Azərbaycanda vəzifəli şəxslər həbs edilib. Xarici İşlər Nazirliyində korrupsiya əməliyyatı keçirilib
Xarici İşlər Nazirliyinin Tender Komissiyasının sədri Fərhad Mollazadə, İşlər İdarəsinin Təsərrüfat şöbəsinin müdiri Səlim Əlizadə və Konsulluq idarəsinin Konsulluq-hüquq şöbəsinin rəisi Nurupaşa Abdullayev, rəsmi məlumata görə, rüşvət aldıqları üçün iyulun 3-də həbs olunublar.
Dövlət Təhlükəsizlik Xidmətinin verdiyi məlumata görə Xarici İşlər Nazirliyin nümayəndələrinin dövlət vəsaitlərinin ələ keçirilməsi, xarici vətəndaşların viza məsələlərinin həlli üçün rüşvət alınması barədə şübhə qeydə alınıb.
Xarici işlər Nazirliyinin işçilərinin evlərinə baxış keçirilib və hüquqi şəxslərə müəyyən işlərin görülməsi üçün rüşvət alınması barədə sənədlər tapılıb. Araşdırma zamanı işin görülməsi üçün alınan pulları da tapıblar.
Dövlət Təhlükəsizliyi Xidmətində aparılan cinayət işi üzrə Fərhad Molla-zadə və Səlim Əlizadə vəzifə səlahiyyətlərindən sui-istifadə etmə, mənimsəmə, rüşvət alma, Nurupaşa Abdullayev rüşvət alma faktlarına görə Azərbaycan Respublikası Cinayət Məcəlləsinin müvafiq maddələri ilə məhkəmənin qərarı ilə həbs ediliblər.
Həbs olunanlar cinaətlərini kamera önündə etiraf ediblər. Mediada yayılan videoda əməllərini detalları ilə danışıblar. Həmin detallar sosial şəbəkələrdə hətta ekspertlər tərəfindən müzakirəyə səbəb olub.
Elxan Şahinoğlu — politoloq, “Atlas” Araşdırmalar Mərkəzinin rəhbəri, öz Facebook səhifəsində yazır:
“Pulları Səlimə təqdim etmişdilər, o da mənə gətirmişdi. 10 faizini özümə saxlayırdım, 10 faizini Səlimə verirdim. Yerdə qalanını nazirliyin problemlərinin həlli üçün xərcləyirdik”. Bu sözləri rüşvət üstündə yaxalanan Xarici İşlər Nazirliyinin İşlər idarəsinin müdiri Fərhad Mollazadə deyib. Sonuncu cümlə o deməkdir ki, XİN problemlərini yığılan rüşvət hesabına həll edirmiş. Vay be! Azərbaycanı dünyada təmsil edən XİN nə gündə imiş. Elmar Məmmədyarov istefa vermək əvəzinə hələ bu gün Avropanın hansısa qurumu ilə onlayn konfrans keçirib”.