Դիմահարդարում առանց դիմահարդարման

Եթե շարունակ մտածում եք այն մասին, թե ինչ դիմահարդարում է նորաձև 2017 թ,-ին, ապա թեթև շունչ քաշեք. հաջորդ տարվա համար ոճաբաններն առաջարկում են «դիմահարդարվել առանց դիմահարդարման»: Ոչ մի գրաֆիկա, միայն փափուկ գծեր ու թեթևակի սնգույր, բնական հոնքեր, առանց եզրային ընդգծումների շուրթեր: Մի խոսքով՝ ոճային երևալու համար հարկավոր է լինել բնական, մի քիչ էլ թափթփված, բայց մաքսիմալ խնամված:

Ցտեսություն ասեք եզրագծերով դիմահարդարմանը (contour), որն այդքան նորաձև էր 2016-ին, դասական մուգ կարմիր, ինչպես նաև փայլատ շրթներկին, վայր դրեք հոնքերն ընդգծող մատիտը և շտապեք գնելու գունավոր, փայլուն ստվերաներկեր ու նույնպիսի շրթներկ:

Բայց մի շտապեք կարծել, թե բնությունից մեզ տրված գեղեցկությունը կարելի է այդքան հեշտ ընդգծել ու տանից դուրս գալ առանց հայելու մեջ նայելու: Առաջին հայացքից հեշտ թվացող դիմահարդարումը ձեռքի հմտություն ու գրագետ աշխատանք է պահանջում: Շուրջ 1 ժամ մասնագետի հետ զրուցելուց հետո ես եկա այն եզրահանգման, որ բնական երևալը ոչ միայն հեշտ չէ, այլև փոքր-ինչ ժամանակատար է, բայց ինչ խոսք՝ արդյունավետ:

Ձեզ եմ ուզում ներկայացնել այն փոքրիկ գաղտնիքները, նրբությունները, որոնք սովորեցի ոճաբան Լուսինե Բաղդասարյանի հետ զրույցի ու դիմահարդարման վարպետության դասի ընթացքում: Նա մեզ ծանոթացնում է Chanel, Anthony Vaccarello, Fendi հանրաճանաչ նորաձևության տների նոր տենդենցներին:  

Ահա իմ լուսանկարը դիմահարդարումից առաջ:

Իսկ սա՝ դրանից հետո:

Իսկ այս 3-րդ տարբերակում առօրյա շպարն երկու շտկումով դարձել է երեկոյան:

Եթե ցանկանում եք ինքներդ կրկնել այն, ինչ ինձ պատմեց և իմ դեմքի վրա իրականացրեց Լուսինեն, ապա հետևեք ոճաբանի այս խորհուրդներին:

Խնամեք ձեր մաշկը

Որքան էլ թանկարժեք, պրոֆեսիոնալ, ծածկող կամ խիտ բաղադրության էլ լինեն հիմքային քսուկները, մաշկին առողջ տեսք հաղորդել չի լինի, եթե բնականից այն չլինի այդպիսին: Փորձեք առավելագույնս շատ ժամանակ հատկացնել դեմքի մաշկի խնամքին՝ դրան փայլ հաղորդելու ու անհարթությունները վերացնելու համար:

Բազայի օգտագործում

Նախքան տոնային կրեմն օգտագործելը դեմքի կարմիր, այտուցված, անհարթ հատվածները ծածկեք բազայով: Կանաչին խփող բազայի ընտրությունը հնարավորություն կտա դեմքի կարմրավուն գույնը կոտրել և այն չի երևա տոնային կսուկի տակից: Կանաչ գույնի բազան մաշկը կդարձնի փայլատ, ինչը կօգնի ձեզ առավել բնական դարձնել տոնային կրեմի ծածկույթը:

Ձեր մաշկի գույնին ու յուղայնությանը համապատասխան տոնային կրեմ ընտրեք

Դեմքը բազայով ծածկելուց հետո ծածկեք այն տոնային կսուկով: Կարող եք դա անել ինչպես վրձինով, այնպես էլ՝ մատներով: Կարևոր է, որ կրեմը համապատասխանի ձեր մաշկի գույնին, չլինի ավելի բաց կամ մուգ: Որպեսզի տոնային քսուկը շտկի դեմքը, անհարթություններ չառաջացնի, հարկավոր է փոքրիկ խոնավ սպունգով ևս մեկ անգամ «նստացնել» այն մաշկի վրա:

