Wikileaks-ը Թուրքիայում արգելափակվել է Էրդողանի կուսակցության նամակագրության հրապարակումից հետո

Թուրքիայում Էրդողանի “Արդարություն և զարգացում կուսակցության անդամների նամակագրության հրապարակումից հետո արգելափակվել է Վիկիլիքս կայքը: Այդ մասին Վիկիլիքս նախագծի հեղինակները հայտնել են Թվիթերում:

Այսօր՝ հուլիսի 20-ին Վիկիլիքսը հրապարակել է մոտ 300 հազար էլեկտրոնային նամակ, որոնց հեղինակներն են թուրքական իշխանական “Արդարություն և զարգացում կուսակցության անդամները: Այդ փաստաթղթերը Վիկիլիքսը ձեռք է բերել Թուրքիայում կատարված հեղաշրջման փորձից մեկ շաբաթ առաջ: Վերջին նամակը 2016թ-ի հուլիսի 6-ի է, իսկ ամենահինն ուղարկվել է 2010թ-ին:

Վիկիլիքսի ներկայացուցիչները նշում են, որ չէին պլանավորում այդքան արագ հրապարակել փաստաթղթերը, և նման որոշում են կայացրել՝ տեսնելով հեղաշրջման ձախողված փորձից հետո Էրդողանի ձեռնարկած քայլերը:

Վիկիլիքսի հայտարարության մեջ ասվում է, որ նախքան փաստաթղթերի հրապարակումը վերստուգվել է դրանց աղբյուրը, և այն ոչ մի կերպ կապված չէ ապստամբների և Թուրքիայի ընդդիմության ներկայացուցիչների հետ:

Թուրքիայում հեղաշրջման փորձն ու դրա արդյունքները

Հուլիսի 16-ին Թուրքիայում զինվորականների մի մասը փորձել է հեղաշրջում անել: Փորձը ձախողվել է, և իշխանությունները որոշել են խստագույնս պատժել ապստամբներին:

Այսօրվա դրությամբ ձերբակալված է մոտ 6 հազար մարդ, աշխատանքից ազատվել է ոստիկանության 9000 սպա, ապստամբների հետ կապի համար կասկածվում է 3 հազար մարդ:

Աշխատանքից ազատվածների ընդհանուր թիվը հասնում է 50 հազարի: Նրանցից, ըստ թուրքական լրատվամիջոզների.

15200 ուսուցիչ և կրթության ոլորտի աշխատակից,

1577 – համալսարանների դեկաններ,

8777 – ՆԳՆ աշխատակից,

1500 – ֆինանսների նախարարության աշխատակից,

257 – վարչապետի աշխատակազմի աշխատակից:

Թուրքական լրատվամիջոցների փոխանցմամբ, 24 ռադիո- և հեռուստաընկերություն զրկվել է հեռարձակման լիցենզիայից:

Կատարվածով հետաքրքրվել են միջազգային կազմակերպությունները, որոնք մտահոգություն են հայտնել հազարավոր մարդկանց աշխատանքից ազատելու կապակցությամբ: ՄԱԿ դիտորդները կոչ են արել Թուրքիային հետևել օրենքի գերակայությանն ու մարդու իրավունքների պաշտպանությանը