Վրաստանում մեկնարկել է «լարիականացման» ծրագիրը

Այսպես կոչված «լարիականացման» մասին օրենսդրական փաթեթի համաձայն, մինչև 2015թ-ի հունվարի 1-ը վերցրած արտասահմանյան արժույթով հիփոթեքային վարկ մարող ֆիզիկական անձինք կարող են ցանկության դեպքում միանալ երկամսյա ծրագրին և իրենց վարկերը լարիի փոխակերպել:

Քաղաքացիները կարող են ազգային արժույթով ձևակերպել մինչև 40 հազար դոլար գումար արտոնյալ փոխարժեքով՝ մեկ դելարի դիմաց 0,2 լարիով պակաս, քան ընթացիկ փոխարժեքն է: Փոխարժեքային տարբերությունը կվճարի կառավարությունը:

Սուբսիդիան չի վերաբերի նրանց, ում վարկային հանրագումարային պարտքը 2016թ-ի նոյեմբերի 28-ի դրությամբ գերազանցում է 100 հազար դոլարը:

Վարկառուները կարող են 5 օրվա ընթացքում բանկից ծանուցում ստանալ իրենց վարկերի «լարիականացման»մասին կամ դիմել բանկ ծրագրին մասնակցելու հայտով:

Ազգային բանկի տվյալներով՝ «լարիականացման» ծրագիրը կվերաբերի 27 հազար մարդու:

Վարկերի «լարիականացումից» զատ փաթեթը նախատեսում է նաև մի քանի նորարարություններ.

• Առցանց վարկերի տոկոսադրույքի առավելագույն վերին շեմը չպետք է գերազանցի 100%-ը:
• Գույքի իրացման կամ ծառայությունների մատուցման պարագայում, ինչպես նաև դրանք առաջարկելու կամ գովազդելու գինը կարող է նշված լինել միայն ազգային արժույթով:
• Միջնորդավճարների, տոկոսագումարի, վարկի տրամադրման հետ կապված ցանկացած ծախսի, ինչպես նաև վարկային պայմանագիրը խախտելու դիմաց ֆինանսական պատժամիջոցների գումարը չի կարող գերազանցել վարկի մայր գումարի կրկնապատիկը:
• 100 հազար, իսկ հաջորդ փուլից արդեն՝ 200 հազար լարիից պակաս  արտասահմանյան արժույթով վարկերի տրամադրումն արգելվում է:

Օրենսդրական փաթեթի ընդունման գլխավոր պատճառներից մեկը լարիի փոխարժեքի անկումն է, որը վերջին ժամանակներս ռեկորդային ցուցանիշների է հասել: Ազգային բանկի փոխարժեքով՝ ԱՄՆ մեկ դոլարն այսօր արժե 2,70 լարի: