2020-ci il oktyabrın 8-də Qarabağda baş verən hərbi əməliyyatlarla bağlı xəbərlər

Ermənistanın Müdafiə Nazirliyi suriyalı muzdluların Qarabağ münaqişəsində iştirakına dair video yayıb. “Zinuj” (silahlı qüvvələr) teleproqramında Afrində çəkilmiş video nümayiş olunub. Videoda bir nəfər toplaşanlara müraciət edərək bildirir ki, Azərbaycanda islam savaşı gedir.

Daha əvvəl beynəlxalq media, o cümlədən də Britaniyanın “Guardian” və “Reuters” kimi nüfuzlu media orqanları da Türkiyənin Azərbaycana Suriyadan muzdlular gətirdiyi haqda yazıb.

Azərbaycan Müdafiə Nazirliyinin mətbuat xidməti qarşı tərəfdən əldə olunan hərbi qənimətlərin növbəti videogörüntüsünü təqdim edib.

Dağlıq Qarabağ ombudsmeni Artak Beqlaryan bildirib ki, Kazançetsots kilsəsinə bu gün ərzində artıq ikinci zərbə zamanı jurnalistlər yaralanıb. Onlar hadisə yerində ötən zərbənin nəticələrini çəkirmiş.

“Bu, kilsəyə və jurnalistlərə qarşı qəsdən və məqsədyönlü hücumdur, çünki onları dronlardan izləyiblər”, – ombudsmen Twitter-də yazıb.

Ermənistan mediası rusiyalı jurnalistlərin zərər çəkdiyini xəbər verib.

Rusiya XİN-in rəsmi nümayəndəsi Mariya Zaxarova bildirib ki, Zohrab Mnatsakanyan 11-13 oktyabrda Moskvada olacaq və rusiyalı həmkarı Sergey Lavrovla Qarabağ münaqişə zonasındakı vəziyyəti müzakirə edəcək.

“Rusiya həm milli səviyyədə, həm də ATƏT-in Minsk Qrupu çərçivəsində atəşin dərhal dayandırılması və danışıqlar prosesinin bərpa olunması üçün şəraitin yaradılması istiqamətində ardıcıl olaraq hər cür cəy göstərir”, – Zaxarova həftəlik brifinq zamanı bildirib.

O vurğulayıb ki, Ermənistan və Rusiya arasında ikitərəfli münasibətlər müttəfiqlik xarakteri daşıyır və Moskvada ümid edilir ki, Ermənistanın xarici işlər nazirinin Moskvaya səfəri “Qafqazda stabilliyin və təhlükəsizliyin möhkəmlənməsinə şərait yaradacaq”.

“Gündüz saatlarında yerdəyişməyə cəhd göstərən düşmənin döyüş texnikası artilleriya atəşi ilə məhv olunub. Düşmən hərbi kolonu darmadağın edilib” – Azərbaycan Müdafiə Nazirliyinin mətbuat xidməti xəbər verib.

Cenevrədə Qarabağdakı eskalasiya ilə bağlı ATƏT-in Minsk Qrupunun vasitəçiliyi ilə danışıqlar başlayıb. Hazırda məlum olanlar (“RİA Novosti”nin məlumatına əsasən):

“Dağlıq Qarabağ üzrə danışıqlar cümə axşamı Cenevrədə ATƏT-in Minsk Qrupunun həmsədrlərinin (Rusiya, Fransa, ABŞ) və Azərbaycan nümayəndələrinin iştirakı ilə keçir.

Görüş BMT hüduudlarından kənarda, məxfi yerdə və qapalı formatda təşkil olunub. Orada ATƏT-in Rusiya, Fransa və ABŞ-dan olan həmsədrləri iştirak edir”.

Yunanıstan XİN-in öz səfirini məsləhətləşmələr üçün geri çağırması qərarına cavab olaraq Azərbaycanın Afinadakı səfiri də məsləhətləşmələr üçün Bakıya çağırılıb – Azərbaycan Xarici İşlər Nazirliyinin mətbuat xidmətinin məlumatında deyilir.

Azərbaycan SQ-nin açdığı artilleriya atəşi nəticəsində yerlilərin Şuşanın əsas rəmzlərindən biri saydığı Kazançetsots kilsəsinə (Müqəddəs Xilaskar İsa məbədi) böyük ziyan dəyib. Məbədin dağıldığı haqda Dağlıq Qarabağ İnformasiya Qərargahından xəbər verilib. Ermənistan mediasının jurnalistləri bildiriblər ki, atəşə tutulduğu zaman kilsədə uşaqlar olub və onlar hələ də güclü sarsıntı içindədirlər.

“Bu gün səhərə olan vəziyyətə görə, Ermənistan silahlı qüvvələri tərəfindən Azərbaycan müki əhalisinin atəşə tutulması nəticəsində 31 mülki şəxs həlak olub, 154 nəfər müxtəlif dərəcəli bədən xəsarətləri alıb”, – Azərbaycanın Baş Prokurorluğunun mətbuat xidmətindən bildirilib.

133 mülki obyekt, 928 ev və 45 yaşayış binası atışma nəticəsində yararsız vəziyyətə düşüb.

