ABŞ səfiri: NKM-in bağlanması məsələsini ATƏT çərçivəsində və Cenevrə müzakirələrində qaldırırıq

ABŞ-ın Gürcüstandakı səfiri İan Kelli yanvarın 26-da İnquri çayı boyunca Abxaziya ilə inzibati sərhədin Xurça-Nabakevi və Orsantiya-Otobaya məntəqələrində olub. Diplomat Suxuminin sərhəddəki nəzarət-keçid məntəqələrini (NKM) bağlamaq qərarıyla bağlı vəziyyətlə yerindəcə tanış olub.

İan Kelli bu faktla bağlı narahatlığını bildirib. Onun sözlərinə görə, NKM-nin bağlanması yerli əhalinin hərəkət imkanlarını məhdudlaşdıracaq.

“Biz Abxaziyanın müstəqilliyini tanımırıq və müvafiq olaraq heç bir inzibati sərhəd xəttini, nəzarət-keçid məntəqəsini də tanımırıq. ABŞ mövqeyi ondan ibarətdir ki, Gürcüstan beynəlxalq aləmin tanıdığı sərhədlər çərçivəsində mövcudluğunu sürdürür. O ki, qaldı bu qərarın [NKM-in bağlanması haqda] hansı yolla dəyişdirilə biləcəyinə dair mexanizmlərə, biz bu məsələni ATƏT çərçivəsində qaldıracağıq. Əlbəttə, həm də Cenevrə danışıqları çərçivəsində”, – Kelli Gürcüstanın Rustavi-2 telekanalına bildirib.

Abxaziya hakimiyyətinin keçid məntəqələrinin çoxunun bağlanması ilə bağlı qərarına BMT-nin daimi əlaqələndiricisi, BMT-nin Gürcüstandakı inkişaf proqramının daimi nümayəndəsi Nill Skot reaksiya verib.

Onun yaydığı bəyanatda deyilir ki, Xurça-Nabakevi və Orsantiya-Otobaya NKM-in bağlanması sərhədyanı kəndlərin sakinlərinə mənfi təsir göstərəcək və onların izolyasiyasına səbəb olacaq.

BMT əlaqələndiricisi tərəfləri insan haqlarına hörmət etməyə və bu qərarın mümkün fəsadlarını nəzərdən keçirməyə çağırıb. Gürcüstan tərəfi vəziyyətlə bağlı beynəlxalq ictimaiyyəti məlumatlandırmaq niyyətindədir.

“Biz bütün tərəflərlə və partnyorlarla əlaqədəyik və insanların hərəkətinin məhdudlaşdırılmaması üçün mümkün olan hər şeyi edirik. Sərhədin bağlanması nəticəsində yerli əhali üçün ağır humanitar vəziyyət yaranacaq. Gürcüstan hakimiyyətinin sərhədin bağlanmasına münasibəti birmənalı mənfidir”, – Barışıq və Vətəndaş Bərabərliyi üzrə dövlət naziri KetevanTsbxelaşvili bildirib.

“Nəzarət-keçid məntəqələrinin bağlanması bütün diplomatik səviyyələrdə pislənməlidir. Amma Gürcüstanın diplomatik missiyaları çox passivdir”, – “Milli Hərəkat”ın nümayəndəsi Nika Rurua bildirib.

Suxuminin qərarına görə, inzibatı sərhəddəki altı nəzarət-keçid məntəqəsindən dördü bağlanıb. Abxaziya hakimiyyəti ancaq bir – İnqur körpüsündəki NKM-ni saxlamaq niyyətindədir. Buna görə sakinlərin çoxu problemlə üzləşəcək, çünki gürcü tərəfinə keçmək üçün bundan sonra əlavə on kilometrlərlə yol qət etmək lazım olacaq.

Məqalədə ifadə olunmuş fikirlər müəllifin terminologiyasını və baxışını ifadə edir, redaksiyanın mövqeyilə üst-üstə düşməyə bilər.