unutmayaq ki, münaqişə bitməyib və üçüncü Qarabağ savaşı qacılmazdır”.

Bu videonun feyk ola biləcəyini ehtimal edən istifadəçinin şərhi:

“Baş kəsmək düşündüyümüz qədər sadə və asan bir iş deyil. İŞİD-lə əlaqədar baş kəsmə videolarının çoxunun sonradan saxta olduğu ortaya çıxdı. Bir qismini isə xüsusi xidmətin agentləri “İŞİD”-çi kimi icra ediblər. […] Gələk bizdəki epizoda. Bir adam çıxıb demir ki, o, mənim qonşumdu, yaxud dayımoğludur”.

Ermənistanda reaksiya

Ermənistanda videoni təxminən eyni cür şərh edirlər, həm hakimiyyət səviyyəsində, həm də sosial şəbəkələrdə:

“Azərbaycan tərəfdən hərbi əsirlərə və girov kimi saxlanılan şəxslərə qarşı qeyri-insani davranış halları bitmir. [Onlar] amansız işgəncələrə və diri-diri başlarının kəsilməsinə məruz qalırlar. Eynən Yaxın Şərqdə İŞİD-in girovlarla etdiyi kimi”, – Ermənistanın XİN rəhbəri Ara Ayvazyan dekabrın 8-də Moskvada rusiyalı həmkarı Sergey Lavrovla görüşdən sonra keçirlən mətbuat konfransında bildirib.

Ermənistanın ombidsmeni Arman Tatoyan bildirib ki, hərbi cinayətlərlə bağlı beş hesabat hazırlayıb və beynəlxalq strukturlara təqdim etməyə hazırlaşır.