Davosda İlham Əliyev: “Azərbaycan Avropa ilə Mərkəzi Asiya arasında yeganə təhlükəsiz marşrutdur”
İlham Əliyevin Davosdakı müsahibəsi
Davosda Dünya İqtisadi Forumunun çərçivəsində Azərbaycan prezidenti İlham Əliyev “Azərbaycan rəhbərliyi ilə səhər yeməyi” adlı tədbirdə iştirak edib. Tədbir “Euronews” tərəfindən təşkil olunub və Əliyevin bu telekanala verdiyi müsahibədən sonra keçirilib.
Tədbirdə müxtəlif ölkələrdən olan investorlar, biznes nümayəndələri və rəsmi şəxslər iştirak edib. Müzakirələrin əsas mövzuları Azərbaycanın investisiya prioritetləri, enerji strategiyası, regional nəqliyyat əlaqələri və post-münaqişə dövründə Ermənistanla münasibətlər olub.
Enerjidən kənar sektorlar prioritet elan edilir
İlham Əliyev çıxışında bildirib ki, uzun illər Azərbaycan iqtisadiyyatının əsas dayağı enerji sektoru olub, lakin hazırda əsas diqqət iqtisadiyyatın diversifikasiyasına yönəlib. Prezidentin sözlərinə görə, bundan sonra əsas prioritetlər bərpa olunan enerji, mədən sənayesi, süni intellekt və data-mərkəzlərdir.
Əliyev qeyd edib ki, 2032-ci ilə qədər Azərbaycanda günəş və külək enerjisi üzrə istehsal gücü 8 giqavata çatdırılacaq. Bu isə daxili tələbatdan artıq enerji ehtiyatı yaradacaq və ölkəyə həm “yaşıl enerji” ixracı, həm də enerji tutumlu sahələrə – xüsusən data-mərkəzlərə investisiya cəlb etməyə imkan verəcək.
Prezident vurğulayıb ki, hazırda Azərbaycanın istifadə olunmayan enerji ehtiyatı mövcuddur və regionda bu miqyasda artıq enerji yalnız Azərbaycandadır.
Avropa investisiyalarına tənqidi yanaşma
İlham Əliyev Avropa şirkətlərinin Azərbaycanda həm bərpa olunan enerji, həm də karbohidrogen sektoruna marağının zəif olmasını açıq şəkildə tənqid edib. Onun sözlərinə görə, Avropa Azərbaycan qazının əsas alıcısı olsa da, investisiya baxımından təşəbbüs göstərmir.
Prezident xatırladıb ki, Rusiya-Ukrayna müharibəsindən sonra Avropa Komissiyasının xahişi ilə Azərbaycan Avropaya qaz ixracını artırıb və hazırda bu həcm ildə 13 milyard kubmetrə yaxınlaşıb. Bu rəqəmin artacağı gözlənilir.
Əliyev bildirib ki, Avropadan fərqli olaraq ABŞ, Böyük Britaniya, Çin və Körfəz ölkələri ilə enerji və texnologiya sahəsində əməkdaşlıq daha fəaldır.
“Azərbaycan sanksiyalardan yan keçən yeganə marşrutdur”
Nəqliyyat və logistika məsələsinə toxunan İlham Əliyev Azərbaycanın Avropa ilə Mərkəzi Asiya arasında yeganə sanksiyasız və təhlükəsiz tranzit marşrutu olduğunu deyib. Onun sözlərinə görə, Azərbaycanın alternativsizliyi məhz Rusiya və İran üzərindən keçən marşrutların sanksiya riski ilə bağlıdır.
Prezident bildirib ki, Bakı artıq limanlar, dəmir yolları, hava limanları və avtomagistrallara böyük sərmayələr yatırıb və artan yük həcmlərinə görə Ələt Beynəlxalq Dəniz Limanının genişləndirilməsi planlaşdırılır.
Bu kontekstdə Əliyev ABŞ tərəfindən irəli sürülən TRIPP – Beynəlxalq sülh və rifah marşrutu təşəbbüsünü də qeyd edib və bildirib ki, bu layihə Ermənistanı da regional nəqliyyat şəbəkəsinə daxil edə bilər.
Ermənistanla münasibətlər: “Artıq yük göndəririk və yanacaq satırıq”
Prezident İlham Əliyev çıxışında Ermənistanla münasibətlərə də toxunub. Onun sözlərinə görə, sülh razılaşmasından sonra Azərbaycan Ermənistan üçün yük daşımalarına qoyulan məhdudiyyətləri aradan qaldırıb.
Əliyev bildirib ki, artıq ilk yüklər Azərbaycan ərazisindən keçməklə Ermənistana çatdırılıb və Bakı Ermənistana neft məhsullarını bazar qiymətlərindən daha ucuz təklif edir. Prezident bunu “qarşılıqlı maraq və regional inteqrasiyanın nümunəsi” kimi təqdim edib.
Orta sinif, daşınmaz əmlak və daxili bazar
Daxili iqtisadiyyata toxunan Əliyev qeyd edib ki, işsizlik və yoxsulluq səviyyəsi rəsmi olaraq 5 faizə endirilib və orta sinif genişlənir. Prezident Bakıda həyata keçirilən “Ağ Şəhər” və “Sea Breeze” kimi iri layihələrdə mənzil alanların 70 faizinin yerli əhali olduğunu vurğulayıb.
Bu faktın alıcılıq qabiliyyətinin artdığını göstərdiyini deyən Əliyev, eyni zamanda, Azərbaycanın xarici vətəndaşlar üçün də “təhlükəsiz və komfortlu investisiya məkanı” olduğunu bildirib.
COP29 və beynəlxalq tədbirlər: “Tənqidlərə baxmayaraq davam etdik”
Prezident COP29-un Bakıda keçirilməsinə görə Azərbaycana yönələn tənqidlərə də cavab verib. O bildirib ki, neft hasil edən ölkə olmasına baxmayaraq, Azərbaycan iqlim gündəliyində məsuliyyətli mövqe tutur və bərpa olunan enerjiyə məhz bu səbəbdən yatırım edir.
Əliyev COP29-da karbon bazarı və “itkilər və zərər” fondu ilə bağlı razılaşmaların əldə olunmasını tədbirin əsas nəticəsi kimi təqdim edib.
İdman və “ölkə vitrini” siyasəti
Çıxış zamanı Formula-1, UFC turniri və Şahdağda keçiriləcək Dünya Kuboku yarışları da müzakirə olunub. Prezident bu tədbirləri Azərbaycanın beynəlxalq imicini gücləndirən “vitrin layihələr” adlandırıb və turizmə ciddi təsir göstərdiyini bildirib.
İlham Əliyevin Davosdakı müsahibəsi
