«ՀԿ-ներն արհեստական ​​երևույթ են»․ Վրաստանում կփակվի դրամաշնորհների կառավարման գործակալությունը

Վրաստանի վարչապետ Կոբախիձեն՝ ընդդեմ ՀԿ-ների

Նախօրեին Վրաստանի վարչապետ Իրակլի Կոբախիձեն հայտարարել է, որ մինչև տարեվերջ փակվելու է պետական ​​դրամաշնորհների կառավարման գործակալությունը։ Նրա խոսքով՝ գործակալությունն արդեն իսկ գտնվում է «սպասման ռեժիմում»։ Գործակալության ղեկավար Թամար Զոդելավան կնշանակվի Արդարադատության նախարարի տեղակալ։

Գործակալությունն ստեղծվել էր 2025 թվականի փետրվարին։ Այդ ժամանակ հայտարարվել էր, որ դրա նպատակն է «պետական ​​բյուջեի միջոցներով աջակցել Վրաստանում գործող այն հասարակական կազմակերպություններին, որոնց գործունեությունը համապատասխանում է երկրի զարգացման առաջնահերթություններին»։

• «Գահաժառանգից»՝ բանտարկյալ. Իրակլի Ղարիբաշվիլիի առճակատումը Վրաստանի իշխող կուսակցության հետ
• Սպիտակ տուն. «Չինաստանն օգտագործում է Վրաստանը ԱՄՆ մաքսատուրքերը շրջանցելու համար»
• «Խորքային պետությունը փորձում է ռուսաֆոբիա հրահրել Վրաստանում»․ Կոբախիձե

«Այս կառույցների՝ ոչ կառավարական կազմակերպությունների հայեցակարգն արհեստական ​​երևույթ է։ ՀԿ-ի միակ նպատակը կարող է լինել մի պետության միջամտությունը մեկ այլ պետության գործերին։ Հենց այդ նպատակով էլ դրանք ժամանակին ստեղծվել են։

Հարյուր տարի առաջ նման կազմակերպություններ գոյություն չունեին։ Հետագայում դրանք ստեղծվեցին և սկսեցին օգտագործվել որպես արտաքին միջամտության հիմնական գործիք։ Վրաստանում մենք դրա բազմաթիվ օրինակներ ենք տեսել։ Հետևաբար, մեր դիտանկյունից նման կառույցների ֆինանսավորումը ճիշտ չէ, դրա համար էլ կայացրել ենք այս որոշումը»,— ասել է Իրակլի Կոբախիձեն։

Նախապատմություն

Վերջին տարիներին «Վրացական երազանքն» ամեն կերպ հետապնդում է միջազգային դրամաշնորհներ ստացող տեղական կազմակերպություններին՝ երբեմն դրանց անվանելով «արևմտյան գործակալներ», իսկ երբեմն՝ պարզապես թշնամիներ։ 2024 թվականի մայիսին խորհրդարանն ընդունեց, այսպես կոչված, «օտարերկրյա գործակալների մասին» օրենքը, որով սահմանափակեց նման կազմակերպությունների գործունեությունը։

«Օտարերկրյա գործակալների մասին» օրենքի ընդունումից հետո կուսակցությունը, մասնավորապես՝ խորհրդարանի խոսնակ Շալվա Պապուաշվիլին բազմիցս կեղծ մեղադրանքներ է հնչեցրել այս օրենքի հակառակորդների, այդ թվում՝ JAMnews անկախ առցանց պարբերականի հասցեին։

Այս իրավիճակում «Վրացական երազանքը» ստեղծեց դրամաշնորհներ տրամադրող պետական գործակալությունը։ Այն պետք է դրամաշնորհներ տրամադրեր այն կազմակերպություններին, որոնց գործունեությունը համապատասխանում է իր շահերին։ Այժմ այս կառույցը նույնպես կդադարի գործել։

Հետևեք մեզ — Facebook | Youtube

Վրաստանի վարչապետ Կոբախիձեն՝ ընդդեմ ՀԿ-ների