Ermənistan. Avropalı müşahidəçilər bildiriblər ki, seçkilər “yaxşı təşkil olunub”

Mərkəzi Seçki Komissiyasının dərc etdiyi ilkin nəticələrə əsasən, Ermənistan Parlamentində seçkilərdə iştirak edən 9 siyasi qüvvədən 4-ü təmsil olunacaq: hakim Respublikaçılar Partiyası, “Tsarukyan bloku”, “Yelk” bloku və Daşnaksütun EİF.

Səslərin əksəriyyətini toplamış ERP-nı yeni parlamentdə 58, “Tsarukyan” blokunu 30, “Yelk” blokunu 9, Daşnaksütun Partiyasını 7 deputat təmsil edəcək. 

ATƏT-in Demokratik İnstitutlar və İnsan Haqları üzrə Büronun (AİİHB) müşahidəçiləri bildiriblər ki, aprelin 2-də keçirilən parlament seçkiləri “yaxşı təşkil olunmuş, ümumilikdə azadlıqlar təmin edilmişdir”. Müşahidəçilərdə mənfi təəssürat seçkiqabağı rüşvət paylanması və seçicilərə təzyiq göstərilməsi ilə bağlı “etibara layiq mənbələrdən” alınan məlumatlarla bağlı olub.

ATƏT AİİHB müşahidəçi missiyasının əlaqələndiricisi İqnasio Sançes Amor nəticələrdən danışarkən, “parlamentdəki çoxluğu və hökuməti vətəndaş cəmiyyəti və beynəlxalq aləmlə əməkdaşlığa dair islahatların həyata keçirilməsi yolunda atdıqları addımları davam etdirməyə” çağırıb.

Ermənistan prezidenti də bəyanatla çıxış edərək siyasi qüvvələrə fəal və ümumilikdə nəzakətli siyasi mübarizəyə görə minnətdarlığını bildirib: “Bu, ölkənin inkişafı ilə bağlı məsələlər üzrə fikir və mövqelərin müqayisəsi və qarşılaşdırılması məqsədi daşıyan gözəl mübarizə idi”.

Sarqsyan yeni Seçki Məcəlləsinə görə səsvermə prosedurası və bu seçkilərdə müasir texnikanın (seçicilərin elektron identifikasiyası aparılır və barmaq izləri götürülürdü) istifadə olunmasına da toxunub: “Biz seçki prosesini yeni qaydalarla təşkil etdik, bunun sayəsində də kobud pozuntuların böyük əksəriyyəti keçmişdə qaldı”.

Ermənistanın birinci prezidenti Levon Ter-Petrosyan bu seçkilərdə seçicilərin 2 faizindən azının səsini toplaya bilmiş “Ermənistan Milli Konqresi – Ermənistan Xalq Partiyası” blokunda iştirak edirdi.

Seçkilərin nəticələrini dəyərləndirərkən Ter-Petrosyan bildirib: “Bizə ancaq ERP, “Çiçəklənən Ermənistan” [Tsarukyanın rəhbərlik etdiyi partiya], EİFD və “Yelk”in “pələng sıçrayışlarıyla” iqtisadiyyatı inkişaf etdirməsini, milyardlıq sərmayələr təmin etməsini, ordunu gücləndirməsini, emiqrasiyanın qarşısını almasını və xalqımız qarşısında duran əsas problemi – Qarabağ münaqişəsini nizamlamasını izləmək qalır”.

Blok seçkiqabağı kampaniyasında Qarabağ münaqişəsinin sülh yolu ilə həllini vurğulayaraq və ərazi güzəştlərini nəzərdə tutaraq seçkiyə “Sülh, barışıq, mehriban qonşuluq” devizi ilə qatılmışdı. Ekspertlər gözləyirdilər ki, blokun əldə etdiyi nəticə Ermənistan cəmiyyətinin nə qədər hissəsinin Qarabağ məsələsində güzəştə hazır olduğunu göstərəcək.

Seçici səslərinin dörd faizdən bir qədər azını toplayan və deputat mandatı ala bilməyən “Erməni dirçəlişi” Partiyasının seçkidən sonrakı bəyanatında deyilir ki, rəqiblər inzibati resurslardan istifadə edib və seçiciləri kütləvi şəkildə rüşvətlə alıblar:

“Partiya qeyd edir ki, ilk dəfə Ermənistanda siyasi partiyalar televiziyaların hərtərəfli işıqlandırması sayəsində öz seçkiqabağı proqramlarını təqdim edə bilib. Amma ideya maddi və inzibati rıçaqlara məğlub oldu. Partiya elan edir ki, seçkilərin nəticələrini mübahisələndirməyəcək, hansısa seçki sonrası kütləvi tədbirlərdə və mitinqlərdə iştirak etməyəcək. Partiya parlamentə keçə bilən bütün siyasi qüvvələri təbrik edir və uğur diləyir”.

MSK aprelin 2-də keçirilmiş seçkilərin yekun nəticələrini bir həftə ərzində elan etməlidir.