«Կա «Վրացական երազանքի» անդամների դեմ պատժամիջոցների սպառնալիք»․ կարծիք
Վրաստանի իշխանությունների դեմ պատժամիջոցներ
Դիվանագետ Վալերի Չեչելաշվիլին մեկնաբանել է Վրաստանի վերաբերյալ Եվրախորհրդարանի ընդունած նոր բանաձևն ու նշել, որ խորհրդարանի կոշտացած տոնը բոլորովին զարմանալի չէ, քանի որ այս ընթացքում գնալով կոշտանում է նաև եվրոպական ինստիտուտների նկատմամբ վրացական կառավարության տարբեր ճյուղերի վերաբերմունքը։
Անդրադառնալով Վրաստանի կառավարության անդամների նկատմամբ հնարավոր պատժամիջոցներին՝ Չեչելաշվիլին նկատել է՝ այն փաստը, որ խորհրդարանի 436 անդամ աջակցել է բանաձևին, ցույց է տալիս, որ ձևավորվել է նման մոտեցումներին աջակցող շատ կայուն մեծամասնություն։
Չեչելաշվիլին հավելել է, որ Եվրամիության հետ հարաբերությունները հասել են այնպիսի փակուղու, որ դրանք կարող են բարելավվել միայն այն դեպքում, երբ սկսեն բարելավվել Միացյալ Նահանգների հետ հարաբերությունները։
Հունիսի 17-ին Եվրախորհրդարանն ընդունել է Վրաստանի վերաբերյալ բանաձև, որում նշվում է, որ երկրի՝ Եվրամիությանը միանալու գործընթացը փաստացի կանգ է առել, իսկ դրա ողջ պատասխանատվությունը կրում է իշխող «Վրացական երազանք» կուսակցությունը։
Բանաձևի համաձայն՝ Վրաստանը չի կատարում այն 9 առաջնահերթությունները, որոնք ԵՄ-ն սահմանել է որպես երկրին անդամության թեկնածուի կարգավիճակ շնորհելու նախապայմաններ։ Հետևաբար, ըստ բանաձևի հեղինակների՝ Վրաստանը ԵՄ թեկնածու երկիր է «միայն թղթի վրա»։
Բանաձևը ԵՄ-ին կոչ է անում թիրախային պատժամիջոցներ կիրառել «Վրացական երազանքի» հիմնադիր Բիձինա Իվանիշվիլիի, նրա ընտանիքի անդամների և շրջապատի նկատմամբ։
Վալերի Չեչելաշվիլի.
«Կարելի է մի քանի եզրակացություններ անել։ Նախ, սա իսկապես համապարփակ զեկույց է, և այն ցույց է տալիս, որ Եվրախորհրդարանը շատ մանրակրկիտ պատկերացում ունի Վրաստանում այսօր տեղի ունեցողի մասին։ Երկրորդ, այն փաստը, որ այս զեկույցի տոնը կոշտացել է, մեզ համար անակնկալ չէ, քանի որ այս ընթացքում Վրաստանի կառավարության տարբեր ճյուղերի վերաբերմունքը եվրոպական ինստիտուտների նկատմամբ դարձել է ավելի կոշտ ու կոպիտ։
Կարծում եմ, որ շատ կարևոր ուղերձ էր «Վրացական երազանքին», երբ Եվրախորհրդարանը բանաձևի կետերից մեկում նշեց, որ ԵՄ պատժամիջոցների քաղաքականությունը պետք է համահունչ լինի Մեծ Բրիտանիայի և ԱՄՆ-ի մոտեցմանը։ Ակնհայտ է, որ ԵՄ-ում որոշումների կայացումը շատ ավելի դժվար է, քանի որ այն ներառում է 27 երկիր, բայց տրամադրվածությունն ու ուղղությունը լավ ձևակերպված էին։
Կարևոր է նաև այն, որ բանաձևին աջակցել են Եվրախորհրդարանի 436 պատգամավորներ։ Սա ցույց է տալիս, որ նման մոտեցումներին աջակցելու համար ձևավորվել է շատ կայուն մեծամասնություն։ Հատկանշական է, որ Եվրախորհրդարանը շարունակում է ընդգծել, որ կառավարությունը մեկ բան է, իսկ ժողովուրդը՝ մեկ այլ։
Ավելին, պատժամիջոցների համատեքստում կոնկրետ հիշատակվում են Բիձինա Իվանիշվիլին և մի շարք ինստիտուտներ, ինչպիսիք են դատավորները, դատախազները և այլն: Սա Եվրոպական հանձնաժողովի համար շատ կոնկրետ կոչ է՝ դիմելու գործողությունների:
Երբ Վիկտոր Օրբանը Հունգարիայի վարչապետն էր, նա հետևողականորեն պաշտպանում էր «Վրացական երազանքի» ներկայացուցիչների շահերը և արգելափակում էր նրանց դեմ կայացվող ցանկացած որոշում:
Այժմ, տեսականորեն, Սլովակիան կամ Չեխիան կարող էին նույնը անել, բայց չեմ կարծում, թե նրանք աչքի են ընկնում նման «սկզբունքայնությամբ»: Եվրոպական համերաշխության մաս կազմելը նրանց համար շատ ավելի կարևոր է: Հետևաբար, կարծում եմ, որ այժմ «Վրացական երազանքի» անդամների դեմ պատժամիջոցների սպառնալիքը շատ ավելի իրատեսական է։
Միաժամանակ կարծում եմ, որ Բրյուսելը չի հրաժարվի վրացական իշխանությունների առաջարկած երկխոսությունից, և ես կուզեի դա ընկալել որպես հնարավորությունների պատուհան: Դա նշան է, որ «Վրացական երազանքը» ճանաչել է ոչ միայն կուսակցության, այլև Վրաստանի առջև ծառացած սպառնալիքը, չնայած, անկեղծ ասած, ես մեծ հույսեր չեմ կապում դրա հետ: Եվրամիության հետ մեր հարաբերություններն այնպիսի փակուղի են մտել, որ Եվրոպայի հետ իրավիճակը կբարելավվի միայն ԱՄՆ-ի հետ հարաբերությունների բարելավումից հետո: Մինչ այդ դա քիչ հավանական է»։
Հետևեք մեզ — Facebook | Youtube
Վրաստանի իշխանությունների դեմ պատժամիջոցներ