Մի ծածկեք տոնային կսուկով աչքերի շրջանը

Տոնային քսուկները նախատեսված են մաշկի շտկման համար: Դրանք նախատեսված չեն աչքերի նուրբ շրջանը հարդարելու համար, հատկապես, եթե աչքերի շուրջ հոգնածությունից գոյացած սև հետքեր ունեք: Աչքերը տակ կիրառեք համապատասխան կոնսիլերներ (concealer)՝ շտկող միջոցներ, որոնք չեն տարբերվի տոնային քսուկի գույնից կամ կլինեն մեկ երանգ ավելի բաց: Նույն կոնսիլերները օգտագործեք նաև կոպերի համար: Դրանք նախատեսված են հատուկ աչքի շրջանի համար, կօգնեն ձեզ խնամքով թաքցնել կնճիռները, ի տարբերություն տոնային կրեմների, որոնք չեն նստում անհարթ մաշկի վրա ու ավելի են ընդգծում դրանք: Կոնսիլերները կհանդիսանան նաև հիմք՝ ստվերաներկերի համար, որ դրանք չթափվեն աչքի շարժումներից:

Մաշկին փափկություն հաղորդեք

Բազայով, ապա տոնային քսուկով, իսկ աչքերը՝ կոնսիլերով ծածկելուց հետո, դեմքին հարկավոր է բնական փափկություն հաղորդել: Օգտագործեք փխրուն դիմափոշի՝ միջին չափի վրձինով, շրջանակաձև շարժումներով:

Կարևորեք սնգույրը

Նախ ընտրեք բնականին մոտ սնգույրի երանգներ, ապա վրձինի շարժումով քսեք այն ականջի ծայրից մինչև այտի փոսիկը: Սահմաններից դուրս գալով կարող եք փչացնել ողջ շպարն ու դեմքին անբանական տեսք հաղորդեք: Վրձնի շարժումներով սահմաններն աննկատելի դարձրեք: Ամեն բան չափի մեջ արեք, որ չնմանվեք ծաղրածուի:

Աչքերին խորություն հաղորդեք

Աչքերը կարելի է հարդարել ինչպես նեյտրյալ, այնպես էլ գունավոր ստվերաներկերով: Տարին գունային սահմանափակումներ այս առումով չունի: Ավելին՝ մտեք խանութ ու համարձակորեն գնեք ընդգծված փայլերով կամ մետաքսյա փայլուն ստվերաներկեր: Կարևորը՝ մի չարաշահեք, որպեսզի չստանաք գռեհիկ կամ ճչացող տեսք: Եթե որոշել եք աչքերն ընդգծել փայլի միջոցով, ապա պետք է ընտրել նեյտրալ շրթներկ և հակառակը:

Աչքին խորություն տալու համար օգտագործեք երկու երանգ: Նախ վրիձինով հարդարեք հոնքի տակն ամբողջ երկարությամբ, ապա կոպի ծալքն ընդգծեք ձեր ընտրած գույնի առավել մուգ երանգով, կոպին քսեք այն գույնը, որը ցանկանում եք գերիշխող դարձնել հարդարման ժամանակ: Կարևոր է չմոռանալ, որ գծերն այս տարի այլևս նորաձև չեն, ուստի հարկավոր է վրձնի շարժումներով աննկատ դարձնել դրանք:

Բնական հոնքեր

Հոնքերը հարդարեք բնական: Մի օգտագործեք մատիտ, ստվերաներկ կամ ոսկ, որպեսզի շտկեք դրանց գծերը: Հակառակը, դպրոցականներին բորոշ չմշակված, բնական հոնքերը ձեզ կհաղորդեն ոճային տեսք:

Շուրթերին փայլ

Օգտագործեք փայլուն շրթներկ, որը ձեզ կհաղորդի խոնավեցնող տեսք: Հրաժարվեք փայլատ շրթներկից, հատկապես դասական մուգ կարմիր գույնից: Շրթներկի ցանկացած երանգ, որը կունենա փայլ, այս տարի ձեզ ոճային տեսք կհաղորդի: Ընտրեք բաց, նեյտրալ գույները առօրյայի, իսկ հատապտղային երանգները` երեկոյան տեսք ստանալու համար:

Եվ որպեսզի առօրյա տեսքը դարձնենք երեկոյան, Լուսինեն առաջարկեց փոխել շրթներկի գույնը և փայլ հաղորդել աչքերին:

Դե ինչ, սա 2017թ.-ի դիմահարդարման միտումներն էին: Սակայն ընտրությունը ձերն է՝ դուք եք որոշում, ինչպես շպարվել և ինչ տեսք ունենալ հաջորդ տարի:

Հրապարակվել է՝ 05.01.2017