“Ermənistan silahlı qüvvələri Bərdə rayonu ərazisinə “Toçka-U” taktiki raket kompleksindən atəş açıblar”, – Azərbaycan Müdafiə Nazirliyinin mətbuat xidmətindən bildirilib.

“Səhər saatlarından başlayaraq Ermənistan silahlı qüvvələri Goranboy, Tərtər, Ağdam rayonlarının kəndlərini artilleriya atəşinə tutur. Ölən və yaralananlar var”, – Azərbaycan Müdafiə Nazirliyinin mətbuat xidmətinin məlumatında bildirilir.

“Ermənistan silahlı qüvvələri Bərdə və Ağcabədi rayonlarının kəndlərini atəşə tutur. Azərbaycan Ordusu adekvat tədbirlər görür”, – Azərbaycan Müdafiə Nazirliyinin mətbuat xidmətinin məlumatında bildirilir.

Ermənistan rəhbərliyini əraziləri təhvil vermək üçün Azərbaycanla sövdələşməkdə ittiham edən Stepanakert sakini Yerevanda saxlanılıb. Bu haqda Ermənistanın baş naziri Nikol Paşinyan Facebook səhifəsində bildirib.

Baş nazir bir neçə gün əvvəl “müəyyən insanların ön cəbhədə mövqelərdən birinə getdiyi və döyüşən əsgərləri Nikolun torpaqları satdığına inandırmağa çalışdığı” haqda xəbər tutub. Paşinyanın sözlərinə görə, hərbçiləri Ermənistan və Azərbaycan hakimiyyətlərinin bu müharibə ilə bağlı razılığa gəldiklərinə və buna görə də mövqeləri qorumağın mənasının olmadığına inandırmağa çalışıblar.

“Mənin göstərişimlə DTX araşdırmağa başlayıb və Yerevanda əsas şəxslərdən biri, Stepanakert sakini tapılıb və həbs edilib. Qaldırılmış cinayət işi çərçivəsində istintaq aparılır”, – Nikol Paşinyan yazıb.

O, belə bir informasiyası olan hər kəsi Milli Təhlükəsizlik Xidmətinə müraciət etməyə çağırıb.

Gecə boyu vəziyyət mahiyyət etibarilə dəyişməyib, gərgin, amma stabil olub – Qarabağ Müdafiə Nazirliyindən bildirilib:

“Ayrı-ayrı hissələrdə atışma, raket, artilleriya zərbələri davam edib. Hazırda şimal və cənub istiqamətlərində hərbi əməliyyatlar davam edir”.

Oktyabrın 8-də səhər cənub istiqamətində, Cəbrayıl şəhərinin kənarında Azərbaycan tərəfinin hücum cəhdi dəf edilib.

Qarabağda döyüşlərin 12-ci günü.

• • Sentyabrın 27-də döyüşlər başlayandan Ermənistan tərəfdən 320 nəfər hərbçi, 21 nəfər dinc sakin həlak olub, 80 nəfər dinc sakin yaralanıb. Azərbaycan tərəfdən 30 nəfər dinc sahin həlak olub, 143 nəfər yaralanıb. Azərbaycan tərəfdən həlak olan hərbçilərin sayı bəlli deyil. Ekspertlər artıq 12-ci gündür davam edən döyüşlərin intensivliyini nəzərə alaraq hesab edirlər ki, hər iki tərəfdən ölənlərin sayı çoxdur.

• Tərəflərin bildirdiyinə görə, döyüşlər bütün cəbhə boyu davam edir.

• Stepanakertin (Qarabağın paytaxtı) də, Azərbaycan ərazilərindəki yaşayış məntəqələrinin də atəşə tutulması davam edir.

• Ermənistanın Müdafiə Nazirliyindən bildirilib ki, Ermənistan hərbçiləri Varanqataq (Lulasaz) yüksəkliyinin qaytarıldığını və mövqelərinin yaxşılaşdırıldığı bildirilib. Azərbaycanın Müdafiə Nazirliyi bu informasiyanı təkzib edib.

• Rusiya prezidenti Qarabağda döyüşləri şərh edib və deyib ki, “çox məyus olur”, çünki “həm Azərbaycan, həm Ermənistan, həm də Qarabağda bizə yad olmayan insanlar yaşayır”. Putin həmçinin bildirib ki, Ermənistan ərazisində döyüş getmir və “Yerevanın Moskvaya müttəfiqlik öhdəliklərinin yerinə yetirilməsi ilə bağlı heç bir sualı yoxdur”.

• Avropa Parlamentində dinləmələr keçirilib, region ölkələrinin Qarabağda eskalasiyaya cəlb oluna biləcəyi ilə bağlı narahatlıq ifadə olunub.

• Oktyabrın 8-də ATƏT-in Minsk Qrupunun həmsədrləri (Qarabağ münaqişəsi üzrə əsas vasitəçilər) kimi Fransa, Rusiya və ABŞ nümayəndələri Azərbaycanın və Ermənistanın xarici işlər nazirləri ilə Cenevrədə görüşəcəklər. Analoji görüş oktyabrınn 12-də Moskvada da planlaşdırılıb.

• 2020-ci il oktyabrın 7-də Qarabağda baş verən hərbi əməliyyatlarla bağlı xəbərlər, reportajlar, foto/video