“Meydan TV”nin əməkdaşları qaçaqmalçılıq ittihamı ilə saxlanılıblar, jurnalistlər siyasi təqib olduğunu bildirirlər
Azərbaycanda həbslər – Meydan TV
Dekabrın 7-də bir qrup şəxs tərəfindən qabaqcadan əlbir olaraq xarici valyutanı qaçaqmalçılıq yolu ilə keçirmək ittihamı ilə Bakıda ötən gecə saxlanılan Meydan TV internet nəşrinin 5 əməkdaşı və müstəqil jurnalist Ramin Dekoya qarşı ittiham irəli sürülüb.
Saxlanılan jurnalistlər:
• Aynur Elgünəş (Qənbərova)
• Aytac Tapdıq (Əhmədova)
• Xəyalə Ağayeva
• Natiq Cavadlı
• Aysel Umudova
• Ramin Deko (Cəbrayılzadə)
Bakıda Meydan TV-nin əməkdaşları saxlanılıb, onlar qaçaqmalçılıqda ittiham olunur, jurnalistlər bunun siyasi təqib olduğunu bildirirlər.
Qeyri-rəsmi məlumata görə, dekabrın 6-da ümumilikdə saxlanılanların sayı 13 nəfər olub, daha sonra onlardan bəziləri sərbəst buraxılıb.
Jurnalistlər Xəyalə Ağayeva, Aysel Umudova və Aytac Tapdıqın vəkilləri bildiriblər ki, müvəkkilləri özlərini təqsirli bilmir və cinayət işini peşə fəaliyyətləri ilə əlaqələndirirlər.
“Meydan TV” jurnalistləri daha əvvəl həbs olunan jurnalistlər kimi Azərbaycan Cinayət Məcəlləsinin 206.3.2-ci (qaçaqmalçılıq, bir qrup şəxs tərəfindən qabaqcadan əlbir olaraq törədildikdə) maddəsi ilə ittiham olunurlar. Bu ittihamla onları 5 ildən 8 ilədək azadlıqdan məhrumetmə cəzası gözləyir.
Onların bəzilərinin evlərində axtarış aparılıb, bəzi avadanlıqları və şəxsi əşyaları müsadirə edilib.
Daxili İşlər Nazirliyindən verilən məlumata görə, müstəqil jurnalist Ramin Cəbrayılzadə (Deko) ölkəyə qanunsuz valyuta gətirilməsi ilə bağlı daxil olan məlumat əsasında polis tərəfindən saxlanılıb.
Rəsmi məlumatda eyni istintaq çərçivəsində daha bir neçə nəfərin saxlanıldığı bildirilib.
“Meydan TV” rəhbərliyi jurnalistlərin saxlanılması və dindirilməsinin qanunsuz olduğunu bildirir və səslənən bütün ittihamları rədd edir.
“Fəaliyyətimiz başlayandan jurnalistlərimiz həbsə, onlar və ailələri təqiblərə, müxtəlif təzyiqlərə, təhdidlərə məruz qalıb. Bizimlə işləyən jurnalistlərin ölkədən çıxışı qeyri-qanuni olaraq qadağan edilib.
Saytımız 2017-ci ildən Azərbaycanda rəsmi olaraq bloklanıb. Kanalın sosial media hesabları dəfələrlə kiberhücumlara məruz qalıb, məlumat və materiallar silinib.
“Meydan TV” yarandığı gündən ölkədə baş verən hadisələri, vətəndaşların problemlərini, şikayət və müraciətlərini lazımi səviyyədə işıqlandırmağa çalışır.
Məqsəd ölkədə müstəqil və alternativ media yaratmaq, insanları məlumatlandırmaqdır. Yarandığımız gündən bizə qarşı edilən təzyiqlər, ittihamlar əsassızdır. Bir daha bildiririk ki, jurnalist fəaliyyətimizi davam etdirəcəyik”, – deyə nəşrin yaydığı bəyanatda bildirilir.
