Թբիլիսյան մանկապարտեզի երկրորդ հարկից երեխա է վայր ընկել: Տնօրենի արձագանքը փոթորիկ է առաջացրել

Երեքամյա երեխան վայր է ընկել Թբիլիսիի ծայրամասում գտնվող Զեմո Պոնիչալա ավանի №206 մանկապարտեզի երկրորդ հարկի պատուհանից:

Երեխան տեղափոխվել է մայրաքաղաքի Ինգորովկա հիվանդանոց դեմքի և գլխի վնասվածքներով, աջ թոքի սալջարդով: Շտապօգնության բաժնի ղեկավար Բեսարիոն Կավլաշվիլիի խոսքով՝ երեխան գտնվում է ինտենսիվ թերապիայի բաժանմունքում, նրա կյանքին ոչինչ չի սպառնում:

Մեկնաբանելով տեղի ունեցածը՝ մանկապարտեզի տնօրեն Մարինա Գոգոլաձեն հայտարարել է լրագրողներին, որ դաստիարակները երեխային առանց ուշադրության չեն թողել: Նրա խոսքով՝ «երեխան ինկլյուզիվ էր» և «բառացիորեն դուրս է պրծել դաստիարակի ձեռքից»:

«Մենք բոլորս այնտեղ էինք, սակայն դուք գիտեք, թե ինչպես են իրանց պահում ներառական երեխաները: Երեխան սրանից առաջ էլ էր ամեն օր փորձում նետվել և այսօր նա ի վերջո արեց դա», — ասել է Գոգոլաձեն:

«Ներառական» ասելով՝ տնօրենը նկատի ունի սահմանափակ կարողություններով երեխա:

Նրա մեկնաբանությունները սոցցանցերում հսկայական քննադատություն են առաջացրել որպես ոչ էթիկական:

Թբիլիսիի քաղաքապետարանն արդեն դիմել է Մանկապարտեզների կառավարման գործակալություն մանկապարտեզի տնօրենի և մի քանի դաստիարակների իրավասությունները կասեցնելու խնդրանքով:

• Թբիլիսիում, որտեղ ավելի քան մեկ միլիոն մարդ է ապրում, 156 պետական մանկապարտեզ կա:
• Երբեմն մեկ խմբում մոտ 50 երեխա կա: Ծանրաբեռնվածությունը մյուս խնդիրներից զատ գլխավորներից մեկն է:
• Շատ մանկապարտեզներում անվտանգության միջոցառումները հաշվի առնված չեն: